Հայաստանի Հ.Յ.Դ. Երիտասարդական Միութեան Պատգամաւորական Ժողով

0 0
Read Time:1 Minute, 44 Second

ԵՐԵՒԱՆ․- Շաբաթ, Փետրուար 22-23-ին տեղի ունեցաւ Հ․Յ․ Դաշնակցութեան Հայաստանի Երիտասարդական միութեան 7-րդ պատգամաւորական ժողովը, որուն բացման հանդիսութեան, մասանակցեցան ոչ միայն դաշնակցականներ, այլ նաեւ Հայաստանի քաղաքական դաշտին մէջ գործունէութիւն ծաւալող կուսակցութիւններու եւ կազմակերպութիւններու երիտասարդ ներկայացուցիչներ:

Հ․Յ․Դ․ Գերագոյն մարմինի ներկայացուցիչ Իշխան Սաղաթէլեան պատմական ակնարկով ներկայացուց, թէ այս երիտասարդականը ինչպիսի մասնակցութիւն ունեցած է հայրենիքի պաշտպանութեան գործընթացներուն մէջ։ Ան աւելցուց, թէ աւելի քան որեւէ ժամանակ անհրաժեշտ է Հայաստանի մէջ ունենալ իր ազգային ինքնութիւնը, մշակոյթը խորապէս գիտակցող եւ կարեւորող երիտասարդութիւն` ազգային գաղափարախօսութեան տէր, քաղաքականացած երիտասարդութիւն։

«Դաշնակցութեան յարատեւութեան գաղտնիքը պայմանաւորուած է անով, որ Դաշնակցութիւնը իր մէջ եւ իր կողքին միշտ ունեցած է հայրենասէր, կազմակերպուած, գաղափարական երիտասարդութիւն, եւ իւրաքանչիւր սերունդ նոր կեանք, նոր շունչ տուած է կուսակցութեան ծրագիրներուն։․․․Երբեք պայման չէ կուսակցական պատկանելիութիւնը, կարեւորը` տեսակէտ, գաղափար, դիրքորոշում ունեցող երիտասարդութիւն ունենալն է: Մենք կրնանք մեր գաղափարները չկիսողներու, մեր գաղափարները չընդունողներու հետ խօսիլ, գործակցիլ, բայց ամէնէն վատը անտարբեր երիտասարդութիւնն է, ամէնէն վատը այն երիտասարդութիւնն է, որ չունի դիրքորոշում, կեցուածք, մտահոգութիւն իր երկրին, ժողովուրդի ապագային եւ ներկային նկատմամբ», ըսաւ ան:

Հ․Յ․Դ․ Բիւրոյի երիտասարդական հարցերու պատասխանատու Յովսէփ Տէր Գէորգեան յայտնեց. «Հ․Յ․Դ․ երիտասարդական եւ ուսանողական միութիւնները, եւ յատկապէս Հայաստանի Երիտասարդական միութիւնը` մերժելով եւ պայքարելով հանդերձ այսօրուան ներքաղաքական իրավիճակը յատկանշող անընդունելի երեւոյթներու դէմ, ազգային գործունէութեան հետ մէկտեղ կը շեշտադրեն եւ պիտի շարունակեն յաւելեալ թափով իրականացնել ընկերվարական բնոյթի ծրագիրները, ընկերային արդարութեան, բնապահպանութեան եւ այլ ընկերային-տնտեսական բնոյթի կառուցողական նախաձեռնութիւնները»: Ան անդրադառնալով արցախեան տագնապի լուծման, ըսաւ. «Այժմ մտահոգութիւններ կան Ղարաբաղեան տագնապին շուրջ զարգացումներու առնչութեամբ: Հ․Յ․Դ․ երիտասարդութիւնը կը մերժէ տարածքային որեւէ զիջում` ենթադրեալ անվտանգութեան դիմաց եւ իր անվերապահ մասնակցութիւնը կը բերէ ղարաբաղեան տագնապի բոլոր մարզերուն»:

Խօսք առաւ Հայաստանի Հանրապետական կուսակցութեան երիտասարդական կազմակերպութեան նախագահ Հայկ Մամիջանեան, որ նշեց, թէ անկախ գաղափարական հակասութիւններէն, մեր երկրին մէջ քաղաքական ուժերը մէկ ընդհանրութիւն ունին` ազգային դիմագիծի պահպանում, ազգային արժէքներու արժեւորում:

Հ․Յ․Դ․ Հայաստանի երիտասարդական միութեան անդամ Արգիշտի Գէորգեան ըսաւ` թէեւ կուսակցութիւններն ու գաղափարախօսութիւնները տարբեր են, բայց բոլորին նպատակն է տեսնել ազատ, անկախ, յառաջադէմ, հզօր, նաեւ միացեալ Հայաստան:

«Մենք բոլորս երիտասարդներ ենք` լեցուած մեծ նպատակներով եւ զանոնք իրագործելու վճռականութեամբ: Կը նշանակէ` տեղ մը բոլորիս շահերը կը համընկնին, ունինք գործելու ընդհանուր դաշտ», ըսաւ Արգիշտի Գէորգեան:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Երեւանի Մէջ` Հայ Դատի Յանձնախումբերու Եւ Գրասենեակներու Խորհրդաժողով
Next post Հայ Դատի Խորհրդաժողով․- «Արցախի Ճանաչման Խնդիրը Հայ Դատի Առաջնահերթութիւններէն Է», Կը Յայտնէ Յակոբ Տէր Խաչատուրեան

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles