Հ.Յ.Դ. Հայաստանի Գերագոյն Մարմին – Հ.Յ.Դ. Արցախի Կեդրոնական Կոմիտէ Հանդիպում

ԵՐԵՒԱՆ․- Յուլիս 26-ին,   Հ․Յ․Դ․ «Սիմոն Վրացեան» կեդրոնին մէջ տեղի ունեցաւ Հ․Յ․Դ․ Հայաստանի Գերագոյն մարմինի եւ Հ․Յ․Դ․ Արցախի Կեդրոնական կոմիտէի հանդիպումը: Արցախի Կեդրոնական կոմիտէէն հանդիպումին մասնակցած են Արթուր Մոսիեան, Սերկէյ Շահվերդեան եւ Վահագն Դադայեան, Հայաստանի Գերագոյն մարմինէն` Գերագոյն մարմինի ներկայացուցիչ Իշխան Սաղաթէլեան, Սիմոն Սիմոնեան, Շաղիկ Մարուխեան, Յակոբ Մաթիլեան եւ Արթուր Խաչատրեան:

Քննարկուեցան Արցախի մէջ գործող քաղաքական այլ ուժերու հետ յարաբերութիւններու ներկայ պատկերը, հետագայ ընելիքները եւ կուսակցութեան ռազմավարութիւնն ու մարտավարութիւնը` ուղղուած Արցախի ներքաղաքական կեանքին մէջ իրավիճակի կայունացման եւ ամրապնդման, ինչպէս նաեւ երկրի անվտանգութեան պահպանման գործին մէջ:

Նաեւ քննարկուեցան Արցախի ներքին քաղաքական իրավիճակին վերաբերող շարք մը հարցեր` մասնաւորապէս Արցախի յառաջիկայ տեղական ինքնակառավարման մարմիններու, խորհրդարանական ու նախագահական ընտրութիւններուն Դաշնակցութեան դիրքորոշումն ու ընելիքները: Հ․Յ․Դ․ Հայաստանի Գերագոյն մարմինը անգամ մը եւս վստահեցուցած է իր անմնացորդ օժանդակութիւնն ու զօրակցութիւնը Հ․Յ․Դ․ Արցախի Կեդրոնական կոմիտէին:

Be the first to comment

Leave a Reply

Your email address will not be published.


*