Ազգային Ժողովը Ամբողջութեամբ Ընդունեց Հարկային Օրէնսգիրքի Փոփոխութիւններու Ծրարը

ԵՐԵՒԱՆ.- Հայաստանի Ազգային ժողովը երկրորդ ընթերցումով եւ ամբողջութեամբ ընդունեց «Հարկային օրէնսգիրքի փոփոխութիւններ»-ու ծրարը 25 յունիսի իր նիստին:

Նախագիծերու ծրարին թեր քուէարկեց 73, դէմ` 32 պատգամաւոր:

Նախքան նիստը, Ազգային ժողովի «Բարգաւաճ Հայաստան» եւ «Լուսաւոր Հայաստան» խմբակցութիւնները յայտարարեցին, թէ դէմ պիտի քուէարկեն օրինագիծին, որովհետեւ եկամտահարկի համահարթեցումով բարձր ու ցած աշխատավարձ ունեցողները նոյնը պիտի վճարեն, ինչպէս նաեւ այն պատճառով, որ իրենց առաջարկած փոփոխութեան առաջարկները նկատի չեն առնուած երբեք:

Ծրարով առաջարկուող հիմնական փոփոխութիւններէն է եկամտային հարկի համահարթեցումը: Եկամտային հարկը կը դառնայ 23 առ հարիւր, ապա, աստիճանաբար նուազելով, կը հասնի 20 առ հարիւրի: Նախագիծով կը բարձրացուի նաեւ վարկային կազմակերպութիւններու, գրաւատուներու, լումայափոխներու պետական տուրքը:

Մինչ Ազգային ժողովին մէջ կը կատարուէր «Հարկային օրէնսգրքի փոփոխութիւններ»-ու ծրարի քուէարկութիւն, ՀՅԴ Հայաստանի երիտասարդական միութեան «Ահազանգ» նախաձեռնութեան անդամները դարձեալ բողոքի ցոյց կատարեցին խորհրդարանին դիմաց` յայտարարելով, որ իրենք դէմ են այդ ծրարին մէջ ներառուած եկամտահարկի համահարթեցման սկզբունքին:

Ցուցարարները դիտել տուին, որ Հարկային օրէնսգիրքի բարեփոխումները կը պահանջեն առարկայական նոր մօտեցումներ, որոնց կիրարկումով պէտք չէ խախտի արդարութեան սկզբունքը:

«Ահազանգ» նախաձեռնութեան անունով Քրիստինէ Վարդանեան յայտարարեց, որ նախաձեռնութիւնը պիտի ունենայ հետագայ քայլեր եւ ծրագիրներ, իսկ անոնց մասին տեղեակ պիտի պահէ Յունիս 26-ին:

Be the first to comment

Leave a Reply

Your email address will not be published.


*