Սուրիոյ Խորհրդարանը Ճանչցաւ Հայոց Ցեղասպանութիւնը

Բանաձեւին մէջ կը նշուի․- «Սուրիական Արաբական Հանրապետութեան խորհրդարանը, հինգշաբթի, 13 փետրուար 2020-ին իր գումարած նիստին ընթացքին կը ճանչնայ եւ կը դատապարտէ 20-րդ դարու սկիզբը Օսմանեան կայսրութեան ծրագրած եւ իրագործած Հայոց ցեղասպանութիւնը։
«Խորհրդարանը կը դատապարտէ ցեղասպանութեան ուրացման եւ պատմութեան նենգափոխման իւրաքանչիւր փորձ եւ կը հաստատէ, որ Հայոց ցեղասպանութիւնը մարդկութեան դէմ ի գործ դրուած ամէնէն դաժան ոճիրն է։

«Խորհրդարանը կը բաժնեկցի հայ բարեկամ ժողովուրդին ցաւը եւ կը հաստատէ, որ Սուրիոյ ժողովուրդին բաղադրիչներուն մաս կազմող հայեր, ասորիներ, սուրիանիներ եւ այլ ազգեր այդ տարիներուն զոհը դարձան օսմանցի թուրքերուն կողմէ ծրագրուած եւ իրագործուած ցեղասպանութեան։

«Խորհրդարանը կոչ կ՛ուղղէ աշխարհի խորհրդարաններուն եւ միջազգային ընտանիքին՝ ճանչնալու եւ դատապարտելու Հայոց ցեղասպանութիւնը»։

Սուրիոյ խորհրդարանի քարտուղար Ռամի Սալեհ յայտնեց, որ խորհրդարանը նախապէս արծարծած էր Հայոց Ցեղասպանութեան հարցը եւ յարգանքի տուրք մատուցած հայ զոհերուն, սակայն անհրաժեշտ էր ցեղասպանութիւնը դատապարտող որոշում գոյացնել։ Այս իսկ պատճառով այսօր բանաձեւը քննարկուեցաւ։

Սուրիոյ խորհրդարանի երեսփոխան դոկտ. Նորա Արիսեան դիտել տուաւ, որ աւելի քան 30 երկիրներու խորհրդարաններ ճանչցած եւ դատապարտած են Հայոց Ցեղասպանութիւնը, Սուրիոյ խորհրդարանին մէջ նախապէս մէկէ աւելի երեսփոխաններու կողմէ արծարծուած է այս նիւթը, իսկ 2015-ին, Հայոց Ցեղասպանութեան 100-ամեակին առիթով, խորհրդարանը յատուկ նիստով յարգանքի տուրք մատուցած է Հայոց Ցեղասպանութեան զոհերուն։

Հ․Հ․ մէջ Սուրիոյ դեսպան Մուհամմէտ Հաժ Իպրահիմ կարեւոր համարելով ճանաչումը դիտել տուաւ, որ Հայոց Ցեղասպանութիւնը գործողներուն ժառանգորդները այսօր նոյն ոճիրները կը գործեն Սուրիոյ ժողովուրդին նկատմամբ, ահաբեկիչներու ձեռամբ։ Ան յայտնեց, որ ճանաչումը կարեւոր է, որովհետեւ արաբական երկիրներու մէջ ցարդ միայն Լիբանանը ճանչցած է Հայոց Ցեղասպանութիւնը։ Խորհրդարանի արաբական եւ արտաքին հարցերու յանձնախումբի նախագահ Պութրոս Մրժենէ շեշտեց, որ Հայոց Ցեղասպանութիւնը պատմական իրողութիւն է, անոր յաջորդեց նաեւ Սուրիոյ հիւսիսային սահմաններուն վրայ ասորիներուն եւ սուրիանիներուն սպանդը։

Be the first to comment

Leave a Reply

Your email address will not be published.


*