Վարդինէ Օհանեան-Գէորգեան` Լիբանանի Նորակազմ Կառավարութեան Երիտասարդութեան Եւ Մարմնակրթութեան Նախարար

ՊԷՅՐՈՒԹ․- Յունուար 21-ին կազմուեցաւ Լիբանանի կառավարութիւնը, ամիսներ շարունակ կազմալոյծ վիճակ մը ունենալէ ետք։ Վարչապետ Հասսան Տիապի կազմած քսան անդամներէ բաղկացած կառավարութեան մաս կը կազմէ Վարդինէ Օհանեան-Գէորգեան, որ ստանձնած է երիտասարդութեան եւ մարմնակրթութեան նախարարի պաշտօնը։

Վարդինէ Օհանեան-Գէորգեան ծնած է Յունուար 1, 1984-ին եւ յաճախած՝ ազգային «Եղիշէ Մանուկեան» վարժարան։ Ան երկրորդական ուսումը ստացած է ազգային «Լեւոն եւ Սոֆիա Յակոբեան» վարժարանին մէջ, աւարտած է Լիբանանեան համալսարանի ընկերային գիտութիւններու բաժանմունքը: Ան ունի մագիստրոսի աստիճան` ընկերային հոգեբանութեան մէջ, Լիբանանեան համալսարանէն: Նաեւ ունի «Ծրագիրներու կառավարման» վկայական` «Հայկազեան» համալսարանէն:

2017-էն մինչեւ այսօր տնօրէն է «Զուարթնոց» յատուկ դաստիարակութեան կեդրոնի: 2013-էն 2017 եղած է նոյն կեդրոնի ընկերային ծառայողը: 2007-էն 2008 իբրեւ ընկերային ծառայող աշխատած է Լիբանանի Հայոց թեմի ազգային առաջնորդարանին մէջ: 2005-էն 2008 եղած է «Թռչնոց բոյն»-ի ընկերային ծառայողը: Ամուսնացած է եւ ունի երկու զաւակ: Անդամակցած է Հ․Մ․Ը․Մ․-ին եւ ստանձնած՝ զանազան պարտականութիւններ:

Չորեքշաբթի, Յունուար 22-ին, Մեծի Տանն Կիլիկիոյ Արամ Ա. Վեհափառ Հայրապետին այցելեց  Վարդինէ Օհանեան-Գէորգեանը, ընկերակցութեամբ հայ երեսփոխանական պլոքի պետ՝ Յակոբ Բագրատունիին:

 

Be the first to comment

Leave a Reply

Your email address will not be published.


*