Ֆրանսահայ Կազմակերպութիւնները Համակարգող Խորհուրդի Տարեկան Ընթրիքը՝ Մասնակցութեամբ Նախագահ Մաքրոնի 

ՓԱՐԻԶ ․- Չորեքշաբթի, Յունուար 29-ի երեկոյեան Փարիզի շքեղ պանդոկներէն «Collectionneur»-ի մէջ տեղի ունեցաւ Ֆրանսահայ կազմակերպութիւնները համակարգող խորհուրդի՝ 7-րդ տարեկան հիւրասիրութիւն – հաւաքը, որուն ներկայ էին Հանրապետութեան նախագահ Էմանուէլ Մաքրոնը, ինչպէս նաեւ պետական, շրջանային եւ քաղաքական բազմաթիւ անձնաւորութիւններ, ծանօթ լրագրողներ, արուեստագէտներ:

Նախագահ Մաքրոն ըսաւ թէ Ֆրանսան Արցախի հիմնահարցի լուծման խաղաղ բանակցութիւններու շարունակման գլխաւոր երաշխաւորներէն է:

«Լեռնային Ղարաբաղի տագնապի լուծման գործին մէջ Ֆրանսան իր դերակատարութիւնը ունի ԵԱՀԿ-ի Մինսքի խմբակի համանախագահութեան ծիրին մէջ եւ խաղաղ բանակցութիւններու շարունակման գլխաւոր երաշխաւորներէն է։ Ֆրանսան ուղղակի պարտաւոր է ըլլալ Հայաստանի կողքին` հաշուի առնելով հազարամեայ ազգի շատ երիտասարդ պետութեան ուժերով ստեղծուած ժողովրդավարութիւնն ու այն յաջողութիւնները, որոնք հիմա արձանագրուած են շնորհիւ վերջին յեղափոխութեան», յայտնեց Ֆրանսայի նախագահը:

Հ.Յ.Դ. Բիւրոյի ներկայացուցիչ Յակոբ Տէր Խաչատուրեան եւ նախագահ Մաքրոն

Ան աւելցուց, որ հաղորդակցութեան մէջ է Հայաստանի Հանրապետութեան վարչապետ Նիկոլ Փաշինեանի եւ Ատրպէյճանի նախագահ Իլհամ Ալիեւի հետ, եւ շեշտեց, թէ լարուածութեան մեղմացման կարեւոր քայլերէն է Հայաստանի Հանրապետութեան վարչապետին եւ Ատրպէյճանի նախագահին միջեւ գործնական կապի ապահովումը:

Նշենք, թէ Ֆրանսայի հայկական կազմակերպութիւններու համակարգող խորհուրդի տարեկան ընթրիքի մեկնարկին ներկաները մէկ վայրկեան լռութեամբ յարգանքի տուրք մատուցած են Ֆրանսայի նախկին նախագահ Ժաք Շիրաքի յիշատակին:

Իբրեւ պատուաւոր հիւր ձեռնարկին մասնակցեցաւ նաեւ թուրք յայտնի պատմաբան Թաներ Աքչամը։ Նախագահ Մաքրոն ողջունեց Աքչամը` Հայոց ցեղասպանութեան ժխտումը դատապարտելուն համար, աւելցնելով, թէ Աքչամի «Սպանութեան հրամաններ» գիրքը «ակնյայտօրէն կազմակերպուած եւ կանխամտածուած յանցագործութեան գիտական հաստատումն է: Դուք բացայայտեցիք այն, ինչ որ ոմանք կ՛ուզէին մոռացութեան մատնել` ցեղասպանութեան ժխտումը: Ատիկա հիմնաքարն է թուրք քաղաքական ղեկավարներու հետ քաղաքական բանավէճերուն։ Մենք մեծ պատմութիւնները կեղծիքի, վերախմբագրման կամ ժխտողականութեան քաղաքականութեան վրայ չենք կառուցեր», յայտնեց Մաքրոն` դատապարտելով Թուրքիոյ այն ռազմավարութիւնը, որ ուղղուած է Միջին Արեւելքի մէջ նոր ծաւալապաշտութեան, յանցագործութիւններու ժխտման եւ ձգտման` կրկին ձեռք բերելու անցեալին ունեցած ուժը:

diner de gala ccaf 29 janvier 2020

Մաքրոն ընդգծեց, որ Թուրքիան իր քաղաքական հիմը դարձուցած է պատմութեան վերախմբագրումը: «Ոչ մէկ մեծ պետութիւն կը կերտուի սուտի, ժխտողականութեան եւ պատմութեան վերախմբագրման հիման վրայ։ Պայքարը, որ հայերը կը մղեն Ցեղասպանութեան ճանաչման համար, պայքար է նաեւ լռութեան, մոռացութեան դէմ, իսկ ճշմարտութեան հարցին մէջ գոյութիւն ունի եղբայրութիւն` հայ եւ ֆրանսացի ժողովուրդներուն միջեւ», եզրակացուց Մաքրոն:

Be the first to comment

Leave a Reply

Your email address will not be published.


*