ՆԻՒ ԵՈՐՔ․- ՏԱԿԼԸՍԹԸՆԻ ՍՈՒՐԲ ՍԱՐԳԻՍ ԵԿԵՂԵՑՒՈՅ ԱՆՈՒԱՆ ՏՕՆԱԽՄԲՈՒԹԻՒՆԸ

Առաջնրոդ Սրբազան Հայրն ու հոգեւոր հովիւը՝ Ս. Սարգիս եկեղեցւոյ հոգաբարձութեան հետ

Կիրակի, Փետրուար 9-ին, Նիւ Եորքի Տակլըսթըն շրջանի Սուրբ Սարգիս եկեղեցւոյ համայնքը տարբեր օր մը ապրեցաւ՝ եկեղեցւոյ անուան տօնը ըլլալով ։ Ս. Պատարագը մատուցեց Ա․Մ․Ն․ արեւելեան թեմի բարեջան առաջնորդ՝ Անուշաւան Արքեպիսկոպոս։ Իր քարոզին մէջ, ան կեդրոնացաւ Սուրբ Սարգիս Զօրավարի առաքինութիւններուն վրայ՝ հաւատք, քաջութիւն եւ անձնազոհութիւն, յորդորելով, որ խորհրդածենք ու ներառնենք զանոնք մեր կեանքէն ներս։ Ապա տեղի ունեցաւ արուեստագէտ Ռուտիկ Պետրոսեանի պատրաստած Սրբոց Վարդանանց նոր սրբապատկերի օրհնութիւնը։

Ս. Սարգիս եկեղեցւոյ վերանորոգ «Չատրճեան» սրահի բացումը

Եկեղեցին այլ նորութիւն մըն ալ ունէր ծուխին համար՝ նորոգուած գլխաւոր սրահին բացումը։ Ժողովուրդը վայելեց զայն ճաշկերոյթով մը, կազմակերպուած՝ եկեղեցւոյ Տիկնանց Յանձնախումբին կողմէ։ Հանդիսավարութիւնը կատարեց եկեղեցւոյ հոգաբարձուներէն՝ Սիմոն Պարտիզպանեան։ Ճաշկերոյթի կոկիկ գեղարուեստական յայտագրին մաս կազմեցին Գարինա Վարդանեան՝ հայկական ու միջազգային երգերու փունջով մը, եւ ջութակահար Արսէն Կէտիկեան։ Եկեղեցւոյ հոգաբարձութեան ատենապետ՝ պրն. Հէրի Սէօյլէմէզեան, ջատագովեց եկեղեցւոյ տարբեր ծրագիրները ու հրաւիրեց ներկաները մասնակցելու ընթացիկ Աստուածաշունչի սերտողութեան ու նոր սկիզբ առած պարի դասերուն, զանոնք նախապատրաստելով եկեղեցւոյ 30-ամեակի տօնախմբութեան, որ տեղի պիտի ունենայ Մայիսին։

Անուշաւան Արքեպիսկոպոս, Նարեկ քհն. Թրթռեան, սրբապատկերի բարերարներ՝ տէր եւ տիկ. Գառնիկ եւ Ալիս Ալաճաճեան, նկարիչ Ռուտիկ Պետրոսեան եւ եկեղեցւոյ խորանի ծառայողներ

Եկեղեցւոյ հովիւ՝ Տ. Նարեկ քհն. Թրթռեան, շնորհակալութիւն յայտնեց Տիկնանց Յանձնախումբին՝ ճաշկերոյթի պատրաստութեան համար, տէր եւ տիկ. Գառնիկ եւ Ալիս Ալաճաճեաններուն՝ որպէս բարերարները նոր սրբապատկերին, եւ եկեղեցւոյ հոգաբարձութեան, որ անխոնջ աշխատանք տարած էր եկեղեցւոյ կառոյցի նորոգութեան համար։ Տէր Հայրը յատուկ շնորհակալութեան արժանացուց Գառնիկ Մինասեանը, որ ղեկավարեց ու մօտէն հետեւեցաւ սրահի նորոգութեան։ Առաջնորդ Սրբազան Հայրը՝ Մինասեանը գնահատեց պատուոյ գիրով։ Գառնիկ Մինասեան իր կարգին շնորհակալութեան խօսք ըսաւ ու յիշեց, որ եկեղեցւոյ իր նուիրուածութիւնը ժառանգած է իր մօրմէն, ու երախտապարտ է յատկապէս անոր համար, որ իր երկու զաւակները հասակ առած են եկեղեցւոյ մէջ։

Առաջնորդ Սրբազան Հայրը եւ Տէր Հայրը՝ պրն. Գառնիկ Մինասեանի եւ իր ընտանիքին հետ

Հանդիսութիւնը աւարտեցաւ Սրբազան Հօր քաջալերական խօսքերով ու յորդորներով, որ ծխականները շարունակեն զօրաւոր կանգնիլ իրենց հայ քրիստոնեայի հաւատքին վրայ՝ Սուրբ Սարգիս եկեղեցիէն ներս։

Ա․Մ․Ն․ արեւելեան թեմի բարեջան առաջնորդ՝ Անուշաւան Արքեպիսկոպոս եւ․․․
Նարեկ քհն. Թրթռեան կ՚օրհնեն նոր օծուած Ս. Վարդանանց սրբապատկերը

 

 

 

 

Be the first to comment

Leave a Reply

Your email address will not be published.


*