Արցախի Տեղական Ինքնակառավարման Մարմիններու Օրինակելի Ընտրութիւնները

 

ՍՏԵՓԱՆԱԿԵՐՏ․- Սեպտեմբեր 8-ին, Արցախի Հանրապետութեան զանազան շրջաններու մէջ, տեղի ունեցան տեղական ինքնակառավարման մարմիններու ընտրութիւնները։

Արցախի Կեդրոնական ընտրական յանձնախումբի փոխնախագահ Եղիշէ Արզումանեան մանրամասնութիւններ փոխանցելով, տեղեկացուց, թէ ընտրութիւններուն մասնակցած է 67.326 ընտրող։

«Մասնակիցներուն թիւը, ըստ ընտրական տեղամասերու, հետեւեալն է` Ստեփանակերտի մէջ` 21 հազար 643 ընտրող կամ ընտրողներուն 55,5 առ հարիւրը, Ասկերանի մէջ` 9.011 ընտրող կամ ընտրողներուն 76,7 առ հարիւրը, Հատրութի մէջ` 5.967 ընտրող կամ ընտրողներուն 69,5 առ հարիւրը, Մարտունիի մէջ` 12.600 ընտրող կամ ընտրողներուն 72,5 առ հարիւրը, Մարտակերտի մէջ` 9.241 ընտրող կամ ընտրողներուն 70,9 տոկոսը, Շահումեանի մէջ` 1.512 ընտրող կամ ընտրողներուն 71,6 առ հարիւրը, Շուշիի մէջ` 2.306 ընտրող կամ ընտրողներուն 58,8 տոկոսը, Քաշաթաղի մէջ` 5.046 ընտրող կամ ընտրողներուն 69,6 առ հարիւրը», ըսաւ Արզումանեան։

228 համայնքի մէջ առաջադրուած էր 415 համայնքի ղեկավար եւ 2.573 աւագանիի անդամի թեկնածու: Ընտրելու իրաւունք ունեցողներուն թիւը 103.010 է:

Արզումանեան նշեց, որ գրաւոր որեւէ դիմում-բողոք չէ ներկայացուած յանձնախումբին` աւելցնելով, որ դիտորդական առաքելութիւն իրականացնող կազմակերպութիւններուն կողմէ ներկայացուած են շարք մը թերութիւններ, որոնք աշխատանքային կարգով ուղղուած են: Ան նշեց, թէ մեծ թիւով  դիտորդներ կան ընտրական տեղամասերուն մէջ, անոնք կը հետեւին ընտրական գործընթացին եւ հեռաձայնի միջոցով կը տեղեկացնեն իրավիճակին մասին:

Նախագահ Բակօ Սահակեան քուէարկեց յանուն յառաջընթացին։ Ան նշեց թէ կապուած է Ստեփանակերտին եւ պիտի փորձէ քաղաքին հաղորդել այն ներուժը, որ, իբրեւ մայրաքաղաք, իր դրական ազդեցութիւնը ունենայ: Անոր կարծիքով` տեղական ընտրութիւններուն մասնակցող հայաստանցի դիտորդները պիտի համոզուին, որ ժողովրդավարական արժէքները Արցախի մէջ աւելի քան ընդգծուած են:

«Այս ընտրութիւններու կազմակերպիչներուն հետ նախընտրական շրջանին մենք բազմաթիւ եւ բազմազան քննարկումներ ունեցած ենք, եւ ես շատ ուրախ եմ, որ, ինչպէս միշտ, այդ աշխատանքները կազմակերպուած են բարձր մակարդակով, եւ համոզուած եմ, որ բոլոր անոնք, որոնք ուզած են իբրեւ դիտորդներ մասնակցիլ այս ընտրութիւններուն, պիտի  համոզուին, որ ժողովրդավարական արժէքները Արցախի մէջ աւելի քան ընդգծուած, աւելի քան խոր արմատ ձգած եւ մեր ժողովուրդին համար արժէք ներկայացնող են։ Հետեւաբար, ես կը կարծեմ, որ անոնք, մասնակցելով այս ընտրութիւններուն, պիտի համոզուին, որ ասիկա անշրջելի ընտրութիւն է մեր ժողովուրդին համար, եւ մենք այսօր, վաղը եւ ընդմիշտ պիտի առաջնորդուինք այդ նշուած վարոյթներով», ըսաւ նախագահ Սահակեան:

Անդրադառնալով հարցին, թէ ի՞նչ դիրքորոշում ունի Հայաստանի վարչապետ Նիկոլ Փաշինեանի այն յայտարարութեան վերաբերեալ, թէ Արցախի իշխանութեան հետ անհամաձայնութիւններ կան եւ կառավարման համակարգերու միջեւ ներդաշնակութեան անհրաժեշտութիւն կայ, Արցախի նախագահը պատասխանեց. «Այդ ներդաշնակութիւնը նոյնպէս մեր առօրեայ առաջնահերթութիւններու շարքին կը դասուի, եւ մենք պիտի շարունակենք մեր գործընկերներուն հետ այդ ուղղութեամբ համապատասխան աշխատանքներ կատարել: Անհամաձայնութիւնները պէտք չէ որակել որպէս ողբերգութիւն: Մենք, բնական է, ունինք տեսակէտներ ու այնտեղ, ուր այս կամ այն տեսակէտները չեն համընկնիր, ես ատիկա կը վերագրեմ մեր աշխատանքային յարաբերութիւններուն», շեշտեց ան:

Դաւիթ Սարգսեան՝ Ստեփանակերտի Քաղաքապետ

Արցախի Կեդրոնական ընտրական յանձնախումբը յայտնեց, թէ Ստեփանակերտի մէջ տեղի ունեցած ընտրութիւններուն, քաղաքապետ ընտրուած է Դաւիթ Սարգսեանը:

Յանձնախումբին համաձայն շուրջ 39 հազար ընտրողներէն քուէարկութեան մասնակցած է 21 հազարը: Դաւիթ Սարգսեան ստացած է 7787 ձայն, երկրորդ ամէնէն շատ քուէները ստացած է Գրիգորի Սահակեանը (4765 ձայն): Երրորդ տեղը Արեգ Աւագեանն է (3125), 4-րդը՝ Արմէն Յակոբեանը (3059), 5-րդը Արայիկ Աւանէսեանը (2108):

Դաւիթ Սարգսեան անկուսակցական է, «Քոնսալթ Ֆինանս Քլուպ» ընկերութեան հիմնադիր տնօրէնն է եւ Արցախի Քիք-պոքսինկի համադաշնակցութեան նախագահը:

Մնացեալ ընտրուած քաղքապետներն են․- Արծուիկ Սարգսեան (Շուշի), Սամուէլ Աղաճանեան (Ասկերան), Հայկ Սարգսեան (Մարտունի), Միշա Գիւրճեան (Մարտակերտ), Վահան Սավադեան (Հատրութ), Նարեկ Ալեքսանեան (Բերձոր) եւ  Սերգէյ Չիլինգարեան (Քարվաճառ):

Be the first to comment

Leave a Reply

Your email address will not be published.


*