Ֆլորիտայի Հ․Օ․Մ․-ի «Սօսէ» Մասնաճիւղին Ձեռնարկը

0 0
Read Time:1 Minute, 59 Second

ՆԱՐԴՈՒՀԻ ՂԸՐՏԵԱՆ

Փետրուար 14-ին, Ֆլորիտայի Ռոյըլ Ֆիեսթա (Տիրֆիլտ) պանդոկին մէջ «Սօսէ» մասնաճիւղը կազմակերպած էր Հ․Օ․Մ․-ի հիմնադրութեան 110-ամեակին նուիրուած պարահանդէսը։ Ներկայ էին 220-է աւելի անդամներ իրենց հարազատներով եւ Հ․Օ․Մ․-ը քաջալերող եւ անոր նեցուկ հանդիսացող շատ ու շատ բարեկամներ։ Նախ ատենապետուհի Մերի Անտոնեան բացումը կատարեց, ապա բեմ հրաւիրեց հինգ հիմնադիր անդամները՝ գնահատանքի եւ շնորհակալութեան խօսք ուղղելու անոնց եւ յանձնելու պատուոգիրներ։ Էլի Պէրպէրեան իր նուագախմբով ջերմացուց մթնոլորտը։ Մասնաճիւղի ամենակրտսեր, աշխոյժ ու շնորհալի անդամուհի Թամար Քասարճեան իր հայկական տոհմիկ տարազով, Սայաթ Նովայի երաժշտութեան հնչիւններու ներքոյ մեզի հրամցուց իր հեզաճկուն եւ հեզասահ պարը՝ հիացմունք պատճառելով բոլորիս։

110-րդ պանծալի տարեդարձ – այդ ինչպէ՞ս…

1910-ին, Նիւ Եորքի մէջ, կուսակցական գործիչ Ակնունիի կողմէ հիմնադրուած Հ․Օ․Մ․-ը ներկայիս 27 երկիրներու մէջ համաշխարհային տարողութեամբ իր ծառայութիւնը կը բերէ մարդասիրական ու բարեգործական զանազան ծրագիրներու իրականացման նպատակով։

27 երկիրներու մէջ, զարմանալի է… բայց ինչո՞ւ զարմանալ։ Աշխարհի մէջ այնտեղ, ուր քանի մը «փափկասուն տիկնայք Հայոց աշխարհի» կան, գիտցէք որ անմիջապէս մեղուափեթակ մը կը ստեղծուի աշխոյժ ու ժրաջան մեղու-հիներով՝ Հ․Օ․Մ․-ուհիներով։ Կեցցե՛ն այս մեղուները…

Ցանկալ անդամակցիլ Հ․Օ․Մ․-ին, բաւարար չէ։ Ասոր համար կը պահանջուի նախ ըլլալ բարի, ազնիւ մարդոց հանդէպ, ջերմ, պարկեշտ ու հաւատարիմ կին, հոգատար ու անձնազոհ մայր. ասոնք ծառայութեան եւ հաւատամքի բնական գեղեցիկ յատկանիշներ են։

Սակայն ամենակարեւորը այս պարագային խղճմտանքն է. երկինքէն մեզի տրուած այս աստուածային զգացումը, այս լուսաւոր կայծը, որ Խիղճ կը կոչենք։ Եւ ի՞նչ է խիղճը. փիլիսոփայ Պղուտոն այսպէս բնորոշած է. «Գիտակցութիւն, սիրտ եւ հոգի-ահաւասիկ խիղճին էութիւնը»։

Այսպէս պէտք է ըլլայ հայ կնոջ՝ Հ․Օ․Մ․-ուհիին բարոյական բարձր նկարագիրը։ Ան պէտք է յիշէ իր մեծ մայրերուն, ծնողներուն միս ու արիւն դարձած սկզբունքը՝ ըլլալ ազնիւ մայր, «նամուս»ով կին, օրինակելի անձ կեանքի բոլոր բնագաւառներուն մէջ, ու չմոռնալ մեզի աւանդուած խրատը.

«Կաթս քեզի հարամ ըլլայ, եթէ մոռնաս քու ազնուութիւնը, ազգութիւնը, հայրենասիրութիւնը, լեզուն եւ կրօնքը»։

Մենք՝ Հ․Օ․Մ․-ուհիներս այս ձեւով պիտի շարունակենք մեր գործունէութիւնը ի մտի ունենալով Վահան Թէքէեանի պատգամը՝ «Բարձրացի՛ր, բարձրացո՛ւր»։

Օր մը ծերունի կնոջ մը հարց կու տան, թէ ի՛նչ կը գործածէ իր դէմքը այդքան գեղեցիկ եւ իր կեցուածքը այդքան առողջ ու գրաւիչ պահելու համար։ Ան կը պատասխանէ.

Շրթներուս համար Ճշմարտութիւն կը գործածեմ.

Ձայնիս համար՝ Քաղցրութիւն,

Աչքերուս համար՝ Գութ,

Ձեռքերուս համար՝ Ողորմութիւն,

Կերպարանքիս համար՝ Պարկեշտութիւն,

Սրտիս համար՝ Սէր,

Հոգւոյս համար՝ Սրբութիւն,

Բոլոր անոնց համար, որոնք զիս չեն սիրեր՝ Աղօթք։

Եւ այս կինը Հ․Օ․Մ․-ուհի մըն էր…

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԽՈՒՃԱՊԸ ՀԱՅԱՍՏԱՆԻ ՄԷՋ
Next post ՀԵՌԱՀԱՍ ՀՈՐԻԶՈՆՆԵՐ.- ԵԹԷ ՀԱՍՆԻ ԹՈՒՐՔԻՈՅ ՏԱՐԱՆՋԱՏՄԱՆ ՊԱՀԸ…

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles