Ստեփանակերտի Վերածնունդի Հրապարակէն․- Վարչապետ Փաշինեան Ներկայացուց Հայաստանի Ռազմավարական Նպատակները


ՍՏԵՓԱՆԱԿԵՐՏ․- Օգոստոս 5-ին, Արցախի Հանրապետութեան նախագահ Բակօ Սահակեան Ստեփանակերտի օդակայանին մէջ դիմաւորեց Համահայկական 7-րդ ամառնային խաղերու շրջագիծին մէջ Արցախ հասած Հայաստանի Հանրապետութեան վարչապետ Նիկոլ Փաշինեանը:
Տեղի ունեցաւ Սահակեան – Փաշինեան հանդիպումը, որուն ընթացքին քննարկուեցան հայկական երկու պետութիւններու փոխադարձ գործակցութեան վերաբերող հարցեր: Այնուհետեւ, համահայկական խաղերուն ընդառաջ Ստեփանակերտի Վերածնունդի հրապարակին վրայ, տեղի ունեցաւ հաւաք։
Ստեփանակերտի Վերածնունդի հրապարակին վրայ իր ելոյթին ընթացքին Հայաստանի վարչապետը նշեց, որ պատեհ կը նկատէ համազգային քննարկման ներկայացնել ռազմավարական նպատակադրումներու աշխատանքային տարբերակը, խնդիրներ, որոնք Հայաստանի Հանրապետութիւնը պէտք է կարենայ լուծել մինչեւ 2050 թուական:
«․․․Մինչեւ 2050 թուական պէտք է կարենանք լուծել հետեւեալ խնդիրները. Հայաստանի բնակչութիւնը հասցնել առնուազն 5 միլիոն մարդու, ստեղծել 1 միլիոն 500 հազար աշխատատեղ, լուծել 2,5 միլիոն մարդու զբաղուածութեան հարց եւ վերացնել աղքատութիւնը, Հայաստանը դարձնել արդիւնաբերական երկիր, տասնհինգապատկել Հայաստանի համախառն ներքին արդիւնքը, ունենալ 10 միլիառ տոլարի արժէքը գերազանցող առնուազն 5 հայկական արհեստագիտական ընկերութիւն եւ 10 հազար աշխատող նորաստեղծ ընկերութեան, եօթնապատկել միջին աշխատավարձը, բանակի մարտունակութեան ցուցանիշով տեղ գրաւել աշխարհի յառաջատար երկիրներու առնուազն առաջին քսանեակին մէջ, ունենալ աշխարհի տասը ամէնէն արդիւնաւէտ հետախուզական ծառայութիւններէն մէկը, ապահովել առողջապահական ծառայութիւններու 100 տոկոսնոց հասանելիութիւն եւ առողջապահութեան ֆինանսաւորումը քսանապատկել, կրթութիւնը դարձնել ազգային ապրելակերպ, կրթութեան եւ գիտութեան ֆինանսաւորումը քսանապատկել, Հայաստան այցելող զբօսաշրջիկներուն թիւը հասցնել 15 միլիոնի, Հայաստանի ֆութպոլի հաւաքականը դարձնել Եւրոպայի եւ/կամ աշխարհի առաջնութեան մետալակիր, նուաճել 25 ողիմպիական ոսկիէ մետալ եւ դառնալ ճատրակի աշխարհի անհատական ախոյեանը», յայտնեց վարչապետ Փաշինեան:
Վարչապետին համաձայն, շատերը պիտի հարցնեն` իսկ ինչո՞ւ Արցախի մասին ոչինչ ըսուած է. «Պատասխանը շատ պարզ, որովհետեւ Արցախը Հայաստան է եւ վե՜րջ»:

Be the first to comment

Leave a Reply

Your email address will not be published.


*