Հայաստան Այցելեց Յորդանանի Ապտալլահ Բ․ Թագաւորը


ԵՐԵՒԱՆ․- Փետրուար 10-ին, Հ․ Հ․ նախագահ Արմէն Սարգսեանի հրաւէրով, պաշտօնական այցով Հայաստան ժամանեց Յորդանանի թագաւոր, Ապտալլահ Բ․-ը։
Հիւր պատուիրակութեան կազմին մէջ են, անոր եղբայրը՝ Ալի պին Ալ Հուսէյնը, թագաւորի կրօնական ու մշակութային հարցերով խորհրդական եւ անձնական պատուիրակը, արտաքին գործոց նախարարն ու համակարգման հարցերու խորհրդականն ու արդիւնաբերութեան, առեւտուրի եւ մատակարարումներու նախարարը:
Երեւանի «Զուարթնոց» միջազգային օդակայանին մէջ, պատուիրակութեան դիմաւորեց փոխվարչապետ Մհեր Գրիգորեանը:
Նախագահ Արմէն Սարգսեան եւ Յորդանանի թագաւորը հանդիպած էին 2019-ի Ապրիլին Հայաստանի նախագահին` Յորդանան աշխատանքային այցի ժամանակ, որու ընթացքին ալ Հայաստանի նախագահը հրաւիրած էր թագաւորը այցելելու Հայաստան:
Հայաստանի Հանրապետութեան նախագահի նստավայրին մէջ տեղի ունեցաւ դիմաւորման պաշտօնական արարողութիւնը: Զինուորական նուագախումբին կատարումով հնչեցին Յորդանանի Հաշիմեան Թագաւորութեան եւ Հայաստանի Հանրապետութեան պետական օրհներգերը:
Նախագահ Արմէն Սարգսեան եւ թագաւոր Ապտալլահ Երկրորդը պատուոյ պահակախումբի հրամանատարին ուղեկցութեամբ կատարեցին զինուորական նուագախումբի եւ պատուոյ պահակախումբի ստուգայց։ Նախագահն ու թագաւորը իրարու ներկայացուցին երկու երկիրներու պաշտօնական պատուիրակութիւններն ու ընդունած են պատուոյ պահակախումբին քայլերթը:
Հ․Հ․ վարչապետ Նիկոլ Փաշինեան կառավարութեան տան մէջ հիւրընկալեց թագաւորն ու պատուիրակութիւնը։ Ողջունելով՝ վարչապետը յատկապէս նշեց, թէ Յորդանանի հետ յարաբերութիւնները շատ կարեւոր են, քանի որ Միջին Արեւելքն ու Յորդանանը՝ Հայաստանի համար՝ կը համարուի ռազմավարական գործընկերութեան ուղղութիւն: «Մենք արդէն յստակեցուցած ենք արդիւնքները, ունինք քանի մը առանձնայատուկ ուղղութիւն, որոնք երկկողմանի հետաքրքրութիւն կը ներկայացնեն: Ես նաեւ ուրախ եմ, որ Ձեր հետ եկած է գործարարներու պատուիրակութիւն, եւ մենք կը պատրաստուինք ստորագրել յստակ փաստաթուղթ մեր յարաբերութիւնները առաւել լաւացնելու եւ առաւել արդիւնաւէտ դարձնելու համար», ըսաւ վարչապետը:
Ապտալլահ Բ․, իր հերթին, շնորհակալութիւն յայտնեց եւ ըսաւ, թէ երկու երկիրներու միջեւ եղած առանձնայատուկ բարեկամութիւնը պիտի շարունակուի աւելի պայծառ եւ ջերմութեամբ։ «Մենք հպարտ ենք, որ իրարու հետ կիսած ենք պատմութիւնը: Մենք դեռ միասին շատ ընելիքներ ունինք։ Ես շատ լաւատես եմ եւ հիացած եմ Ձեր ընդունելութեամբ»:
Հանդիպման ընթացքին զրուցակիցները քննարկած են հայ-յորդանանեան տնտեսական եւ մարդասիրական յարաբերութիւններու զարգացման վերաբերող շարք մը հարցեր:
Գարեգին Բ. Ամենայն Հայոց Կաթողիկոսը Մայր Աթոռ Սուրբ Էջմիածինի մէջ, Փետրուար 11-ին, հիւրընկալեց թագաւորին։
Զրոյցին ընթացքին Հայոց Հովուապետը գոհունակութեամբ արձանագրեց, որ ցեղասպանութիւն վերապրած հայ ժողովուրդի զաւակները կրցած են վերագտնել իրենց բնականոն կեանքը Յորդանանի մէջ՝ գալիքի հանդէպ յոյսով ու լաւատեսութեամբ իրենց օգտաշատ ներդրումը բերելով երկրի առաջընթացին:
Ամենայն Հայոց Կաթողիկոսը նկատեց, որ Հայաստանի եւ Յորդանանի միջեւ յարաբերութիւնները եւ Յորդանանի հայ համայնքի կեանքը կրլզն եղբայրութեան եւ խաղաղ համակեցութեան լաւագոյն օրինակը ըլլզլ շատ ազգերնւ համար՝ քրիստոնէութիւն-իսլամ եւ այլ միջկրօնական յարաբերութիւններու կառուցման գործին մէջ:
Իր հերթին, Ապտալլահ Բ․ ուրախութիւն յայտնեց հանդիպման առիթով՝ անդրադառնալով մասնաւորաբար քրիստոնեայ ու իսլամ ժողովուրդներու փոխյարաբերութիւններուն եւ այդ առնչութեամբ իր նախնիներուն դաւանած համոզումներուն մասին։
Անդրադառնալով հայ համայնքի կարեւոր դերակատարութեան Յորդանանի եւ Մերձաւոր Արեւելքի երկիրներուն մէջ՝ թագաւորը յոյս յայտնեց, որ Հայաստանի հետ կապերու զարգացումով պիտի զօրանայ նաեւ Յորդանանի հայ համայնքը։ Յորդանանի թագաւորը վերահաստատեց նաեւ իր պատրաստակամութիւնը՝ շարունակելու զօրակցութիւնը Հայոց Եկեղեցիին եւ Երուսաղէմի Հայոց Պատրիարքութեան։

Be the first to comment

Leave a Reply

Your email address will not be published.


*