Տիթրոյթի «Համազգային»-ի «Արաքս» Պարախումբի 15-ամեակ

0 0
Read Time:2 Minute, 36 Second

Տիթրոյթի «Համազգային»-ի «Արաքս» պարախումբը մեծ շուքով տօնեց Երեւանի 2800-ամեակը, Կոմիտասի 150-ամեակը եւ «Արաքս» պարախումբի 15-ամեակը։ Բացման խօսքը կատարեց մասնաճիւղի ատենապետուհի Շողեր Ուրլեան եւ բեմ հրաւիրեց պարախումբը, որ բացառիկ եւ խանդավառ ելոյթով խանդավատռեց ներկաները։ «Արաքս» պարախումբի նպատակը միայն հայկական պար սորվեցնելը չէ, այլ նաեւ հայ երիտասարդներ քով-քովի բերել հայկական ոգիով դաստիարակել եւ մօտիկ բարեկամութիւն ստեղծել։ «Համազգային»-ի Արաքս պարախումբը, ղեկավարութեամբ Նայիրի Կարապետեանի կը հաշուէ մօտ 130 անդամ, որոնք հետեւողական ձեւով փորձեր կը կատարեն։ Նաեւ, այս պարախումբին մօտէն կը քաջալերէ եւ շարունակ նեցուկ կը կանգնի շրջանի Հ․Յ․Դ․ «Ազատամարտ» կոմիտէութիւնը։
Ստորեւ, «Արաքս»-ի պարողներէն՝ Նարօտ Քէյվանեանի մէկ նամակը, յղուած «Համազգային»-ին․-
Առաջին տարիս է, որ «Արաքս»-ի հետ բեմ կը բարձրանամ։ Կը յիշեմ երբ առաջին անգամ Մարտ ամսուն փորձի գացի, վստահ չէի, որ բեմ պիտի բարձրանամ։ Անցեալ տարուայ ներկայացումէն խանդավառուած չէի, ոչ ալ պարի հանդէպ առանձնայատուկ սէր մը ունիմ։ Եւ այսպէս, զուտ ժամանակս լեցնելու նպատակով միացայ խումԲին: Նամակս կը գրեմ, որովհետեւ վստահ եմ՝ հանդիսատեսէն շատերը սխալ պատկերացում ունին «Արաքս»-ի մասին։ «Արաքս»-ը 2-3 ժամուայ ներկայացումը չէ, ոչ ալ հատ ու կենտ սխալները։ Իրականութեան մէջ, «Արաքս»-ը երկա՜ր փորձերէ յետոյ, կարճ դադարը հազիւ վերջացած, «․․․Տղա’ք, մէկ անգամ ալ փորձենք” ըսողը եւ ձեռքը ընկերոջը մեկնողն է։ «Արաքս»-ը «Այսօր բերդը պիտ բարձրացնենք հա’, ոտքերնուդ լաւ նայեցէ’ք” ըսողը եւ ժպիտով նորեկները խրախուսողն է։«Արաքս»-ը առաջին անգամ «բերդը» բարձրացնելու առիթը նշողն է։ «Արաքս»-ը պարը կէս ձգած ու բերդին նայող պարողն է, որ վախով կը սպասէ տղոց “խերով-բարով” իջնելուն։ «Արաքս»-ը տարազին գեղեցկութիւնը աւելի արտայայտիչ դարձնող տղաքն ու աղջիկներն են։ «Արաքս»-ը «Հայկազուններ» պարին մէջ կամքի դրսեւորումը տեսնողն է։ «Արաքս»-ը խանդավառութենէն միւսներէն աւելի բարձր ցատկողն է։ «Արաքս»-ը վերջին վայրկեանին գոգնոցը ուրիշին տուող եւ «Դուն առջեւի շարքն ես, ա՛ռ, կապէ՛, ես ետեւն եմ, վնաս չունի» ըսողն է։ «Արաքս»-ը իրարանցումի մէջ հագուստ փոխողներուն օգնող եւ աչքին ծայրով ելոյթն ալ դիտողն է (քանի որ այդ մէկը իր սիրած պարն է)։ «Արաքս»-ը շատ հիւանդ վիճակին ժպիտով պարողն է։ «Արաքս»-ը յոգնածութեան հաճոյքը զգացողն է։ «Արաքս»-ը նախկին պարողներն են, որ կը նախընտրեն ելոյթը ետնաբեմէն ոտքի կեցած դիտել, քան սրահին մէջ հանգիստ աթոռներուն վրայ նստած։ «Արաքս»-ը «Աչքերդ գոցէ՛, քիթէդ խոր շունչ մը ա՛ռ» ըսելով ընկերուհիներուն հանգստացնել փորձողն է։ «Արաքս»-ը այն փորձառու պարողներն են, որոնք կարծես աչքերէդ կը զգան, որ կը վախնաս, կու գան, կը գրկեն քեզ եւ առանց խօսելու կ՚ըսեն. «Ամէն ինչ լաւ կ՚ըլլայ, մի՛ վախնար․․․»։ «Արաքս»-ը ելոյթէն առաջ միաբերան «Հայր Մեր» ըսողն է։ «Արաքս»-ը հայ մնալու եւս մէկ միջոց է։ Արաքսը հայերէն շնչելու եւ պարելու միջոց է։ Արաքսը գիտակցուտիւնն է, որ բեմի վրայ կանգնած ես հայու կերպարը ներկայացնելու եւ այդ պարերու հիման վրայ մարդիկ փոքրիկ Հայաստան մը պիտի կերտեն իրենց մէջ։ Եւ գիտէ՞ք ի՛նչ։ Պարին գեղեցկութիւնը բեմին ետեւէն դիտուած՝ աւելի կը զգացուի: Պարը աւելի գեղեցիկ կ՛ըլլայ, երբ գիտես յաջորդ շարժումը ինչ է։ Այնպէս որ, եթէ «այդքան ալ չսիրեցիք» ներկայացումը, ձեզի բեմի ետին կը հրաւիրեմ, որպէսզի աւելի ճիշտ ու վառ պատկերացումներ ունենաք «Արաքս»-ի մասին։
Խօսքս կ՛աւարտեմ Գարեգին Նժդեհի խօսքով «Եթէ ուզում ես գուշակել մի ազգի ապագան՝ նայիր նրա երիտասարդութեան։» Շատ ապրէ՛ք «Համազգային»-ի «Արաքս» պարախումբի երիտասարդներ։ Մենք հպարտ ենք ձեզմով։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Տարանջատ Մտորումներ Մշակութային Միասնութեան Մասին
Next post Քարերի Եւ Գորգերի Ներդաշնակ Խաղը Տիգրանակերտում

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles