Նիւ Եորք․- Հ.Մ.Ը.Մ.-ի Արեւելեան Միացեալ Նահանգներու Նաւասարդեան 29-րդ Խաղեր

Հ.Մ.Ը.Մ.-ի Արեւելեան Միացեալ Նահանգներու 29րդ Նաւասարդեան խաղերը տեղի ունեցան Նիւ Եորքի մէջ Հինգշաբթի, Յուլիս 4-էն Կիրակի Յուլիս 7, նախաձեռնութեամբ՝ Հ.Մ.Ը.Մ.-ի Շրջանային Վարչութեան, hովանաւորութեամբ՝ Ա.Մ.Ն. Արեւելեան թեմի Բարեջան Առաջնորդ Բարձրաշնորհ Տ. Անուշաւան Արքեպիսկոպոս Դանիէլեանի, ներկայութեամբ՝ Հ.Մ.Ը.Մ.-ի Կեդրոնական Վարչութեան անդամ եւ արեւելեան Ա․ Մ. Ն․-ի շրջանի ներկայացուցիչ՝ Հրաչ Մեսրոպեանի եւ հիւրընկալութեամբ՝ Հ.Մ.Ը.Մ.-ի Նիւ Եորքի մասնաճիւղին: Բացման հանդիսութեան նաեւ ներկայ էր Հ.Օ.Մ.-ի Ա.Մ.Ն. Արեւելեան Շրջանային Վարչութեան ներկայացուցիչ՝ Սանտրա Վարդանեան:
Բացման հանդիսութիւնը ընթացք առաւ մէկ վայրկեան յոտնկայս լռութեամբ յարգելով Հոգեւոր Հովիւ Սուրբ Լուսաւորիչ Հայ Առաքելական Եկեղեցւոյ Տէր Մուշեղ Աւագ Քհնյ. Տէր Գալուստեանի յիշատակը, որ տարիներ շարունակ զօրավիգ կանգնած է Հ.Մ.Ը.Մ.-ին:
Ապա ներկաները վայրկեան մը եւս յոտնկայս յարգեցին յիշատակը, տարիներ շարունակ Հ.Մ.Ը.Մ.-ին ծառայած, միութեան ծառայութեան շքանշանակիր Ուաշինկթընի մասնաճիւղէն՝ Համօ Սարտարպէկեանցի: Այժմ, իր յիշատակին Շրջանային Վարչութիւնը յայտարարեց թէ Նաւասարդեան Խաղերու Երէց Տղոց Վոլիպոլի բաժակը պիտի կրէ Եղբայր Համոյին անունը յաջորդող հինգ տարիներուն:
Օրուան հանդիսավար Նազարէթ Ապաճեանի բարի գալուստի խօսքէն ետք հերթով հրաւիրեց Նիւ Եորքի մասնաճիւղի ատենապետ Եղբայր Էտի Թորոսեանը, Շրջանային Վարչութեան ատենապետ Եղբայր Արամ Գայսերեանը, Կեդրոնական Վարչութեան անդամ Եղբ. Հրաչ Մեսրոպեանը և Սրբազան Հայրը որ փոխանցեն իրենց պատգամները:
Երեք օրերու վրայ երկարող խաղերու ընթացքին՝ դաշտերու վրայ, թէ ամենուրէք Հ.Մ.Ը.Մ.-ական մարզիկը հանդիպեցաւ իր հարազատներուն, որոնք ժամանած էին Արեւելեան Ամերիկայի զանազան մասնաճիւղերէն:
Բոլոր մարզիկները, սկաուտները եւ համակիրները, խումբ առ խումբ ժամանեցին Նիւ Եորք, ուր տեղի ունեցաւ մասնաճիւղերու պատասխանատուներու կարճ ժողով մը, բացատրելու շաբաթավերջի մարզախաղերու դասաւորումը, օրէնքները եւ խստապահանջ կարգապահական պայմանները:
Հ.Մ.Ը.Մ.-ի տարեկան այս մարզական խաղերը, առիթ մըն են սատարելու Հ.Մ.Ը.Մ.-ի վսեմ նպատակին, երբ շրջանի մասնաճիւղերէն, ժամանած Հ.Մ.Ը.Մ.-ականներ եւ համակիրներ, գօտեպնդուած Հ.Մ.Ը.Մ.-ի շունչով եւ ոգիով, կը հաւաքուին Նաւասարդեան խաղերու դրօշին տակ՝ մրցելու՝ հայկական ազնիւ ոգիով, ստեղծելու՝ խանդավառ մթնորոլտ մը, ծառայելու՝ «Բարձրացի՛ր-Բարձրացո՛ւր» նշանաբանին, եւ միշտ ի միտի ունենալով՝ թէ այս խաղերէն յաղթական դուրս պիտի գայ միայն Հ.Մ.Ը.Մ.-ի ընտանիքը:
