Հ.Մ.Ը.Մ. ԱՐՑԱԽԻ ՄԱՍՆԱՃԻՒՂԻ ԱՌԱՋԻՆ ԲԱՆԱԿՈՒՄԸ

Լուսանկարներ՝ Լ. Թեւոսեան

ՍՏԵՓԱՆԱԿԵՐՏ․- Օգոստոսի 22-28-ը Ասկերանի շրջանի Պատարա համայնքի տարածաշրջանէն ներս, ազդանշանը տրուեցաւ, հազիւ օր մը առաջ հիմնուած Հայ Մարմնակրթական Ընդհանուր Միութեան Արցախի մասնաճիւղի առաջին բանակումը:  Ստեփանակերտի Վերածնունդի հրապարակին մէջ, հանդիսաւորութեամբ կայացած Հ․Մ․Ը․Մ․ Արցախի մասնաճիւղի բացման արարողութիւնէն ետք, սկաուտները շքերթով ժամանեցին տեղւոյն Հ․Յ․Դ․-ի “Նիկոլ Դուման” կեդրոն, որմէ ետք մեկնեցան բանակատեղի:

 Հ․Մ․Ը․Մ․-ի Կեդրոնական Վարչութիւնը գործուղած էր Նարեկ Հանէեանը, մօտէն հետեւելու համար նորակազմ մասնաճիւղի աշխատանքներուն։

“Սկաուտները կը խոստանան ըլլալ հաւատարիմ Աստուծոյ, ծառայել ազգին ու հայրենիքին, միշտ օգնել ուրիշներուն եւ գործել իբրեւ պարտականութեան գիտակից արի, վեհանձն մարդ, ինչպէս նաեւ հնազանդիլ հայ սկաուտներու դաւանանքներուն: Վրանային բանակումները Հ․Մ․Ը․Մ․-ի խոստումին վարժուելու լաւագոյն միջոցներն են”, ըսաւ Նարեկ Հանէեանը, աւելցնելով, թէ բանակումը նպատակ ունի ինքնագիտակցութեան եւ պատասխանատուութեան զգացում փոխանցելու սկաուտներուն:

Մէկ շաբաթ տեւողութիւն ունեցող բանակումին կը մասնակցին 80 սկաուտներ, որոնք այդ ժամանակահատուածին, պիտի ծանօթանան գոյատեւման միջոցներուն, պարաններով, փայտերով կայմերու, կամուրջներու եւ աշտարակներու պատրաստման եղանակներուն: Բանակումի ընթացքին պիտի կազմակերպուին նաեւ արշաւագնացութիւններ:

 

Be the first to comment

Leave a Reply

Your email address will not be published.


*