Պուենոս Այրէս.- Տեսակցութիւն՝ Կարօ Փայլան – Հ.Յ.Դ. Հարաւային Ամերիկայի Կեդրոնական Կոմիտէ

ՊՈՒԵՆՈՍ ԱՅՐԷՍԻ(“Փրենսիա Արմենիա”).- Ուրբաթ, Oգոստոս 16-ին, Թուրքիոյ Ազգային ժողովին մէջ Ժողովուրդի ժողովրդավարական կուսակցութեան երեսփոխաններ Կարօ Փայլան, որ  շրջապտոյտի ելած է Հարաւային Ամերիկա, այցելեց Պուենոս Այրէսի մէջ Հ.Յ.Դ. Հարաւային Ամերիկայի Կեդրոնական կոմիտէի կեդրոնատեղի: Այս ընդունելութեան ներկայ էին Հ.Յ.Դ. Հարաւային Ամերիկայի Կեդրոնական կոմիտէի անդամներ, ուղեկից կազմակերպութիւններու` Հ.Օ.Մ.-ի, Հ.Մ.Ը.Մ.-ի եւ Համազգայինի, շրջանային թէ տեղական ղեկավարներ, երիտասարդական կազմակերպութեան եւ սկաուտներու ներրկայացուցիչներ: Ներկայ էր նաեւ  Ընկերվար միջազգայնականի մէջ Հ.Յ.Դ. ներկայացուցիչ Մարիօ Նալպանտեան: Փայլանի կ՛ընկերակցէր Ժողովուրդի ժողովրդավարական կուսակցութեան երեսփոխան Էպրու Կիւնէյ:

Հիւրերուն բարի գալուստի խօսքով հանդէս եկաւ Հ.Յ.Դ. Հարաւային Ամերիկայի Կեդրոնական կոմիտէի ներկայացուցիչ Ջանիկ Քէչեան, որ կուսակցութեան Հարաւային Ամերիկայի կառոյցին եւ ուղեկից կազմակերպութիւններուն անունով ամբողջական զօրակցութիւն յայտնեց իրենց առաքելութեան: Ելոյթ ունեցան Կիւնէյ եւ Փայլան, որոնք հակիրճ ձեւով ներկայացուցին Թուրքիոյ մէջ այսօր տիրող շատ մտահոգիչ իրավիճակը, իրենց պայքարն ու մասնաւորաբար կիներու դերակատարութիւնը: Անոնք անդրադարձան նաեւ շրջան իրենց այցելութեան, որ իր տեսակին մէջ առաջինն էր` գոհունակութիւն յայտնելով իրենց ունեցած քաղաքական հանդիպումներուն, ինչպէս նաեւ մամլոյ անդրադարձին մասին: “Մեր նպատակը Հարաւային Ամերիկայի հանրային կարծիքին ներկայացնելն է Էրտողանի հալածական քաղաքականութեան սպառնալիքը, որ կրնայ նոր ցեղասպանութեան յանգիլ: Թուրքիոյ ժողովրդավարացման համար մեր պայքարը ձեր ալ պայքարն է”, ըսաւ ան` դիմելով ներկաներուն, որոնց կոչ ուղղեց նոր սերունդին սորվեցնելու, որ Արեւմտեան Հայաստանը նոյնքան իրենց հայրենիքն է, որքան Հայաստանի Հանրապետութիւնը, եւ համոզում յայտնեց, որ Թուրքիոյ ժողովրդավարացումով եւ ազգայնականութեան վերացումով Հայոց ցեղասպանութիւնը պիտի ճանչցուի:

Տեղի ունեցաւ հարց-պատասխան, որուն ընթացքին ներկաները հետաքրքրուեցան Թուրքիոյ մէջ հայ համայնքին իրավիճակով, ինչպէս նաեւ` Հարաւային Ամերիկայի իրենց այս շրջապտոյտէն իրենց ունեցած սպասումներուն մասին:

Հանդիպման աւարտին Հ.Մ.Ը.Մ.-ի Արարատ սկաուտական խումբի ղեկավարները Կիւնէյին եւ Փայլանին նուիրեցին փողկապներ:

 

Be the first to comment

Leave a Reply

Your email address will not be published.


*