“Արցախ – Աւստրալիա Բարեկամներ” Խմբակցութիւնը Կազմուեցաւ

Աւստրալիոյ Հայ Դատի յանձնախումբը կը տեղեկացնէ, թէ Օգոստոս 1-ին, կազմուեցաւ “Արցախ – Աւստրալիա Բարեկամներ” խմբակցութիւնը, որուն առ այժմ մաս կը կազմեն 40 յայտնի քաղաքական պաշտօնատարներ, մտաւորականներ ու կրօնական առաջնորդներ։

Խմբակցութեան մաս կը կազմեն նաեւ նահանգային ղեկավարներ եւ խորհրդարանականներ, ինչպէս նաեւ քաղաքապետներ եւ քաղաքապետական խորհուրդներու անդամներ։

«Լեռներ շարժել» (#MOVING MOUNTAINS) լօզունգով հրապարակ իջած այս խմբակցութեան կազմութիւնը յայտարարուեցաւ Աւստրալիա այցելող Արցախի Հանրապետութեան արտաքին գործոց նախարար Մասիս Մայիլեանի, Արցախի Ազգային ժողովի պատգամաւոր Դաւիթ Իշխանեանի եւ Արցախի արտաքին գործոց նախարարութենէն Արտակ Ներսիսեանի ու աւստրալացի բարձրաստիճան պաշտօնատարներու եւ տեղւոյն հայ համայնքի ներկայացուցիչներուն միջեւ տեղի ունեցած խորհրդակցութիւններու աւարտին։

Նախարար Մայիլեան ողջունեց խմբակցութեան կազմութիւնը, զայն երկու երկիրներուն միջեւ յարաբերութիւններու սերտացման նպաստող քայլ մը համարելով։

Աւստրալիոյ Հայ Դատի յանձնախումբի գործադիր վարիչ Հայկ Կայսերեան եւս դրուատեց այս քայլը:

Խմբակցութեան մէջ կան հաղորդակցութեան նախարար Փօլ Ֆլեչըր, գանձապետի օգնական Մայքըլ Սուքըր, ընդդիմութեան ներքին գործոց նախարար Քրիսթինա Քենըլի եւ ընդդիմութեան երկրագործութեան նախարար Ճօէլ Ֆիցկիպըն, ինչպէս նաեւ Աւստրալիոյ խորհրդարանի անդամներ՝ Նոր Հարաւային Կալեսի վարչապետ Կլետիս Պէրէճիքլեան, Ճանըթըն Օ՛Տիա, Հիւ ՄըքՏըրմըթ, Թենթ Զիմըրմըն եւ Ուոլթ Սիքորտ։ Անոնց կը միանան նաեւ Ռայտ քաղաքի քաղաքապետ Ժերոմ Լախալ եւ քաղաքապետական խորհուրդի անդամ Սարգիս Ետալեան։

“Արցախ – Աւստրալիա Բարեկամներ” խմբակցութեան գլխաւոր նպատակներն են՝ նեցուկ կանգնիլ Արցախի ժողովուրդի ինքնորոշման իրաւունքին, աջակցիլ Արցախի տագնապի խաղաղ լուծման եւ դատապարտել Արցախի ժողովուրդին դէմ ռազմական գործողութիւնները։

Be the first to comment

Leave a Reply

Your email address will not be published.


*