Հ.Հ. ՎԱՐՉԱՊԵՏ ՓԱՇԻՆԵԱՆ ԱՅՑԵԼԵՑ Ս. ՂԱԶԱՐ. «ՄԽԻԹԱՐԵԱՆ ՄԻԱԲԱՆՈՒԹԻՒՆԸ՝ ԻՆՔՆՈՒԹԵԱՆ ՏԱՃԱՐ»

Վարչապետ Նիկոլ Փաշինեան Նոյեմբեր 20-ին այցելեց Մխիթարեան Միաբանութեան Սուրբ Ղազարի Մայրավանքը, զայն ողջունելով եւ շեշտելով անոր ունեցած ազգային ու մշակութային գնահատելի դերակատարութիւնը հայ ինքնութեան հասկացողութեան եւ պահպանման ծիրին մէջ, երբ հայրենիքը ի վիճակի չէր իր ճգնաժամային պահերուն, այդ փրկարար գործը կատարել։

Փաշինեան ընդունուեցաւ Միաբանութեան քահանայապետական պատուիրակ Լեւոն Արք. Զէքիեանի կողմէ, որ բարեգալուստի խօսքերով դիմաւորեց զինք նաւամատոյցի մուտքին։ «Բարի եկած էք տուն», ըսաւ Սրբազան Հայրը Վարչապետին։ Ներկայ էին նաեւ Վենետիկի քաղաքապետարանի պատուիրակներ, Վենետիկի Կաթողիկէ Եկեղեցուոյ Պատրիարքի անձնական ներկայացուցիչը, եւ քաղաքիս հայ գաղութէն մօտաւորապէս քսան անդամներ։

Նախքան վանք մտնելը, Արք. Զէքիեան Վարչապետին ցոյց տուաւ կղզիի շրջակայքին այն բաժինները, որ անցեալ շաբաթ պատահած ողողումին հետեւանքով քանդուեցան եւ տեղեկացուց բնական աղէտին պատճառած այլ վնասներուն մասին, ներառեալ «Արմենիա» առագաստանաւը, որ փոթորիկը կառանէն խլեց եւ զարկաւ վանդակապատին դէմ, զայն տապալելով։

Եկեղեցւոյ մէջ, աղօթքի կարճ արարողութենէ մը վերջ, Սրբազան Հայրը առաջնորդեց Փաշինեանը ու իրեն ընկերացող պատուիրակութիւնը դէպի թանգարան, գլխաւորաբար կեդրոնացնելով պտոյտը Միաբանութեան գրադարանի մէջ ցուցադրուած ամենայարգի ձեռագիրներուն վրայ։

«Եկել ենք մեր զօրակցութիւնը յայտնելու ջրհեղեղից տուժած Մխիթարեան Միաբանութեանը, ուրախ եմ, որ անդառնալի վնաս չի պատճառուել: Նաեւ ուզում եմ հայ ժողովրդի գնահատանքն արտայայտել Մխիթարեան միաբանութեանը, որ մերժամանակակից կրթութեան, գիտութեան, արուեստի աղբիւրներից մէկն է: Այն ժամանակ, երբ հայութեան ինքնութիւնը վտանգուած էր հայրենիքում, Մխիթարեան միաբանութիւնը մեր լեզուի, պատմութեան, ինքնութեան պահպանման մի տաճար դարձաւ», գրեց Փաշինեան «Ոսկեայմատեան»ին մէջ։

Ապա Փաշինեան հանդիպում մը ունեցաւ Վենետիկի հայ համայնքին հետ վանքին Սրապեան սրահին մէջ, ուր Սրբազան Հայրը պաշտօնական խօսքը արտասանեց, նշելով, որ եթէ Մխիթար Սեբաստացի, Միաբանութեան հիմնադիրը, ստեղծած էր «հոգեկան պետականութիւն մը, հոգեկան հայրենիք մը, այսօր մենք ունինք նաեւ երկրաւոր հայրենիքը, հայոց պետականութիւնը, հայոց դրօշը, որ բոլորիս սրտի պարծանքն է»։

Վարչապետը ցաւ յայտնեց, որ այցելութեան պաշտօնական պատճառը հեղեղին գործած վնասները ըլլային։ Սակայն աւելցուց, որ «Սուրբ Ղազար կղզին, Մխիթարեան Միաբանութիւնը մեր պատմութեան համար շատ կարեւոր նշանակութիւն ունի եւ համոզուած եմ, որ հետագայում շատ կարեւոր դեր պիտի ունենայ այն ժառանգութիւնը, որ այստեղ է ստեղծուել առաջին հերթին՝ հայագիտական, հայոց լեզուի հետ առնչուող, մեր պատմութեան հետ առնչուող, իսկապէս մեր նոր գիտութեան եւ կրթութեան հիմքերն է դրել»։

Իր ելոյթին ընթացքին, Փաշինեան շեշտը դրաւ ազգային գաղափարախօսութեան վրայ։ «Մենք կարծում ենք, որ Հայաստանի Հանրապետութիւնը, որպէս պետութիւն, առաւել արդիւնաւէտ, առաւել մրցունակ, առաւել ուժեղ կը լինի եւ կը գտնուի, եթէ ներկայանայ, ո՛չ միայն որպէս Հայաստանի Հանրապետութեան քաղաքացիների ներկայացուցիչ, այլեւ ներկայանայ որպէս համայն հայ ժողովուրդի ներկայացուցիչ… Հայաստանի Հանրապետութիւնը հայ ժողովուրդի պետութիւնն է»։

Be the first to comment

Leave a Reply

Your email address will not be published.


*