ՏԱՐՕՆ ԱՃԷՄՕՂԼՈՒ ԱՐԺԱՆԱՑԱՒ Massachusetts Institute of Technology-Ի ԲԱՐՁՐԱԳՈՅՆ ԿՈՉՄԱՆ

ՊՈՍԹԸՆ․- Աշխարհահռչակ տնտեսագէտ Փրոֆ. Տարօն Աճէմօղլու,, որ 1993 թուականէն ի վեր ակադեմական գործունէութիւնը կը շարունակէ Միացեալ Նահանգներու ամենահեղինակաւոր համալսարաններէն՝ Մասաչուսեցի փորձագիտական կաճառին (MIT․- Massachusetts Institute of Technology) մէջ, միշտ գիտական աշխարհի օրակարգին վրայ կը մնայ իր արձանագրած փայլուն յաջողութիւններով։

Աճէմօղլու վերջերս արժանացաւ MIT-ի բարձրագոյն կոչման ու ճանչցուած՝ որպէս «կաճառի փրոֆեսէօր»։ Կառավարութիւններու, նորարարութեան, վաստակի եւ համաշխարհայնացման նիւթերուն շուրջ Տարօն Աճէմօղլուի կողմէ կատարուած աշխատանքները միշտ լայն արձագանգ կը ստեղծեն ամբողջ աշխարհի մէջ։

MIT-է ներս նուաճած կոչման զուգահեռ՝ Տարօն Աճէմօղլու այս ամիս ստացաւ նաեւ Համաշխարհային տնտեսութեան կաճառի «Կլոպալ տնտեսութեան» մրցանակը։ Յառաջիկայ Սեպտեմբերին լոյս պիտի տեսնէ Տարօն Աճէմօղլուի նոր գիրքը, որ կը կոչուի «Նեղ միջանցք», որ իր հեղինակած հինգերորդ գիրքն է։ Այդ գործը համաշխարհային հայեացք մը կ՚ապահովէ՝ զարգացման ու անհատական իրաւունքներու եւ ազատութիւններու նիւթերուն վրայ։Փրոֆ. Տարօն Աճէմօղլու ցայսօր աւելի քան վեց տասնեակ տոքթորականի թեկնածուի գիտական խորհրդականը եղած է։  Աճէմօղլու ունի նաեւ աւելի քան 120 գիտական յօդուած։

Այս տարեշրջանին, ան եղաւ MIT-ի այս բարձրագոյն կոչման արժանացած երկու դասախօսներէն մին։ Միւս անունն է քաղաքագէտ Սիւզան Պերժէ։ Այսպէսով այս երկու գիտնականները մասնակից դարձած կ՚ըլլան այն շատ նեղ, շատ սակաւաթիւ ակադեմականներու խմբակին, որու անդամները կը կրեն MIT -ի կաճառի փրոֆեսէօրի տիտղոսը։ Ներկայիս MIT -է ներս կը գտնուի 11 «էմերիթուս» կաճառի փրոֆեսէօր։

Հարկ է նշել, որ 2015 թուականէն ի վեր առաջին անգամ MIT-է ներս երկու գիտնականի շնորհուած է կաճառի փրոֆեսէօրի կոչում եւ այդ երկու գիտնականներէն մէկն է Տարօն Աճէմօղլու։

MIT-ի տեսուչ Ռաֆայէլ Ռեյֆ այս առթիւ կը յայտնէ. «Կաճառի փրոֆեսէօր մը ըլլալով՝ Տարօն Աճէմօղլու կը մարմնաւորէ MIT-ի բնոյթը. համարձակութիւն, նախանձախնդրութիւն եւ համաշխարհային մակարդակով իսկական ազդեցութիւն։ Իր ստեղծագործութիւնը կը խտացնէ ազգերու, հաւաքականութիւններու եւ բանուորներու ճակատագրի նման խոր նիւթերու վրայ եւ մեր ժամանակներուն մէջ այդ բոլորի համաշխարհային մակարդակով աւելի լաւ ընկալման տեսակէտէ սա շատ կարեւոր պիտի ըլլայ»։ Ռեյֆ յիշեցուց, որ «Քլարք» մետալը նուաճելէն ի վեր Տարօն Աճէմօղլու յառաջատար նպաստ մը բերած է տնտեսագիտութեան գրականութեան եւ արձանագրած՝ ակադեմական բացառիկ յաջողութիւն մը։

Be the first to comment

Leave a Reply

Your email address will not be published.


*