Վանէցեան Հրաժարեցաւ Ազգային Անվտանգութեան Ծառայութեան Տնօրէնի Պաշտօնէն


ԵՐԵՒԱՆ․- Ազգային անվտանգութեան ծառայութեան  տնօրէն Արթուր Վանէցեան ներկայացուց իր հրաժարականը եւ յայտարարեց, որ ստեղծուած ներկայ իրավիճակին եւ յառաջիկայի ընդհանուր պարունակին մէջ այս քայլը Հայաստանի Հանրապետութեան եւ ժողովուրդին ծառայելու ամէնէն նախընտրելի եւ ամէնէն հիմնաւորուած տարբերակն է:
Հ․Հ․ վարչապետ Նիկոլ Փաշինեան իր կարգին յայտարարեց, որ ստորագրած է Ազգային անվտանգութեան ծառայութեան տնօրէնին աշխատանքէն ազատելու միջնորդագիրը: Փաշինեան յայտնեց, որ այդ մէկը տեղի ունեցած է քանի մը քննարկումներու ընթացքին եւ փոխադարձ համաձայնութեամբ: «Մենք քննարկած ենք Վանեցեանի հետագայ գործունէութեան քանի մը տարբերակներ, եւ անոնք պիտի քննարկուին յընթացս: Այս պահուն, կը կարծեմ, պարոն Վանեցեանը պիտի կեդրոնանայ Հայաստանի ֆութպոլի ազգային հաւաքականը Եւրոպայի ախոյեանութեան եզրափակիչ հասցնելու շատ կարեւոր, ազգային եւ պետական խնդիրի լուծման վրայ», դիտել տուաւ վարչապետը: Արթուր Վանեցեան, որ Ազգային անվտանգութեան ծառայութեան տնօրէնի պաշտօնը ստանձնած էր Մայիս 10, 2018-էն ի վեր, նաեւ Սեպտեմբեր 22-էն ի վեր, Հայաստանի ոտնագնդակի համադաշնակցութեան նախագահն է:

Վանէցեան յայտնեց․- «Այս որոշումը ես տուած եմ նոյնքան վստահ, որքան այն, երբ մեր երկրի համար բախտորոշ փուլին համաձայնեցայ ստանձնել Ազգային անվտանգութեան ծառայութեան տնօրէնի պաշտօնը: Մէկուկէս տարուան իմ գործունէութիւնս միշտ բոլորիդ աչքին առջեւ եղած է, եւ ամէն քայլ առած եմ մէկ սկզբունքով` հայրենիքն ու սպայի պատիւը վեր են ամէն ինչէ: Պետականաշինութիւնը իր տրամաբանութիւնը ունի` որոշումներու տարերայնութիւնը, գործողութիւններու յախուռնութիւնը, առաջնայինը երկրորդականէն, իսկ անցողիկը մնայունէն չզանազանելու գործելաոճը այն ուղին չէ, որ կը տանի դէպի նպատակներու իրականացում: Ասիկա ընդհանուր ոչինչ ունի սպայի արժանապատուութեան հետ. սպայի ուսադիրն ու զարգացումներու նման ընթացք անհամատեղելի են: Իմ հրաժարականս թող ըլլայ «Կանգ ա՛ռ»-ի սթափեցնող քայլ, մնացած բոլոր տարբերակներուն պիտի յաղթանակէ հայրենիքի հանդէպ պարտքը: Խաղաղութիւն ու անվտանգութիւն մեր երկրին»:

 

Be the first to comment

Leave a Reply

Your email address will not be published.


*