Ցուցահանդէս՝ «Հ.Յ.Դաշնակցութիւնը Արցախի Մէջ. Յետադարձ Հայեացք» Եւ Գիտաժողով

0 0
Read Time:2 Minute, 46 Second


ՍՏԵՓԱՆԱԿԵՐՏ.- 1989-ին, աւելի քան 70 տարուան խորհրդային տարագրութենէ ետք, Հայ յեղափոխական դաշնակցութիւնը վերադարձաւ Արցախ` իր կազմակերպական ողջ ներուժով սատարելու արցախահայութեան ազգային-ազատագրական պայքարին: Այս նշանակալի իրադարձութեան առթիւ, «Եւրոպա» հիւրանոցին մէջ «Հ.Յ.Դաշնակցութիւնը Արցախի մէջ. յետադարձ հայեացք» խորագիրը կրող ցուցահանդէս մը տեղի ունեցաւ:
Բացման արարողութեան ներկայ էին` Արցախի նախագահութեան թեկնածու, Հ.Յ.Դ. Արցախի Կեդրոնական կոմիտէի ներկայացուցիչ Դաւիթ Իշխանեանը, Արցախի Ազգային ժողովի փոխնախագահ Վահրամ Բալայեանը, մարմնամարզի եւ երիտասարդութեան նախարար Լեռնիկ Յովհաննիսեանը, Արցախի Ազգային ժողովի պատգամաւորներ, դասախօսներ, ուսանողներ, երիտասարդներ:
Հ.Յ.Դ. Արցախի Կեդրոնական կոմիտէի անդամ Սերգէյ Շահվերդեանը նշած է, որ ցուցադրուած նմուշները կը վերաբերին Դաշնակցութեան վերադարձին Արցախ, ներկայացուած են Հ.Յ.Դ. առաջին պաշտօնական դրօշը, առաջին ծրագիրը, կանոնագիրը, զանազան գրութիւններ, արձանագրութիւններ:
Ցուցահանդէսին առանձին տեղ յատկացուած էր արցախեան շարժման երկու ամէնէն յայտնի դաշնակցական գործիչներուն` Արթուր Մկրտչեանին եւ Աշոտ Ղուլեանին անձնական իրերուն:
Սերգէյ Շահվերդեանի խօսքով, ներկայացուած ցուցանմուշներէն առանձնայատուկ հետաքրքրութիւն կը ներկայացնէ Դաշնակցութեան Հատրութի կազմակերպութեան գրութիւնը առ այն, որ Արթուր Մկրտչեանը Ստեփանակերտի մէջ բնակելու պատճառով տեղափոխուած է Ստեփանակերտի կազմակերպութեան խումբերէն մէկը: Փաստաթուղթը առաջին անգամ ըլլալով կը հրապարակուի, եւ այս մէկը սպառիչ պատասխանն է այն խօսակցութիւններուն, թէ արդեօ՞ք Արթուր Մկրտչեանը Հ.Յ.Դ. անդամ էր:
«Դաշնակցութեան գործունէութիւնը Արցախի մէջ միշտ հարթ չէ անցած, մենք ունեցած ենք ժամանակաշրջան, երբ բազում դժուարութիւններ եւ հետապնդումներ եղած են, որուն վերաբերեալ եւս բազում փաստաթուղթեր ներկայացուած են: Օրինակ, Շուշիի Արամ Մանուկեան վարժարանի բացման եւ փակման, Դաշնակցութեան պաշտօնական գրանցումը մերժելու մասին փաստաթուղթերը», յայտնեց Սերգէյ Շահվերդեանը` աւելցնելով, որ փաստաթուղթերուն ծանօթացողը կը վերադառնայ 1990-ական թուականներ:
Այս ցուցահանդէսէն ետք «Եւրոպա» հիւրանոցի դահլիճին մէջ, տեղի ունեցաւ Արցախի մէջ Հ.Յ.Դ. գործունէութեան նուիրուած միջազգային գիտաժողովը:

