Ստեփանակերտի Մէջ Ռազմական Սարքերու եւ Սպառազինութեան Ցուցահանդէս

ՍՏԵՓԱՆԱԿԵՐՏ ․- Սեպտեմբեր 2-ին, “Վերածնունդ” հրապարակին վրայ կազմակերպուեցաւ ռազմական սարքերու եւ սպառազինութեան ցուցահանդէս: Նախագահ Բակօ Սահակեանը պաշտպանութեան նախարար Կարէն Աբրահամեանի եւ պաշտօնատար այլ անձերու ուղեկցութեամբ այցելեց տաղաւարները ու ծանօթացաւ ներկայացուած արտադրանքին եւ սեփական արտադրութեան նոր զէնքերու նմուշներուն: Արցախի պաշտպանութեան բանակի հրամանատար Կարէն Աբրահամեան տեղեկացուց, որ ցուցադրութեան նպատակն է հանրութեան ներկայացնել զինուած ուժերուն մէջ առկայ նոր նմուշները եւ խթանել տեղական արտադրանքը:

«Սեփական արտադրութեան նոր զինանմուշները պիտի յագեցնեն առաջնագիծը եւ պիտի բարձրացնեն զօրքի կենսունակութիւնը: Սպառազինութեան որոշ տեսակներ արդէն փորձարկուած են, որոշներն ալ դեռ փորձարկման մէջ են: Մեր սպաներն ու զինուորները գոհ են այն տեսակներէն, որոնք գործնականօրէն կը կիրառուին: Վստահ ենք, որ յառաջիկային մեր բանակը պիտի համալրուի արդիականացուած սպառազինութեամբ եւ նոր զէնքերով»,- յայտնեց  Աբրահամեան: Նաեւ, “Վերածնունդ” հրապարակին վրայ բացուած է նաեւ դաշտային խոհանոց` համերկրացիներուն եւ հիւրերուն հնարաւորութիւն տալով համտեսելու  զինուորական ճաշ:

Be the first to comment

Leave a Reply

Your email address will not be published.


*