Ոչ Եւս Է Գրիգոր Փիտէճեան

ՆԻՒ ԵՈՐՔ․- Ոչ եւս է հանրածանօթ երաժիշտ, երգահան, դաստիարակ, երաժտագէտ, հայ երգի մեկնաբան եւ պատմագէտ, “Համազգային”-ի երգչախումբի ղեկավար,  յարգարժան Գրիգոր Փիտէճեանը։
«Համազգային»-ի Նիւ Եորքի մասնաճիւղի հիմնադիր անդամ, Փիտէճեան մահացաւ Յուլիսի 31-ին։
Գրիգոր Փիտէճեան ծնած է Աղեքսանդրիա (Եգիպտոս), Օգոստոս 17, 1935ին, երաժշտական հակումներով ընտանիքի մը մէջ։ Ուսումը ստացած է Մեծի Տանն Կիլիկիոյ Կաթողիկոսութեան դպրեվանքին մէջ, միաժամանակ ուսման հետեւելով Պէյրութի երաժշտանոցին մէջ։ Դպրեվանքին մէջ, երաժշտական կրթութիւնը ստացած է աշակերտելով ծանօթ երաժշտագէտ՝ Համբարձում Պէրպէրեանին՝ խորանալով ազգային ու կրօնական երաժշտութեան մէջ։ Շրջանաւարտ ըլլալէ ետք, ստանձնած է Անթիլիասի Սուրբ Գրիգոր Լուսաւորիչ Մայր Տաճարի դպրապետի պաշտօնը։ Իր մասնագիտական ուսումը շարունակած է Նիւ Եորքի «Ման» դպրոցին եւ «Հանթըր» գոլէճին մէջ, ուր ստացած է մագիստրոսական աստիճանը։ Խմբավարական իր գործունէութեան առընթեր, նաեւ բեղուն ուսումնասիրող մը եղած է պարոն Փիտէճեան։ Իր ուսումնասիրական գործերէն են՝ «Անձինք նուիրեալք», «Հայ յեղափոխական երգերուն տեղը հայ երաժշտութեան մէջ», «Հայ Եկեղեցւոյ երգերը», «Գրիգոր Նարեկացի՝ շարականագի՞ր» եւ «Քրիստափոր Կարա-Մուրզա»։ Ի շարս այլոց, Ա.Մ.Ն. արեւելեան շրջանի առաջնորդարանի հովանաւորութեամբ հրատարակուած է «Երպապսակ Ապրիլեան Նահատակներուն» անունով գործին ձայնապնակը, զոր կը կատարեն Երեւանի Կամերային Երգչախումբն ու Ալան Յովհաննէս սենեկային նուագախումբը՝  Փիտէճեանի խմբավարութեամբ։
Փիտէճեանը միջազգային ճանաչում ստացած էր իբրեւ տաղանդաւոր երաժշտագէտ, որուն գիրքերն ու յօդուածները գիտական կարեւոր նպաստ բերած են հայ ազգային ու կրօնական երաժշտութեան ուսումնասիրութեան, եւ իբրեւ դպրաց դասերու եւ երգչախումբերու հիմնադիր ու խմբավար՝ տարբեր երկիրներու մէջ։
Տան կարգը տեղի ունեցաւ, Հինգշաբթի, Օգոստոս 1-ին, Սուրբ Գրիգոր Լուսաւորիչ եկեղեցւոյ մէջ (Ուայթ Փլէյնզ, Նիւ Եորք)։ Յուղարկաւորութիւնը տեղի պիտի ունենայ Ուրբաթ, Օգոստոս 2-ին, առաւօտեան ժամը 11:00-ին, նոյն եկեղեցւոյ մէջ, որմէ ետք մարմինը պիտի ամփոփուի Սիտըր Կրով գերեզմանատան (Ֆլաշինկ, Նիւ Եորք) մէջ։
Ա․Մ․Ն․ «Համազգային»-ի արեւելեան շրջանի ընտանիքը եւ յատկապէս Նիւ Եորքի մասնաճիւղը խոր ցաւակցութիւններ կը յայտնէ իր կողակից՝ Պերճուհիին, զաւակներուն՝ Տաթեւին, Անդովքին եւ  համայն ազգականներուն։

Be the first to comment

Leave a Reply

Your email address will not be published.


*