Հռչակագրի Նախագիծը

0 0
Read Time:1 Minute, 47 Second

Կարօ Արմենեան
Մարտ 12, 2020

Երէկ, Վարչապետ Փաշինեան, Գորիսի իր հանրահաւաքի ընթացքին, կը բացայայտէր նախագիծը հռչակագրի մը, որ պիտի յաջորդէ Ապրիլ 5-ի ժամկէտով նախատեսուած հանրաքուէին։ Նախագիծը արդէն լայնօրէն հրապարակուած է պետական լրատու համակարգին կողմէ ինքնաբերաբար նախապաշարելով ՀՀ ընտրազանգուածը ամէնուրեք։

Մէկդի թողնելով այն հանգամանքը, որ համապետական հռչակագիր մը պէտք է բխի ներկայացուցչական ժողովի մը (այս պարագային՝ ՀՀ Ազգային Ժողովին) իրաւասութենէն միայն և հաստատուած ընթացակարգի լիարժէք կիրարկումով, կարևոր է հարց տալ, թէ Պր. Վարչապետը իր այս նախագիծը կը հրապարակէ յանուն որո՞ւն և ի՞նչ հանգամանքով։ Ո՞վ կը ներկայացնէ ինք և ո՞րն է պաշտօնական հանգամանքը այն հաւաքին, որուն կը ներկայացուի յիշեալ նախագիծը։

Հանրութեան յիշողութեան մէջ դեռ շատ թարմ են այն օրերը, երբ Պր. Վարչապետը «զօրակոչ»ի կ՚ենթարկէր փողոցը ընդդէմ ՀՀ Ազգային ժողովին և կը յայտարարէր, որ փողոցի հաւաքականութիւնն էր իրեն համար միակ ընդունելի խորհրդարանը…Ինք այդ հաւաքականութիւնը կը կոչէր «ժողովուրդ» քաջ գիտնալով, որ այդ «ժողովուրդ»ը որևէ ձև և հմտութիւն — և որևէ օրինական ձեռնհասութիւն — չէր կրնար ունենալ օրէնսդիր իշխանութիւնը փոխարինելու և որ այդ սուտ հռետորաբանութիւնը ընդամէնը կոչուած էր երկրին մէջ մենատիրութիւն հաստատելու։ Հանրութեան յիշողութեան մէջ նոյնքան թարմ են այն օրերը, երբ Պր. Վարչապետը «զօրակոչ»ի կ՚ենթարկէր նոյն փողոցի հաւաքականութիւնը այս անգամ ճնշման տակ առնելով երկրի դատարանները։

Եւ ահաւասիկ կրկին կը գտնուինք օրէնսդիր և դատական իշխանութիւններու իրաւասութիւններէն ներս ոտնձգութիւն կազմակերպելու նոյն յանցաւոր արարքին առջև։ Հռչակագրի նախագիծը, իր էութեամբ, ոչ այլ ինչ է, եթէ ոչ նորօրինակ միջամտութիւն մը եռեակ իշխանութիւններու տարանջատութեան սկզբունքի սահմաններէն ներս։ Նախագիծը յստակօրէն կը բացայայտէ գործադիր իշխանութեան իսկական դիտաւորութիւնները։

Բոլոր անոնք, որոնք իրենց գրաւը դրած են այս իշխանութեան կողմէ կազմակերպուած այս խաբուսիկ հանրաքուէին վրայ, պէտք է բաց աչքերով կարդան այս նախագիծը։ Ամէն ինչ ըսուած է հոտ։ Ամէն ինչ յստակօրէն նախագծուա՛ծ։ Հիմա է իրականութիւնը տեսնելու ժամանակը։ Եւ հիմա է ժամանակը աննախապաշար և ազգին գերագոյն շահերէն բխող վճռական գործի։

