Քոնկրէսականներ Սփիր Եւ Չու Այցելեցին Հայաստան 

ԵՐԵՒԱՆ.- Քոնկրէսականներ Ճեքի Սփիր եւ Ճուտի Չու այցելեցին Հայաստան եւ Արցախ: Հայաստանի Ազգային ժողովի նախագահ Արարատ Միզոյեան հանդիպումին ընթացքին շնորհակալութիւն յայտնեց քոնկրէսականներուն: Միրզոյեան նշեց, որ Միացեալ Նահանգները Հայաստանի կարեւորագոյն գործընկերներէն է, եւ Հայաստան բաց է եւ կ՛ուզէ զարգացնել յարաբերութիւնները Միացեալ Նահանգներուն հետ՝ բոլոր ուղղութիւններով: Ան ընդգծեց երկու երկիրներու օրէնսդիր մարմիններուն միջեւ համագործակցութեան կարեւորութիւնը: Ան շնորհակալութիւն յայտնեց Ներկայացուցիչներու տան հայկական հարցերու յանձնախումբին՝ այս տարիներուն տարբեր նախաձեռնութիւններու մէջ Հայաստանի կողքին ըլլալուն համար, ինչպէս նաեւ  Ներկայացուցիչներու տան կողմէ արդէն իսկ հաստատուած՝ Հայաստանի մէջ ժողովրդավարութեան աջակցութեան վերաբերող ծրագիրներուն ֆինանսական յատկացումը 40 միլիոն տոլարով աւելցնելուն համար:Ստեփանակերտի օդակայանին մէջ, Ճեքի Սփիր եւ Ճուտի Չու դիմաւորուեցան Արցախի Ազգային ժողովի փոխնախագահ Վահրամ Բալայեանի, արտաքին գործոց փոխնախարար Արմինէ Ալեքսանեանի, Ազգային ժողովի պատգամաւոր Դաւիթ Մելքումեանի, Ամերիկայի Հայ Դատի յանձնախումբի անդամներ Թերեզա Երէմեանի եւ Րաֆֆի Սարգիսեանի կողմէ:

Ապա անոնք յաջորդաբար հանդիպումներ ունեցան Արցախի նախագահ Բակօ Սահակեանի, Արցախի Հանրապետութեան Ազգային ժողովի նախագահ Աշոտ Ղուլեանի եւ արտաքին գործոց նախարար Մասիս Մայիլեանի հետ։

Նախագահ Սահակեանի հետ հանդիպումին քննարկուեցան ամերիկեան-արցախեան յարաբերութիւններուն, ատրպէյճանական-ղարաբաղեան տագնապի լուծման, տարածաշրջանային գործընթացներուն վերաբերող հարցեր: Նախագահը ընդգծեց, որ Միացեալ Նահանգներու հետ յարաբերութիւններու զարգացումը Արցախի արտաքին քաղաքական օրակարգի կարեւոր ուղղութիւններէն է՝ բարձր գնահատելով Միացեալ Նահանգներուն դերը Արցախի տագնապի խաղաղ լուծման եւ մեր տարածաշրջանին մէջ կայունութեան պահպանման առումով:

Ազգային ժողովի նախագահ Աշոտ Ղուլեան շնորհակալութիւն յայտնեց քոնկրեսականներուն՝ Արցախի, Հայաստանի եւ Միացեալ Նահանգներու հայկական համայնքի խնդիրներու լուծման ուղղութեամբ անոնց կատարած աշխատանքին համար:

Հանդիպումին ընթացքին խորհրդարանի ղեկավարը նշեց, թէ Արցախը բաց է համագործակցութեան համար եւ կ՛ակնկալէ, որ միջազգային կազմակերպութիւնները, որոնց կարգին ամերիկեան կառոյցները, ազատութեան ու ժողովրդավարութեան իրավիճակի մասին ոչ միայն հեռակայ մշտադիտարկում իրականացնեն, այլ նաեւ ուղղակիօրէն աշխատին Արցախի քաղաքացիական հասարակութեան հետ ու աջակցութիւն ցուցաբերեն ժողովրդավարական կառոյցներու կատարելագործման:

«Արցախում ապրող մարդիկ ունեն նոյն իրաւունքներն ու ազատութիւնները, ինչպէս ցանկացած երկրում ապրող մարդիկ, եւ քաղաքական կարգավիճակով պայմանաւորուած սահմանափակումներն անթոյլատրելի են: Ուստի՝ յոյս ունեմ, որ մեր յարգարժան քոնկրէսականներն իրենց նախաձեռնութիւններում ուշադրութիւն կը դարձնեն նաեւ անվտանգութիւնից ոչ պակաս կարեւոր այս խնդրին», նշեց Ղուլեան:

 

Be the first to comment

Leave a Reply

Your email address will not be published.


*