ՈՒՍՏԸՐԻ ՄԷՋ` ՍԱՐԿԱՒԱԳՆԵՐՈՒ ՀԱՄԱԳՈՒՄԱՐ

Շաբաթ, Նոյեմբերի 16-ին, Ա․Մ․Ն․ արեւելեան թեմի բարեջան առաջնորդ՝ Անուշաւան Արքեպիսկոպոսի եւ Կրօնական Ժողովի հովանաւորութեամբ, տեղի ունեցաւ  Նիւ Ինկլընտի եկեղեցիներուն մէջ ծառայող սարկաւագներու, կիսասարկաւագներու եւ ուրարակիրներու յատուկ միօրեայ համագումար՝ Ուստըրի Սուրբ Երրորդութիւն եկեղեցւոյ հովանիին ներքեւ, անոր հոգեւոր հովիւ՝ Արժ. Տ. Թորգոմ քհն. Չորպաճեանի, ինչպէս նաեւ Նորթ Անտովըրի Սուրբ Գրիգոր եկեղեցւոյ հոգեւոր հովիւ՝ Արժ. Տ. Ստեփան քհն. Պալճեանի ղեկավարութեամբ: Տիկնանց Միութիւնը ստանձնած էր օրուան հիւրասիրութիւնը։

Առաւօտեան ժամերգութենէն ետք, Տ. Թորգոմ Քահանայ վարեց Ս. Գիրքի սերտողութիւն մը, որպէս նշանաբան առնելով՝ Պօղոս Առաքեալի Տիմոթէոսի գրած Ա. նամակէն Գ. գլուխի 8-13 համարները, ուր Պօղոս Առաքեալ կը շեշտէ հաւատարմութեան, սրբութեան եւ ծառայասիրութեան յատկանիշները, զորս պէտք է պահանջել Աստուծոյ Սուրբ Եկեղեցւոյ մէջ սպասարկող բոլոր սարկաւագներէն: Այնուհետեւ, Տէր Հայրը Ս. Պատարագի երգեցողութեան փորձ մը կատարեց մասնակիցներուն հետ եւ գրաբար լեզուի ներածական եւ հիմնական գիտելիքներ դասաւանդեց:

Յետմիջօրէին, Տ. Ստեփան Քահանայ դասախօսեց «Սարկաւագի դերը ծխական կեանքէն ներս» նիւթին շուրջ, ընդգծելով սարկաւագի մը ծառայութեան կարեւոր ու արժէքաւոր կերպերը, մանաւանդ՝ յընթացս Ս. Պատարագի։ Օրուան վերջաւորութեան, Անդրէաս եւ Փիլիպպոս առաքեալներու տօնին առիթով, կատարուեցաւ Կիրակնամուտի ժամերգութիւն։

Be the first to comment

Leave a Reply

Your email address will not be published.


*