Մասիս Մայիլեան` Արցախի Նախագահական Ընտրութեան Թեկնածու

ՍՏԵՓԱՆԱԿԵՐՏ․- Արցախի Հանրապետութեան արտաքին գործոց նախարար Մասիս Մայիլեան յայտարարեց, որ 2020-ին տեղի ունենալիք նախագահական ընտրութեան առաջադրած է իր թեկնածութիւնը:

«Արցախի քաղաքացիներու, քաղաքական եւ հասարակական շրջանակներու, Հայաստանի կառավարական եւ քաղաքական շրջանակներու, սփիւռքի ազգային գործիչներու հետ տեղի ունեցած քննարկումները ցոյց տուած են, որ առկայ են անհրաժեշտ նախադրեալներ` Արցախի մէջ տեղի ունենալիք նախագահական ընտրութեան թեկնածութիւնս առաջադրելու մասին որոշում տալու համար: Քանի որ արդէն իսկ առկայ նախադրեալները կ՛երաշխաւորեն 2020-ի ընտրութեան յաջող կազմակերպումը եւ վստահութիւն կը ներշնչեն Արցախի զարգացման զանազան ծրագիրներու արդիւնաւէտ իրականացման գործին մէջ, ես որոշած եմ առաջադրել թեկնածութիւնս: Եկած է համազգային օրակարգի, ինչպէս նաեւ Արցախի մէջ արմատական բարեփոխումներու ծրագիրներու քննարկման եւ ընդունման նպատակով հանրութեան առողջ ուժերու լայն համախմբման ուղղուած աշխուժ ու վճռական քայլերու ժամանակը: Բարեփոխումներու շնորհիւ մենք միացեալ ուժերով պիտի ապահովենք մեր երկրի անվտանգ, բարեկեցիկ, յուսալի, արդար, քաղաքակիրթ եւ ժողովրդավարական ապագան, մէկ խօսքով` պիտի կերտենք մեր նոր Արցախը», կը յայտնէ Մայիլեան:

Be the first to comment

Leave a Reply

Your email address will not be published.


*