ՆԻՒ ԵՈՐՔ․- ԱԶԳԱՅԻՆ ԱՌԱՋՆՈՐԴԱՐԱՆԻ ՍՈՒՐԲ ԾՆՆԴԵԱՆ ՀԻՒՐԱՍԻՐՈՒԹԻՒՆԸ

ՆԻՒ ԵՈՐՔ․- Երկուշաբթի, Յունուար 6-ի երեկոյեան, Ազգային Առաջնորդարանի «Վահագն եւ Յասմիկ Յովնանեան» սրահին մէջ տեղի ունեցաւ Սուրբ Ծննդեան աւանդական ընդունելութիւնը եւ Տնօրհնէքը։

Թեմի Բարեջան Առաջնորդ՝ Գերշ. Տ. Անուշաւան արք. Դանիէլեան ողջունեց ներկաները եւ խօսեցաւ այս նոր տարուան առիթով իր ունեցած ակնկալութիւններուն ու յոյսերուն մասին։ Առաջնորդ Սրբազան Հայրը շնորհակալութիւն յայտնեց կարգ մը հիւրերու՝ Առաջնորդարանին եւ իրենց ծուխերուն հանդէպ ցուցաբերած աջակցութեան եւ նուիրումին համար։ Միաժամանակ, ան ներկայացուց տիար Ալպերթ Գէորգեանը, որ օրեր առաջ ժամանած էր իբրեւ նոր նշանակուած խորհրդական Մ․Ա․Կ․-ի մօտ Հայաստանի Հանրապետութեան ներկայացուցչութեան։

Սրբազան Հայրը յայտարարեց, թէ պիտի վերահաստատուի Սուրբ Լուսաւորիչ Մայր Եկեղեցի ամենամեայ ուխտագնացութիւնը՝ վերջերս անտեսուած աւանդութիւն մը վերականգնելու ճիգով։ Ան յայտնեց նաեւ, թէ այս տարի պիտի նշուի Մեծի Տանն Կիլիկիոյ Կաթողիկոս Արամ Ա.-ի ընտրութեան 25-ամեակը։ Վեհափառ Հայրապետը պիտի այցելէ Միացեալ Նահանգներ՝ հովուապետական այցելութեամբ, որուն մաս պիտի կազմէ Հայրապետական Սուրբ Պատարագի մատուցումը՝ Մայր Եկեղեցւոյ մէջ։

«2020 տարին, իսկապէս, բոլորիս համար որոշադրիչ տարի մըն է։ Մենք պիտի տօնախմբենք 105ամեակը ցեղասպանութենէ յարութիւն առած մեր ժողովուրդին… մենք դատապարտուած էինք անապատին մէջ ոսկոր դառնալու եւ ապա մոխիր եւ փոշի դառնալու, բայց Աստուծոյ նախախնամութիւնը՝ Եզեկիէլի ոգիով, ոսկորներէն յարութիւն տուաւ մեր ժողովուրդին եւ ահաւասիկ մենք այստեղ ենք», ըսաւ Բարեջան Առաջնորդը։

Սրահին ջերմ մթնոլորտը աւելի եւս շէնցուցած էին բազմաթիւ հիւրերը, որոնք եկած էին յայտնելու իրենց խնդակցութիւնը՝ տօնական օրերու առիթով, եւ իրենց զօրակցութիւնը Առաջնորդարանի աշխատանքներուն։ Ընդունելութեան սկիզբ տրուեցաւ Տնօրհնէքի արարողութեամբ, զոր կատարեց Նիւ ԵորքիՍուրբ Լուսաւորիչ Մայր Եկեղեցւոյ հոգեւոր հովիւ՝ Արժ. Տ. Մեսրոպ քհն. Լագիսեան։

Յայտագրի աւարտին, խոստմնալից պատանի երգչուհի՝ Անահիտ Ինճիկիւլեան իր գեղեցիկ ձայնով հիացուց ներկաները, մեկնաբանելով «Աւէ Մարիա», «Քէլէ-քէլէ» եւ «Քրիստոս ծնաւ եւ յայտնեցաւ» երգերը, որոնցմէ վերջինին մէջ անոր ընկերացաւ՝ թենոր երգիչ Վաղարշակ Օհանեան, որ միաժամանակ դաշնակով կ՚ընկերանար Ինճիկիւլեանի երգեցողութեան։

Առաջնորդական փոխանորդ՝ Գերպ. Տ. Սահակ Ծ. վրդ. Եմիշեանի սեղանօրհնութենէն ետք, տեղի ունեցաւ ճոխ հիւրասիրութիւն։

Նշենք, թէ նաեւ Երկուշաբթի, Յունուար 6-ին, Առաջնորդ Գերշ. Տ. Անուշաւան արք. Դանիէլեան Սուրբ Պատարագ մատուցանեց ու նախագահեց Ջրօրհնէքի արարողութեան Նիւ Եորքի Սուրբ Լուսաւորիչ Մայր Եկեղեցւոյ մէջ, կնքահայրութեամբ` Յակոբ Արի Մախուլեանի, որդին՝ տէր եւ տիկ. Ռաֆֆի եւ Հերա Մախուլեաններու։

Սուրբ Ծննդեան պատարագին ներկայ էր Հայաստանի Հանրապետութեան ՄԱԿի ներկայացուցչութեան խորհրդական՝ Ալպերթ Գէորգեան։ Նոյն երեկոյեան, ան ներկայ եղաւ Ազգային Առաջնորդարանի Սուրբ Ծննդեան ընդունելութեան։

Յաւարտ Սուրբ Պատարագի, հաւատացեալները հիւրասիրուեցան «Ճոն Բաշալեան» սրահին մէջ։

 

Be the first to comment

Leave a Reply

Your email address will not be published.


*