Մասնակցութիւն Պաղեստինի Եւ Իսրայէլի Մէջ Ընկերվար Միջազգայնականի Ժողովին

Յուլիս 30-31-ին Ռամալլայի եւ Թել Աւիւի մէջ գումարուեցաւ Ընկերվար միջազգայնականի ժողովը` նուիրուած պաղեստինեան-իսրայէլեան տագնապի լուծման` «Երկու պետութիւն» սկզբունքով: Ժողովին մասնակցած են կուսակցութիւններ Իսրայէլէն եւ Պաղեստինէն, ինչպէս նաեւ ներկայացուցիչներ Ընկերվար միջազգայնականի անդամ այլ կուսակցութիւններէ:

Հ․Յ․Դ․-ի կողմէ ժողովին մասնակցած է Երուսաղէմէն Յակոբ Սեւան: Երկօրեայ քննարկումներուն լոյսին տակ ժողովը որդեգրած է հռչակագիր` «Երկու պետութիւն կարգաւորումը` Իսրայէլ եւ Պաղեստին, Միջին Արեւելքի ժողովուրդներու խաղաղութեան եւ կարելիութիւններու ապագային համար» խորագիրով:

Հռչակագիրը կ՛արձանագրէ, որ 27 տարի երկկողմանի խաղաղութեան հաստատման անյաջող փորձէն ետք, Ընկերվար միջազգայնականը այն կարծիքին է, թէ ժամանակն է, որ միջազգային համայնքը հաւաքաբար ստանձնէ միջազգային իրաւունքին մէջ առկայ իր պարտաւորութիւնը` վերջ դնելու պաղեստինեան պետութեան բռնագրաւման ու բոլոր արգելքներուն, որպէսզի պաղեստինցի ժողովուրդը կարենայ գործադրել ազատ ինքնորոշման իր իրաւունքը:

Հռչակագիրին հեղինակները ցաւ կը յայտնեն, որ շրջանին մէջ ապագային ալ որեւէ լուծման հիմք հանդիսացող այս սկզբունքը բացայայտօրէն խափանուած է Միացեալ Նահանգներու նախագահ Թրամփի վարչակազմին կողմէ:

Ռամալլայի եւ Թել Աւիւի մէջ գումարուած նիստերուն նպատակն էր քննարկել այն, թէ միջազգային համայնքը ի՛նչ քայլերու կրնայ ձեռնարկել տագնապը լուծելու համար` «Երկու պետութիւն» սկզբունքով, ինչ  որ կը բխի իսրայէլացիներուն ու պաղեստինցիներուն շահերէն եւ պիտի նպաստէ շրջանին ու աշխարհի մէջ խաղաղութեան հաստատման:

Երկօրեայ ժողովին մասնակցած Հ․Յ․Դ․-ի ներկայացուցիչ Յակոբ Սեւան հանդիպումներ ունեցած է շարք մը կուսակցութիւններու ներկայացուցիչներու հետ, որոնց կարգին` պաղեստինեան եւ իսրայէլեան, եւ արծարծած երկու կողմերը հետաքրքրող հարցեր:

Be the first to comment

Leave a Reply

Your email address will not be published.


*