Կը գտնուինք հրամայական կացութեան մը առջև։ Իմ կոչն է Պր. Նախագահին, Պր. Վարչապետին և ՀՀ Ազգային Ժողովի Պր. Նախագահին, որ միասնաբար և անյապաղ առնեն անհրաժեշտ քայլերը այս հանրաքուէն չեղեալ յայտարարելու — քանի դեռ ուշ չէ — և սկիզբը դնելու մէկ նոր և իսկական, համազգային գործընթացի ՀՀ Սահմանադրութեան բարելաւման խնդիրները հանրութեան սեղանին բերելու` լիովին յարգելով Սահմանադրութեան տառն ու ոգին և նախանձախնդրօրէն պահպանելով եռեակ իշխանութիւններու հաւասարազօրութեան և անկախութեան հիմնարար սկզբունքը։


Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Հայաստան Նախագահեց Մ․Ա․Կ․-ի Կանանց Կարգավիճակի Յանձնաժողովը
Next post ԳՈՐԻՍ․- Հ․Հ․ Վարչապետ Փաշինեան Ընթերցեց Սահմանադրութեան Փոփոխութիւններու Հռչակագիրը

Average Rating

5 Star
0%
4 Star
0%
3 Star
0%
2 Star
0%
1 Star
0%

One thought on “Հռչակագրի Նախագիծը

  1. Ասանկ գրութիւններ գրելը միան շունչդ պարապի տանիլ ըսել է: Պարոն Կարօ, երկու տարիէ ի վեր չի հասկցա՞նք, որ աս մարդը, որ վարչապետին աթոռը գրաւէր է, մէկ նպատակ ունի. ամմէն բան ըրաւ եւ պիտի ընէ, որ երկրին բոլոր գործիքները իր ձեռքը առնէ եւ անկէ ետք ուզածը ընէ: Աս ամմէնը կընէ «ժողովուրդը ասպէս կուզէ» ըսելով, արդէն ըսեր էք: Մէկը ժողովուրդին կը հարցնէ՞ որ ինչ կուզէ: Եթէ քուէարկութիւնը ըլլայ, միւս օրը դատարանի մարդիկը տուն պիտի ղրկէ, իր մարդիկները պիտի բերէ, յետոյ անոնց ալ «պարգեւավճառներ» պիտի տայ ամսականին վրայ, անոնք ալ պիտի չիկրնան իր ըսածէն ուրիշ բան մը ընել: Տեսէք, նախարարները, երեսփոխանները եւ բոլոր միւս պաշտօնեաները մէկ բան կընեն. երբ Նիկոլը բան մը ուզէ, ամմէնքը ձեռքերնին կը վերցնեն եւ այո կըսեն: Դուն ուզածիդ չափ շիտակ բաներ ըսէ, շիտակ բաներ գրէ, մարդը իր ընելիքը պիտի ընէ առանց մէկու մը բան մը հարցնելու: Քուէարկութիւնէն վերջն ալ, նոր դատարանը առանց մտածելու պիտի վաւերացնէ ան օրէնքները որ ինքը պիտի տայ իրենց. անկէ ետք, միասեռականութիւնը գլուխը պիտի առնէ եւ երթայ, Ղարաբաղի մասին ալ ուզածը կրնայ ընել, տեղ մը հող պիտի տայ, ըսելով որ ասանկ աւելի հանգիստ պիտի ըլլայ Հայաստանը: Ժամանակին, ԼՏՊն ալ անանկ ըսած էր, իսկ աս մարդը անոր աշակերտն է: Ամերիկացիներուն եւ Ռուսերուն ալ գործին անանկ կուգայ: Ռուսերը ժամանակին Ղարաբաղը Ատրպեճանին չիտուի՞ն: Երկու տարին բաւական ժամանակ տուաւ որ հասկանանք որ Հայաստանի մէջ կառավարութիւն չիկայ, փարլաման չիկայ, դատարան չիկայ եւ պիտի չըլլայ, կայ ու կը մնայ… Նիկոլը: Մէկ բան մըն ալ ըսեմ: Դէմը ելլողները պէտք եղած փաստերով չեն խօսիր, միայն լաւ չէ, լաւ չիըներ կըսեն: Մարդեր, փաստերով ըսէք որ աս մարդը ինչպէս երկիրին եւ ժողովուրդին կը վնասէ, որպէսի ժողովուրդին աչքը իրակա բացուի:

Leave a Reply

Your email address will not be published. Required fields are marked *

Social profiles