ՓՐՈՎԻՏԵՆՍԻ ՍՈՒՐԲ ՎԱՐԴԱՆԱՆՑ ԵԿԵՂԵՑՒՈՅ ԿԱԶՄԱԿԵՐՊԱԾ ԱՒԱՆԴԱԿԱՆ «ԱՐՄԻՆԻԸՆ ՖԵՍԹ»-Ը

 


Փրովիտէնսի Սուրբ Վարդանանց եկեղեցին, անգամ մը եւս կազմակերպեց աւանդական «Արմինիըն Ֆեսթ»-ը։ Տարիքով մեծ թէ փոքր, հայ թէ ոչ-հայ, ժամանած էին աշխարհագրական ընդարձակ գօտիէ մը՝ Նիւ Հէմշիրէն մինչեւ Ֆլորիտա եւ Ճորճիայէն մինչեւ Շիքակօ։ Ռոտ Այլընտ նահանգի ամենամեծ ազգային փառատօնին մէջ, անոնք վայելեցին լաւագոյն ճաշերը։ Դիտեցին Համազգայինի «Արցախ» պարախումբի եւ «Մուրատ» ազգային վարժարանի աշակերտներուն ու շրջանաւարտներուն պարերը, եւ ունկնդրեցին տեղացի երաժիշտներու հայկական նուագը։

Ներկաները հայկական հագուստներ, գիրքեր ու ձեռագործներ գնեցին, եւ պատմական աննման ցուցադրութիւն մը դիտեցին։ Տեղի ունեցան ժամական վիճակահանութիւններ, գործածուած իրերու վաճառք, լուռ աճուրդ եւ այլ ձեռնարկներ։ Կազմակերպիչներուն կ՚օժանդակէին խորանի ծառայողները, Հ․Մ․Ը․Մ․-ի սկաուտները եւ Հ․Ե․Դ․-ի կրտսերները՝ սեղաններու մաքրութեան եւ այլ գործերու համար։ Երկօրեայ ձեռնարկը կը ծանուցուէր ընկերային ցանցի, ձայնասփիւռի եւ հեռատեսիլի միջոցաւ։Անուշեղէններու բաժնին առջեւ շարքը միշտ ալ երկար էր։

«Արմինիըն Ֆեսթ»-ի Կիրակի օրը, առաջին անգամ ըլլալով, ամերիկեան Վեթերաններու Օրուան առիթով յատուկ արարողութիւն մը տեղի ունեցաւ։ Ալիշա Ֆիլիփսի եւ Շանթ Եղեանի առաջնորդութեամբ, բոլոր մասնակիցները ամերիկեան օրհներգը երգեցին։ Այնուհետեւ, Սուրբ Վարդանանց եկեղեցւոյ հոգեւոր հովիւ՝ Տ. Գաբրիէլ քհն. Նազարեան, օրհնութիւնը կատարեց եւ աղօթեց բոլոր վեթերաններուն համար։

Be the first to comment

Leave a Reply

Your email address will not be published.


*