ՆՇՈՒԵՑԱՒ ՀԱՅՈՑ ԲԱՆԱԿԻ 28-ԱՄԵԱԿԸ

Հայոց բանակի կազմաւորման 28-րդ տարեդարձին առիթով, տեղի ունեցան հանդիսութիւններ եւ ձեռնարկներ։

Հայաստանի բարձրագոյն ղեկավարութիւնը այցելեց «Եռաբլուր» զինուորական պանթէոն, ուր յարգանքի տուրք մատուցեց հայրենիքի անկախութեան համար իրենց կեանքը զոհաբերած հերոսներուն յիշատակին:

«Եռաբլուր» զինուորական պանթէոն այցելեցին Հայաստանի նախագահ Արմէն Սարգսեան, վարչապետ Նիկոլ Փաշինեան, Ազգային ժողովի նախագահ Արարատ Միրզոյեան, Ամենայն հայոց Գարեգին Բ. կաթողիկոս, պաշտպանութեան նախարար Դաւիթ Տօնոյեան, փոխվարչապետ Տիգրան Աւինեան, Անվտանգութեան խորհուրդի քարտուղար Արմէն Գրիգորեան եւ բարձրաստիճան այլ պաշտօնեաներ:

Բարձրաստիճան այրերը ծաղիկներ զետեղեցին Ապրիլեան պատերազմին զոհուած հերոսներուն, սպարապետ Վազգէն Սարգսեանի, զօրավար Անդրանիկի շիրիմներուն, Արցախեան պատերազմին զոհուած ազատամարտիկներու ու զինուորներու յիշատակը յաւերժացնող յուշակոթողին:

Հ․Հ․ նախագահ Արմէն Սարգսեան բանակի օրուան առիթով նախագահական նստավայրին մէջ կայացած հանդիսութեան ընթացքին մետալներ եւ շքանշաններ յանձնեց հայրենիքի պաշտպանութեան գործին նուիրուած զինուորներուն:

Հ․Յ․Դ․ Հայաստանի Գերագոյն մարմինը ուղղեց շնորհաւորական ուղերձ մը` շեշտելով, որ Հայաստանի զինուած ուժերու կազմաւորումը հայ ժողովուրդի պատմութեան շրջադարձային էջերէն մէկն է, հայոց նորանկախ երկու հանրապետութիւններու սահմաններու անվտանգութեան ապահովման եւ հետագայ վերելքի առանցքային գրաւականը:

Հ․Յ․Դ․ Հայաստանի Գերագոյն մարմինի անդամներ Արծուիկ Մինասեան, Լիլիթ Գալստեան, Աշոտ Սիմոնեան, Տարօն Տօնոյեան, Գերագոյն մարմինի նախագահ Սիմոն Սիմոնեան, բազմաթիւ դաշնակցականներ, Հ․Յ․Դ․ Հայաստանի երիտասարդական եւ «Նիկոլ Աղբալեան» ուսանողական միութիւններու անդամներ եւ այլն: Հ․Յ․Դ․ ներկայացուցիչները ծաղկեպսակ զետեղեցին Եռաբլուր պանթէոն յուշարձանին առջեւ, ծաղիկներ` զոհուած ընկերներու շիրիմներուն:

Արցախի Հանրապետութեան նախագահ Բակօ Սահակեան Հայ առաքելական եկեղեցւոյ Արցախի թեմի առաջնորդ Պարգեւ արք. Մարտիրոսեանի եւ երկրի բարձրաստիճան պաշտօնեաներուն ընկերակցութեամբ այցելեց Ստեփանակերտի յուշահամալիր:

Be the first to comment

Leave a Reply

Your email address will not be published.


*