Հանդիպում՝ Գէորգ Պետիկեանի Հետ

ԵՐԵՒԱՆ.- Երեքշաբթի, Օգոստոս 6-ին, Հ․Հ․ Ազգային Գրադարանի սրահին մէջ, ներկայութեամբ մեծ թիւով գրականագէտներու, գրողներու, բանասէրներու, մտաւորականներու եւ մշակութասէրներու, տեղի ունեցաւ «Ընթերցողների հանդիպում՝ ամերիկահայ գրող, կրթական մշակ եւ մտաւորական Գէորգ Պետիկեանի հետ» խորագրով մշակութային գեղեցիկ ցերեկոյթ մը։
Նշենք, թէ վերջերս Երեւանի մէջ տեղի ունեցած էր Պետիկեան գրողի նոր լոյս ընծայած «Ես տեսայ Անին» հատորի շնորհանդէսը, «Աւետիք Իսահակեան»-ի անուան գրադարանէն ներս, որուն ընթացքին խօսք առած էին անուանի համալսարաններու հանրայայտ բանախօսներ։
Ընթերցողներու հետ վերեւ նշեալ հանդիպման ներկաները լսեցին ամերիկահայ գրող Պետիկեանի գրական արժանիքներու մասին, ինչպէս նաեւ կատարուեցաւ իր 8-րդ այս հատորէն պատմուածքի մը ընթերցումը, այս ձեւով որոշակի գաղափար մը հրամցուեցաւ գրողի գրական ոճի, մաքուր եւ սահուն արեւմտահայերէնի, հիւմուրով խառն ու հաճելի լեզուին եւ ներկայացուցած դէպքերու ու պատկերներու հարազատութեան։
Ձեռնարկին յաջորդաբար խօսք առնին Հ․Հ․ Ազգային Գրադարանի Աբեղեանի անուան հիմնարկի տնօրէն՝ Վարդան Դեւրիկեանը, կրթական վաստաշատ մշակ՝ Ճուլիէթա Գալստեանը, ծանօթ մտաւորական եւ հասարակական գործիչ՝ Գէորգ Եազըճեանն ու բանասիրական գիտութիւններու դոկտոր՝ Մարգարիտ Խաչատրեանը։
Բոլոր խօսք առնողներն ալ վեր առին հեղինակ Պետիկեանի գրական վաստակն ու արժէքը եւ ապա շնորհաւորեցին ու յաջողութեան եւ արեւշատութեան բարեմաղթութիւններ կատարեցին։
Աւարտին՝ իր սրտի խօսքով եւ յուզումով ելոյթ ունեցաւ հեղինակ Գէորգ Պետիկեանը, մեծապէս տպաւորելով մշակութասէր ներկաները։
Ապա տեղի ունեցան մտերմիկ հարցում-զրոյցներու եւ նկարուելու յիշատակելի բաժիններ՝ գրողի ու ընթերցողներու միջեւ։
Բոլոր ներկաները Պետիկեանի նախկին եւ կամ նոր հատորներէն մէկական նուէր ստացան։

Be the first to comment

Leave a Reply

Your email address will not be published.


*