ՆԻՒ ՃԸՐԶԻԻ ԵՒ ՓՐՈՎԻՏԵՆՍԻ ՄԷՋ` ՍՐԲՈՑ ՎԱՐԴԱՆԱՆՑ ՏՕՆԱԽՄԲՈՒԹԻՒՆ

0 0
Read Time:1 Minute, 47 Second
Յովնանեան վարժարանի աշակերտները կ՚երգեն Սրբոց Վարդանանց տօնին ընթացքին՝ Ռիճֆիլտի (Նիւ Ճըրզի) Սուրբ Վարդանանց եկեղեցւոյ մէջ

Այս տարի ալ պատշաճօրէն նշուեցաւ Սուրբ Վարդանանցը, Ա․Մ․Ն․ արեւմտեան թեմի գաղութներէն ներս։ Հինգշաբթի, Փետրուար 20-ին, բարեջան առաջնորդ՝ Գերշ. Տ. Անուշաւան արք. Դանիէլեան, պատարագեց ու քարոզեց Սրբոց Վարդանանց տօնին եւ եկեղեցւոյ անուանակոչութեան առիթով՝ Ռիճֆիլտի (Նիւ Ճըրզի) Սուրբ Վարդանանց եկեղեցւոյ մէջ։ Ըստ աւանդութեան, Յովնանեան վարժարանի աշակերտները մասնակցեցան Սուրբ Պատարագին ու հաղորդութիւն ստացան։ Յաւարտ Սուրբ. Պատարագի, տեղի ունեցաւ ճաշկերոյթ մը, որուն ընթացքին աշակերտները գեղարուեստական կոկիկ յայտագիր մը ներկայացուցին։

 

Անուշաւան Արքեպիսկոպոս, Տ. Գաբրիէլ քհն. Նազարեան, խորանի ծառայողները եւ դպրաց դպրաց դասը

Ապա, Կիրակի, Փետրուար 23-ին, Առաջնորդ Սրբազան Հայրը պատարագեց Փրովիտենսի (Ռոտ Այլընտ) Սրբոց Վարդանանց եկեղեցւոյ մէջ, եկեղեցւոյ անուանակոչութեան առիթով։ Սուրբ Պատարագի ընթացքին, Անուշաւան Արքեպիսկոպոս սարկաւագ ձեռնադրեց Շանթ Եղիայեանը, Արիս Խաչատուրեանը եւ տոքթ. Արի Նալպանտեանը։ Ձեռնադրութենէն ետք, Առաջնորդ Սրբազան Հայրը քարոզեց՝ նոր սարկաւագները քաջալերելով, որ շարունակեն Հայ Եկեղեցւոյ եւ հայկական իրենց ժառանգութեան ծառայելու յանձնառութիւնը։ Ան յիշեցուց հաւատացեալներուն Սուրբ Վարդանի եւ անոր հետեւորդներուն հերոսական զոհաբերութիւնը եւ յորդորեց, որ երբեք մեր քրիստոնէական արժէքները չզիջին աշխարհիկ կեղծ չափանիշներու դիմաց։

Անուշաւան Արքեպիսկոպոս, Տ. Գաբրիէլ քհն. Նազարեան, խորանի ծառայողներ եւ Հ․Մ․Ը․Մ․-ի սկաուտներ

Յաւարտ Սուրբ Պատարագի, տեղի ունեցաւ Վարդանանցի օրուան աւանդական ճաշկերոյթը, կազմակերպութեամբ՝ Տիկնանց Միութեան եւ Արանց Ակումբին։ Անոր ընթացքին, Մանուկ Գաբրիէլեան, Ճոյս Երեմեան եւ Արմանտ Քիպարեան արժանացան Ազգային Առաջնորդարանի վկայագրին, ի գնահատանք իրենց նուիրեալ աշխատանքին՝ ֆիզիքական եւ հոգեկան խնամքի կարօտ անձերու օժանդակութեան համար։ Գաբրիէլեան աշխատած էր 1988ի երկրաշարժի եւ Ատրպէյճանի հետ պատերազմի վերապրողներու հետ, տիկ. Երեմեան՝ պատերազմէն հայ փախստականներու հետ, իսկ պրն. Քիպարեան՝ տնանկ ու կարիքաւոր մարդոց հետ՝ Փրովիտենս քաղաքին մէջ։

Ձախէն աջ՝ եկեղեցւոյ հոգաբարձութեան ատենապետ՝ Ճէյսըն Սիմոնեան, Արմանտ Քիպարեան, Գաբրիէլ քհն. Նազարեան, Անուշաւան Արքեպիսկոպոս, Ճոյս Երեմեան եւ Մանուկ Գաբրիէլեան

«Մուրատ» ազգային Վարժարանի աշակերտները Սուրբ Վարդանանց նուիրուած երգերու եւ բանաստեղծութիւններու յայտագիր մը ներկայացուցին, ղեկավարութեամբ երաժշտութեան ուսուցիչ՝ Ռաֆֆի Ռշտունիի։ Յայտագրի աւարտին, հոգեւոր հովիւ՝ Տ. Գաբրիէլ քհն. Նազարեան իր խոհերը ներկայացուց։ Փակման խօսքին մէջ, Անուշաւան Արքեպիսկոպոս գնահատեց հայ համայնքի օրինակելի կազմակերպութիւնը՝ գրեթէ ութսուն տարուան գոյութեան ընթացքին։

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԴՐԱԽՏՆ ՈՒ ՆԱԽԱՄԱՐԴԸ ՆԿԱՐՆԵՐՈՒՆ ՄԷՋ
Next post Ազերիական Ժահր

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles