Եւրասիական Տնտեսական Միութեան Նիստը Երեւանի Մէջ

ԵՐԵՒԱՆ.- Հոկտեմբեր 1-ին տեղի ունեցաւ Եւրասիական տնտեսական միութեան Բարձրագոյն խորհուրդի ընդլայնուած կազմով նիստը, որուն կը մասնակցէին Եւրասիական տնտեսական միութեան  անդամ պետութիւններու ղեկավարները եւ երեք հրաւիրեալ երկիրներու առաջնորդներ:

Հայաստանի վարչապետ Նիկոլ Փաշինեան` իբրեւ նախագահող եւ հիւրընկալող երկրի ղեկավար, ողջունելով նիստին մասնակիցները` նշեց, որ իրեն համար մեծ պատիւ է հերթական նիստի ընթացքին ներկաները ողջունել Երեւանի մէջ:

«Մեր կազմակերպութիւնը, որ արդէն հինգ տարեկան է, կը շարունակէ տարուէ տարի աւելի ամուր դառնալ: Անիկա արդէն ցոյց տուած է իր կենսունակութիւնը եւ գրաւչութիւնը` իբրեւ միջազգային համարկումի միութիւն», ընդգծեց Հայաստանի վարչապետը:

Նիկոլ Փաշինեան ըսաւ, թէ Հայաստանը այս տարի Եւրասիական տնտեսական միութեան նախագահող երկիրն է եւ բացի միութեան անդամ երկիրներու ղեկավարներէն, նիստին կը մասնակցին Սինկափուրի վարչապետը, Իրանի եւ Մոլտովայի նախագահները. «Ատիկա մեր նախագահութեան խորհրդանշական գագաթնակէտն է»:

Վարչապետը նշեց, որ առաջին անգամ նիստի շրջագիծին մէջ տեղի կ՛ունենայ միջազգային համաժողով` նուիրուած Եւրասիական մայր ցամաքի տարանցման կարելիութիւններուն: Ան վստահութիւն յայտնեց, որ այս իրադարձութիւնը պիտի ծառայէ իբրեւ արդիւնաւէտ հարթակ` առեւտրական-տնտեսական կապերը ամրապնդելու եւ Եւրասիական տարածքին մէջ գումակային պատկերացումներ  մշակելու համար:

Վարչապետը ըսաւ, թէ համարկումի գործընթացը կ՛ըլլայ աւելի աշխուժ, եթէ աղաքացիները համոզուին, որ մեր աշխատանքին շնորհիւ որոշումներ կը կայացուին զգայուն հարցերու վերաբերեալ, որոնք անոնց կենսամակարդակի եւ աշխատանքային պայմաններու անմիջական բարելաւման կը հասցնեն: «Վստահ եմ, որ այս ուղղութեամբ իրականացուող հետեւողական աշխատանքը թոյլ կու տայ մեզի ո՛չ միայն արդիւնաւէտօրէն վերացնել խոչընդոտները, այլեւ կը նպաստէ աւելի  ամբողջական համարկման` հաւասարութեան, փոխադարձ շահի եւ մէկզմէկու շահերու յարգանքի սկզբունքներու հիման վրայ», ըսաւ ան:

Փաշինեան նշեց նաեւ, որ անհրաժեշտ կը նկատեն աշխուժացնել միացեալ ջանքերը` ուղղուած միութեան երկիրներուն միջեւ ազգային արժոյթներով հաշուարկներու անցման համար բարենպաստ պայմաններու ստեղծման. «Հակառակ դրական աշխուժութեան` կան ոլորտներ, մասնաւորապէս, կազի շուկան, ուր միութեան երկիրներու  ապրանքները աւանդաբար կ՛առաջարկուին միութեան անդամ չհանդիսացող երկիրներու ազգային արժոյթով, եւ ազգային արժոյթներով փոխադարձ գործակցութեան համար դաշտի առաւելագոյն ընդլայնումը պէտք է ըլլայ մեր առաջնահերթութիւններու շարքին»:

Փաշինեան ըսաւ, թէ այսօրուան հանդիպման օրակարգին վրայ ներառուած է Միասնական ֆինանսական շուկայ ստեղծելու հայեցակարգի հարցը. «Ասիկա ինքնին արդէն լուրջ քայլ է ընդհանուր ֆինանսական տարածքի ձեւաւորման ուղղութեամբ, ինչպէս նաեւ նախադրեալ է Եւրասիական տնտեսական միութեան

ժամանակակից վճարահաշուարկային համակարգի կառուցման եւ ազգային արժոյթներով հաշուարկներու անցնելուն բարենպաստ պայմաններ ստեղծելու համար»:

Ռուսիոյ նախագահ Վլատիմիր Փութին իր համաձայնութիւնը յայտնեց Եւրասիական տնտեսական միութեան Բարձրագոյն խորհուրդի ընդլայնուած կազմով նիստին միութեան աշխատանքին մասին տրուած դրական գնահատականներուն:

«Անիկա կայունութեամբ կը զարգանայ, ստեղծուած է ծաւալուն ընդհանուր շուկայ, որ յաջողութեամբ կը գործէ: Եւրասիական միութեան շրջագիծին մէջ համարկումի հոլովոյթները աւելի բարենպաստ ազդեցութիւն կ՛ունենան մասնակից երկիրներու տնտեսութիւններու աճին վրայ եւ կը նպաստեն մեր քաղաքացիներու կենսամակարդակի բարելաւման», իր ելոյթին ընթացքին ըսաւ ան:

Ռուսիոյ նախագահը ընդգծեց, որ միաժամանակ անդամ երկիրներուն առջեւ նոր մարտահրաւէրներ կան, օրինակ, աւելի մեծ ուշադրութիւն պէտք է դարձնել ապրանքներու եւ ծառայութիւններու առեւտուրի խոչընդոտներու վերացման, որոնք առկայ են շուկայի տարբեր ոլորտներուն մէջ:

Առաջնահերթութիւններու կարգին է նաեւ ֆինանսական ոլորտին մէջ համամիութենական կարգաւորման ներդրումը, ընթացիկ նիստի աւարտին կը նախատեսուի այդ հարցին վերաբերեալ հայեցակարգի հաստատում:

Ռուսիոյ նախագահը գոհունակութեամբ խօսեցաւ նաեւ ուժանիւթի ոլորտի միութենական օրէնսդրութեան  կատարելագործման մասին:

«Միաւորումը առարկայական բանակցութիւններ կը վարէ քանի մը երկրի, ինչպէս նաեւ 20 միջազգային կառոյցներու եւ կազմակերպութիւններու հետ: Անոնց կարգին են Սերպիան, Իսրայէլը, Եգիպտոսը: Շուտով ազատ առեւտուրի գօտիի վերաբերեալ  նոյնանման բանակցութիւններ պիտի սկսին Հնդկաստանի հետ, որ մեծ շուկայ ունի եւ տնտեսութեան զարգացման արագութեամբ այսօր աշխարհին մէջ առաջինն է», յայտարարեց ան:

Իրանի նախագահ Հասան Ռուհանի ըսաւ, որ բոլոր երկիրները պարտաւոր են դէմ հանդէս գալ միակողմանիութեան, հանդէս գալ միջազգային պարտաւորութիւններուն համապատասխան` խաղաղութեան, անվտանգութեան, կայունութեան եւ միջազգային կարգի պահպանման նպատակով: «Որոշ երկիրներու, այդ կարգին Իրանի հանդէպ Միացեալ Նահանգներու թշնամական ու միակողմանի գործողութիւնները հասցուցին դաժան ու անմարդկային պատժամիջոցներու», ըսաւ Ռոհանի:

Անոր համաձայն, Իրանի աշխարհագրական դիրքը թոյլ կու տայ իրականացնել տարանցում տարբեր ուղղութիւններով:

 

Be the first to comment

Leave a Reply

Your email address will not be published.


*