« Հ.Յ.Դաշնակցութեան տեղն ու դերը Արցախի պետականութեան վերակերտման մէջ» խորագիրը կրող գիտաժողովին փուլ առ փուլ ներկայացուեցաւ Դաշնակցութեան 130 տարուան գործունէութեան տարբեր դրուագներ:
Գիտաժողովին բացման խօսքով հանդէս եկաւ Հ.Յ.Դ. Արցախի Կեդրոնական կոմիտէի ներկայացուցիչ Դաւիթ Իշխանեան, որ իր խօսքին մէջ յայտնեց, որ գիտաժողովը միջոց է անցեալը նորէն արժեւորելով ներկայ ու ապագայ կատարելիքներուն շուրջ խորհրդածելու` շեշտելով, որ Դաշնակցութեան պատմութիւնը անքակտելի կապերով միահիւսուած է հայ ժողովուրդի անցեալի ու ներկայի պատմութեան, որովհետեւ ժողովուրդի ծոցէն ծնած կուսակցութիւնը պէտք է ծառայէ իրեն երկնողին` ժողովուրդին, հակառակ բոլոր ժամանակներու Դաշնակցութեան պատմութիւնը ու վարքագիծը խեղաթիւրել փորձող ու պատմութեան քառուղիներուն վրայ յաճախ իրենց հետքը չձգած ուժերուն:
Իշխանեան շեշտեց, որ Արցախը Դաշնակցութեան կենարար զարկերակն է, անիկա կը սնուցանէ կուսակցութեան նպատակները, անիկա գաղափարախօսութիւն է եւ անշեղելի Հ.Յ.Դ.-ի որդեգրած ուղիէն:
«Տակաւին 1917-1920 թուականներուն Դաշնակցութիւնը, չճանչնալով Ատրպէյճանի գերիշխանութիւնը, էական դեր խաղաց արցախահայութեան կեանքին մէջ եւ հիմքը դրաւ Արցախի առաջին ժողովրդավարական կառավարութեան` միաժամանակ ամրապնդելով տեղական իշխանութիւնները, երկրամասի ինքնապաշտպանութիւնը, լուծելով կենսական նշանակութեան հարցեր:
«Արցախը, որպէս միացեալ Հայաստանի անբաժանելի մաս, միշտ ալ եղած է պահանջատիրութեան առանցք եւ զգայուն կէտ: Ատիկա կ՛ապացուցեն դէպքերն ու դէմքերը, տարբեր պատմաբաններու վկայախօսութիւնները, որոնք միշտ կը մնան մեր պատմութեան էջերուն մէջ, ատիկա կ՛ապացուցէ Արցախի համար վճռորոշ ժամանակահատուածը` Արցախեան ազատամարտը, որուն ընթացքին Հ.Յ.Դ.-ն ձեռնամուխ եղաւ զէնք ու զինամթերք հասցնելու, ինքնապաշտպանական ուժեր կազմաւորելու եւ ռազմական փայլուն գործողութիւններ իրականացնելու գործին` ասպարէզ բերելով գաղափարի մարտիկներու ամբողջ աստղաբոյլ մը, որոնք կրցան դառնալ Արցախի նորօրեայ պատմութեան կերտողները», դիտել տուաւ Իշխանեան:
Ան վերյիշեցուց, որ 30 տարիներ անցած են այդ խռովայոյզ օրերէն, երբ Հ.Յ. Դաշնակցութիւնը վերադարձաւ Արցախ` որպէս զինուոր, որպէս մշակ, որպէս հայրենիքի ազատութեան գինը գիտցող կուսակցութիւն: Վերադարձաւ, որ այլեւս չհեռանայ:
Ան յոյս յայտնեց, որ գիտաժողովը դարձեալ կը համախմբէ մեր միտքն ու գործը` յանուն այն ապագայի, որուն դաւանողը միայն Դաշնակցութիւնը չէ, այլ իւրաքանչիւր անձ, որ մտահոգ ու պատրաստակամ է անցածը անաչառօրէն արժեւորելու եւ ապագայի համար ամուր հիմքեր կառուցելու:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Արցախի Ազգային Ժողովի Ընտրութիւններ․- Հ.Յ. Դաշնակցութեան Ընտրական Ցանկը
Next post ՀԱՆՐԱՔՈՒԷՆ ԻՆՔՆԱԴՐՍԵՒՈՐՈՒԵԼՈՒ ԵՒՍ ՄԷԿ ԱՌԻԹ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles