Փրովիտենսի Սրբոց Վարդանանց Եկեղեցուոյ Անուան Շքեղ Տօնակատարութիւն Եւ Սարկաւագներու Ձեռնադրութիւն

0 0
Read Time:2 Minute, 49 Second
Լուսանկարներ՝ Պերճ Զօպեան

Փետրուար 23-ի Կիրակին, յիշատակելի եւ անմոռանալի օր արձանագրեց Փրովիտենսի Սրբոց Վարդանանց եկեղեցւոյ  պատմութեան մատեանին մէջ։ Եկեղեցւոյ անուան տօնակատարութեան եկաւ միանալու օրուան Խորհուրդը աւելի իմաստալից դարձնող  երեք սարկաւագներու ձեռնադրութիւնը՝  ձեռամբ Ա․Մ․Ն․ արեւելեան թեմի Բարեջան Առաջնորդ՝ Գերշ. Տ. Անուշաւան Ս. Արք.  Դանիէլեանի   եւ   խարտաւիլակութեամբ՝ Տ. Գաբրիէլ Քհնյ. Նազարեանի։ Դպրաց դասի քաղցր երգեցողութիւնն ու պատարագիչին հաղորդական ձայնը արդէն իսկ լեցուցած էին Կիրակնօրեայ եւ շաբաթօրեայ  դպրոցի աշակերտներու, Հ.Մ.Ը.Մ.-ի սկաուտներու,   եւ  բարեպաշտներու սրտերը որոնք եկած էին Վարդանանց տօնի յիշատակութեան մասնակցելու, Սրբազան Հօր պատգամով    հաղորդուելու    եւ    մանաւանդ վկայելու երեք երիտասարդ ձեռնադրուող սարկաւագներու արժանելիութեան։

Հասաւ «Ողջոյն»-ի պահը։ Պատարագի երգեցողութիւնը  կանգ  առաւ ու խարտաւիլակ հովիւը Սրբազան հօրմէ խնդրեց որ սարկաւագ ձեռնադրէ Արի Նալպանտեան, Արիս Խաչատուրեան եւ Շանթ Եղիայեան կիսասարկաւագները, վկայելով որ «անոնք սարկաւագի կարգին պատրաստ  են   ու արժանի՝ այս աստիճանի լուծը կրելու, որովհետեւ ունին սրբութիւն եւ իմաստութիւն»։ Ընծայեալները դպրաց դասէն  ծնկաչօք բարձրացան դէպի խորան։  Ձեռնադրիչ Սրբազանը իր    աջը   դնելով    իւրաքանչիւր     նուիրեալին  գլխուն վրայ , աղօթեց որ անոնք Ս. Ստեփանոս նախավկայի օրինակին հետեւելով ,  անարատ    կերպով   կատարեն իրենց պաշտօնը Աստուծոյ սուրբ խորանին առջեւ։

Յետ ձեռնադրութեան , Սրբազան Հայրը իր հոգեշունչ քարոզին մէջ անդրադարձաւ օրուայ հանդիսութեան խորհրդանշական իմաստին։  Ան շնորհաւորեց ներկաները ,օրհնութիւնները տուաւ նորընծայ սարկաւագներուն, յորդորելով զանոնք որ խոնարհութեամբ ու հաւատքով կատարեն իրենց ծառայութիւնը, ի   փառս Աստուծոյ եւ ի պայծառացումն Հայաստանեայց  Առաքելական Սուրբ եկեղեցւոյ։  Սրբազան Հայրը  քաջալերեց զանոնք  որ տեսակաւոր դժուարութիւններու դիմաց , Վարդանանց  հերոսներու ոգիով գօտեպնդուած ՝ անոնք առանց տկարանալու, յարատեւօրէն  ու հաւատարմօրէն շարունակեն ազգին ու եկեղեցիին իրենց ծառայութիւնը, յաղթահարելով առօրեայ նոր  ճակատամարտերը, ամուր պահելով մեր ազգային, մշակութային եւ հոգեւոր արժէքները  որ պիտի փոխանցեն յաջորդ սերունդին։

Յետ պատարագի, եկեղեցւոյս Մեսրոպ Ա. Քհնյ. Թաշճեան կեդրոնի Արամեան սրահին մէջ տեղի ունեցաւ օրուայ պատշաճ ճաշկերոյթը պատրաստուած` Եկեղեցւոյ տիկնանց եւ արանց միութեանց անդամներուն կողմէ: Բացման խօսքը ըրաւ, Հոգաբարձութեան ատենապետ` Տիար Ճէյսըն Սիմոնեան, բարեգալուստ մաղթելով Սրբազան հօր, օրուայ պատուոյ հիւրերուն եւ շնորհաւորելով ձեռնադրուող սարկաւագներն ու իրենց ընտանիքները։

Համեղ ճաշի սպասարկութենէն ետք, գործադրուեցաւ կոկիկ յայտագիր մը։ Առաջին մասով, հանդիսավար՝ Տիար Սիմոնեանը հրաւիրեց եկեղեցւոյս հովիւ՝ Արժ. Տ. Գաբրիէլ Քհնյ.  Նազարեանը որ յայտնեց թէ Արամ Ա. Կաթողիկոսի  2020 տարին  «Յատուկ Խնամքի Կարօտ Հայորդիներու» տարի հռչակման թեմայով առաջնորդուած՝ հոգաբարձութիւնս որոշեց պատուել երեք հանրածանօթ ազգայիններ, որոնք   բազմաշատ անխոնջ  ծառայութիւններ մատուցած են խնամքի կարօտ հայորդիներու , ըլլան անոնք Հայաստանի մէջ, կամ պատերազմական վիճակէ փախած ու Փրովիտէնս ապաստանած հայեր, եւ կամ տեղացի գաղութիս պատկանողներ ընտանիքներ։  Իրենց հակիրճ կենսագրականներու  ներկայացումէն   ետք՝ Տիկին Ճօյս Զուարթ Երեմեան, Տիար Արմանտ  Գիպարեան եւ Տիար Մանուկ Գաբրիէլեան պարգեւատրուեցան յատուկ գնահատագրերով,  անկարին ու կարօտեալին իրենց անսակարկ ծառայութեան   համար։

Ապա Սրբազան Հայրը  դարձեալ շնորհաւորեց  սարկաւագութեան կարգը ստացող երեք հայորդիները  Արի Նալպանտեանը, Արիս Խաչատուրեանն ու Շանթ Եղիայեանը  ու անոնց ներկայացուց յատուկ վկայագրեր այս յիշատակելի առիթով, հաստատելով  անոնց ծառայութիւնը, հիմնուած աւետարանի համարին վրայ որ կ՚ըսէ  «Լուծ իմ քաղցր է  եւ բեռն  իմ փոքրոգի»։ 

 Ապա գործադրուեցաւ կոկիկ գեղարուեստական յայտագիր մը, կատարողութեամբ   Մուրատ ազգային վարժարանի բարձրագոյն կարգերու աշակերտներուն: Երգի դասատու ՝ Պրն. Ռաֆֆի Ռշտունիի դաշնակի ընկերակցութեամբ , մեր  նոր սերունդի զաւակները երգեցին Վարդանանցի հերոսներուն նուիրուած «Նորահրաշ» շարականը, Խորէնեանի «Տէր Ողորմեա»ն, եւ Վարդանանց հերոսներու գովքը հիւսող երգեր ու կատարեցին  արտասանութիւններ։

Յայտագրի աւարտին, Տէր հայրը դարձեալ շնորհաւորեց բոլորը ու հրաւիրեց Սրբազան Հայրը որ  տայ իր հայրական պատգամը։ Սրբազանը մեծ հրճուանքով գնահատեց հայ դպրոցի աշակերտներուն ելոյթը։ Ան  դարձեալ շնորհաւորեց Սրբոց Վարդանանց եկեղեցւոյ ընտանիքի բոլոր անդամները, անխտիր, գնահատելով եկեղեցւոյս ու գաղութիս բոլոր պատկան մարմիններու   համագործակցութիւնը,  որու շնորհիւ   նոր սերունդը կ՚աճի, կը զարգանայ ու  կը պատրաստուի ստանձնելու իրեն փոխանցուած  պաշտօնն ու  վստահուած առաքելութիւնը որպէս եկեղեցւոյ  ու ազգի հաւատարիմ  սպասարկողներ։   Հանդիսութիւնը վերջ գտաւ «Կիլիկիա» մաղթերգով:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Էրտողանեան Ներխուժումներ 
Next post Արդարադատութիւնը Գլխիվայր

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles