Քարինտակի Հերոսամարտի 28-Ամեակ 

28 տարի առաջ` Յունուար 26, 1992-ին տեղի ունեցած է Քարինտակի հերոսամարտը: Շուշիէն առաւօտեան ժամը 5:45-ին թշնամին անցած էր յարձակման։

Քարինտակին օգնութեան հասան դրացի գիւղերու բնակիչները:

Թուաքանակով եւ զէնք-զինամթերքով քանի մը անգամ գերազանցող թշնամին ետ շպրտուեցաւ, գիւղի շրջակայքը ձգելով 130-է աւելի սպաննուածներ։ Ջարդուեցաւ Պաքուէն ժամանաած գումարտակը, քանի մը տասնեակ զոհեր տուաւ նաեւ Շուշիի գումարտակը: Այստեղ նաեւ ոչնչացուեցաւ Ատրպէյճանի բանակի հետախուզութեան պետի տեղակալի գլխաւորութեամբ յատուկ պատրաստուած 11 հոգիէ ջոկատը:

Եւ պատահական չէ, որ այդ օրը մեծ շուքով կը նշուի գիւղին մէջ: Քարինտակի մէջ կազմակերպուած հանդիսաւոր ձեռնարկին մասնակիցները ծաղիկներ զետեղեցին նահատակուած քարինտակցիներու յիշատակը յաւերժացնող յուշակոթողին, այնուհետեւ ելոյթ ունեցան գիւղապետ Մխիթար Առուշանեան, Շուշիի քաղաքապետ Արծուիկ Սարգսեան, Քարինտակի ակումբի վարիչ Ալվարդ Գասպարեան, դպրոցականներ, Արցախի Հանրապետութեան պաշտպանութեան բանակի «Ասպետ» համոյթը:

Քարինտակի հերոսամարտի 28-ամեակի ձեռնարկին ներկայ էին Շուշիի շրջանի վարչակազմի ղեկավար Վլատիմիր Կասեան, Արցախի Ազգային ժողովի փոխնախագահ Վահրամ Բալայեան, Հ․Յ․Դ․ Արցախի Կեդրոնական կոմիտէի ներկայացուցիչ Դաւիթ Իշխանեան, պաշտօնատար այլ անձեր, զինուորականներ, քարինտակցիներ:

Հերոսամարտի օրը գիւղի ջոկատի տղաքը բնակչութենէն եւ դրացի գիւղերու ջոկատներու տղոցմէ հայերը տուին 21 զոհ: Քարինտակի գիւղապետ Մխիթար Առուշանեանի համաձայն, անոնք դարձան այն հերոսները, որոնք կ՛ապրին նաեւ մահէն ետք, անոնց ապրած ամէն օրը հայրենասիրութեան ոգի է:

«Այսօր մենք կ՛ոգեկոչենք յիշատակը բոլոր անոնց, որոնք մարտնչած են յանուն հայրենիքի, յանուն ներկայ ու ապագայ սերունդներու: Այսօր մենք հաւաքուելով այստեղ կարեւոր կը նկատենք օրուան խորհուրդը` մեր յաղթանակները կարելի դարձան մեր քաջորդիներու բարձր ոգիին շնորհիւ: Բառերն ու արտայայտութիւնները ի զօրու չեն արտայայտելու այն յուզմունքը, հպարտութիւնն ու հայրենասիրական զգացումները, որոնք այսօր կան մեր սրտերուն մէջ», նշեց Քարինտակի գիւղապետը:

Շուշիի քաղաքապետ Արծուիկ Սարգսեանի համաձայն, 28 տարի առաջ այս օրը Քարինտակի մէջ տեղի ունեցաւ զինուորական առումով անհաւանական գործողութիւն: Հայ ժողովուրդի պատմութեան մէջ Յունուար 26-ը ամրագրուեցաւ իբրեւ Քարինտակի հերոսամարտի օր, իսկ Ազրպէյճանը, նոյն օրը ունեցած հարիւրաւոր զոհերու քանակէն եւ խայտառակ պարտութենէն մեկնելով, անիկա անուանեց «Արիւնոտ յունուար», իսկ Քարինտակը` «Արիւնոտ ձոր»:

Ձեռնարկի աւարտին Արցախի Հանրապետութեան պաշտպանութեան նախարար, զօրավար Կարէն Աբրահամեանի հրամանով շարք մը քարինտակցիներ պարգեւատրուեցան:

 

Be the first to comment

Leave a Reply

Your email address will not be published.


*