Ծնողներ ու բարեկամներ ոգեւորիչ խանդավառութեամբ կը ներխուժէին դաշտէ դաշտ, քաջալերելով իրենց մարզիկները, որպէսզի նորանոր յաղթանակներ արձանագրեն իրենց մասնաճիւղերուն համար, առանց անդրադառնալու թէ իրենց Հ.Մ.Ը.Մ.-ի անդամակցութիւնը ինքնին ամենամեծ յաղթանակն է մեր հայեցի ազգային դիմագիծի պահպանման ճիգերուն մէջ:
Այս առթիւ հրատարակուեցաւ յուշամատեան գրգոյկ մը:
Ուրբաթ, Յուլիս 5-ի երեկոյեան պարահանդէսը խանդավառեց հռչակաւոր երգչուհի Սարինա Գրոսը, իսկ Շաբաթ Յուլիս 6-ի երեկոյեան տեղի ունեցաւ յաղթանակի ճաշկերոյթ-պարահանդէսը: Բարի գալուստի խօսք արտասանեց հիւրընկալ մասնաճիւղի վարչութեան ատենապետ Եղբայր Էտի Թորոսեանը, ապա հերթով խօսք առին Հայաստանի Մ.Ա.Կ.-ի դեսպան Պր. Մհեր Մարգարեանը, Շրջանային Վարչութեան ատենապետ Արամ Գայսերեանը, Հ.Յ.Դ. Ա.Մ.Ն․ արեւելեան շրջանի Կեդրոնական Կոմիտէի անդամ Խաժակ Մկրտիչեան, Հ.Մ.Ը.Մ.-ի Կեդրոնական Վարչութեան անդամ Հրաչ Մեսրոպեանը եւ Առաջնորդական փոխանորդ Հոգեշնորհ Հայր Սահակ Եմիշեանը, որ իր հայրական պատգամը փոխանձեց ապա օրհնեց ընթրիքն ու սեղանակիցները: Երեկոն խանդավառեց սիրուած երգիչ Սագօ Թաշճեանը, որ այս առթիւ եկած էր Մոնթրէալէն յատուկ հրաւէրով: Նոյն երեկոյեան տեղի ունեցաւ բաժակներու եւ յուշատախտակներու բաշխումը: Ամենաբարելաւուած Մասնաճիւղի բաժակը ստացաւ Նիւ Ճըրզիի մասնաճիւղը, իսկ Տիպար Մասնաճիւղի «Եղբայր Արամ Կաւուր» բաժակը ստացաւ Ֆիլատելֆիոյ մասնաճիւղը: Երէց Տղոց Վոլիպոլի «Եղբայր Համօ Սարտարապէկեանց» բաժակը ստացաւ Փրովիտենսի եւ Մէրիմաք Հովիտի Մասնաճիւղերը: Երէց Տղոց Պասքէթպոլի «Եղբայր Մարք Ալաշաեան» բաժակը ստացաւ Շիքակոյի Մասնաճիւղը:

Խումբերու ընդհանուր դասաւորում.-
Մասնաճիւղ Կէտ
1.- Նիւ Եորք 89 կէտ
2.- Շիքակօ 40 կէտ
3.- Ուաշինկթըն 35 կէտ
4.- Նիւ Ճըրզի 29 կէտ
5.- Պոսթըն 13 կէտ
6.- Ֆիլատելֆիա 5 կէտ
7.- Փրովիտենս 3 կէտ
Մէրիմաք Հովիտ, Ալպընի
Յետադարձ ակնարկ մը նետելով շաբաթավերջի միջոցառումին վրայ, առանց վարաներու կարելի է հաստատել թէ շրջանս հարուստ է ազգային բարձր գիտակցութեան տէր կամաւորներով, ըլլան անոնք ծնողք թէ պատասխանատու:
Անգամ մը եւս Հ.Մ.Ը.Մ.ի մեծ ընտանիքը յաղթական դուրս եկաւ:
Յատուկ գնահատանքի արժանի է հիւրընկալ մասնաճիւղը և Շրջանային մարզական յանձնախումբը:
Բոլորին վարձքը կատար:

Be the first to comment

Leave a Reply

Your email address will not be published.


*