ՄԱՍԱՉՈՒՍԷՑԻ ՄԷՋ ՍՐԲՈՑ ՂԵՒՈՆԴԵԱՆՑԻ ՀԱՒԱՔ

 

Առաջնորդ Սրբազան Հայրը Սրբոց Վարդանանց սրբապատկերը կ՚օծէ Սուրբ Ստեփանոս եկեղեցւոյ մէջ

Երեքշաբթի, Փետրուար 18ին, Սրբոց Ղեւոնդեանցի տօնին առթիւ Նիւ Ինկլընտի հոգեւորականներու հաւաք տեղի ունեցաւ Ուոթըրթաունի (Մասաչուսէց) Սուրբ Ստեփանոս եկեղեցւոյ մէջ, նախագահութեամբ թեմիս բարեջան առաջնորդ՝ Գերշ. Տ. Անուշաւան արք. Դանիէլեանի։ Երեկոյեան, տեղի ունեցաւ եկեղեցական յատուկ արարողութիւն, որուն ընթացքին, Առաջնորդ Սրբազան Հայրը օծեց Սրբոց Վարդանանց նոր սրբապատկերը։

Ղեւոնդեանց քահանաները խումբ մը հոգեւորականներ էին, որոնք  կաթողիկոսէ, եպիսկոպոսներէ, երէցներէ եւ սարկաւագներէ կը բաղկանային: Այս խումբը իր անուանումը ստացած էր իրենց հոգեւոր պարագլուխէն` Ղեւոնդ Երէցէն, որ ո՛չ միայն Ս. Սահակի եւ Ս. Մեսրոպի օգնականը եղած էր, այլ նաեւ խորհրդատուն էր Վարդան Մամիկոնեանի եւ Յովսէփ կաթողիկոսին: Ղեւոնդ Երէց ինքն էր, որ հայ նախարարները եւ քահանաները խանդավառած էր քաջութեամբ պայքարելու թշնամիներուն դէմ: 451 թուականին, Վարդանանց պատերազմէն ետք, այս հոգեւորականները ձերբակալուեցան եւ բանտարկուեցան: Հետագային, պատերազմի մը ընթացքին երբ պարսիկները պարտութեան մատնուեցան, անոնց թագաւորը ամէնէն դաժան ձեւով չարչարել եւ սպաննել տուաւ իր հայ քրիստոնեայ բանտարկեալները:

Նիւ Ինկլընտի հոգեւորականներու դասը նորաօծ սրբապատկերին առջեւ

Աւանդութեան համաձայն, Սրբոց Ղեւոնդեանց նշխարներէն մաս մը կը գտնուի Խորասանի Մաշատ շրջանին մէջ, ուր յաճախ հրաշքներ պատահած են: Պարսիկներու Շահ Ապաս Ա. թագաւորը միանգամընդմիշտ ջնջելու համար սուրբերուն յիշատակը, նշխարներուն վայրը իր հին պարսիկ նախնիներուն շիրիմին կը վերագրէ: Սրբոց Ղեւոնդեանց մարտիրոսութիւնը տեղի ունեցաւ Վարդանանց պատերազմէն մօտ երեք տարի եւ երկու ամիս ետք: Սակայն տօնացոյցի կարգաւորութեան մէջ Վարդանանցի յիշատակութենէն երկու օր առաջ դրուած է այս տօնը:

Ձախէն աջ՝ Անդրանիկ Ա. քհն. Պալճեան, Անուշաւան Արքեպիսկոպոս, սրբապատկերի բարերար՝ Անահիտ Նաճարեան, եւ դուստրը՝ Սոնիկ Նաճարեան

Թէեւ 9 հոգիէ բաղկացած նահատակներու այս խումբին անդամները տօնացոյցին մէջ իբրեւ քահանաներ կը յիշուին, բայց անոնց մէջ եկեղեցւոյ բոլոր դասերէն ներկայացուցիչներ կան, ինչպէս` կաթողիկոս, եպիսկոպոս, քահանայ եւ սարկաւագ: Անոնց վկայաբանութեան պատմութիւնը ընդարձակ է, որ մանրամասնութեամբ կը ներկայացնեն Եղիշէ եւ Ղազար Փարպեցի պատմիչները: Իր անունով նահատակուած ինը  քահանաները կոչուած են սուրբ Ղեւոնդեանք: Անոնց  շարքին  են ինքը` Ղեւոնդ Երէց, Յովսէփ կաթողիկոս, Սահակ եպիսկոպոս Ռշտունեաց, Թաթիկ եպիսկոպոս Բասենի, Մուշէ քահանայ Աղբակեցի, Արշէն Երէց Բագրեւանդեցի, Սամուէլ քահանայ, Աբրահամ սարկաւագ, Քաջաջ սարկաւագ:

Հայ առաքելական եկեղեցին ամէն տարի արժանաւորապէս կը նշէ Ղեւոնդեանց քահանայից տօնը եւ կը պատուէ հայ եկեղեցւոյ մէջ ծառայող բոլոր քահանայ հայրերը: Վարդանանցին նախորդող երեքշաբթի օր տեղի կ՛ունենայ յատուկ գիշերային եւ առաւօտեան ժամերգութիւն, որոնց ընթացքին կ՛երգեն տօնը խորհրդանշող գեղեցկահիւս շարականներ: Սրտագրաւ պատկեր է տեսնել քահանայից դասին սպասարկութիւնը Ս. պատարագի խորհուրդի տեւողութեան: Այդ օր յատուկ աղօթքով եւ հոգեհանգստեան պաշտօնով կը յիշուին բոլոր այն վախճանած քահանաները, որոնք հայ եկեղեցւոյ նուիրական առաքելութեան եւ Աստուծոյ ծառայութեան վեհ կոչումին նուիրեալ մշակներ եղած են:

Ղեւոնդեանց յիշատակի համար ամբողջական կանոն կայ շարակնոցին մէջ: Յատկանշական եւ ընդարձակ է մանկունք շարականը, որուն իւրաքանչիւր տողը կը սկսի հայոց այբուբենի տառով մը` Ա-էն Ք-ն: Ստորեւ կը ներկայացնենք այդ շարականէն տուն մը:

 

Լուսաւորիչն ամենեցուն Ղեւոնդիէ Սուրբ վարդապետն,

Խոհական մեծ Խորհրդով խրատեալ, լցոյց զաշակերտեալսն.

Ծաւալեալ զլոյս գիտութեան յոգիս արանց կատարելոց`

Կամաւոր յօժարութեամբ կատարեցան սիրով Փրկչին:

Լուսաւորիչը բոլորին Ղեւոնդիոս Ս. Վարդապետը

Խոհական մեծ խորհուրդով խրատեց-լեցուց զինուորներուն.

Ծաւալեց գիտութեան լոյսը նահատակուողներու հոգիներուն,

Կամաւոր յօժարութեամբ, Փրկչին սիրով նահատակուեցին:

 

 

 

 

 

 

 

 

 

Be the first to comment

Leave a Reply

Your email address will not be published.


*