Իմամօղլու՝ Պոլսոյ Քաղաքապետ

ՊՈԼԻՍ․- Կիրակի, Յունիս 23-ին, երկրորդ անգամ ըլլալով տեղի ունեցաւ քաղաքապետի ընտրութիւնը եւ Թուրքիոյ կեդրոնական ընտրական յանձնաժողովի հաղորդումով` ընդդիմադիր «Ազգ» դաշինքը ներկայացնող քեմալական «Ժողովրդահանրապետական կուսակցութեան» (CHP-) թեկնածու Էքրեմ Իմամօղլուն ապահովելով քուէներուն 54.21 տոկոսը, յաղթեց նախագահ Էրտողանի «Արդարութիւն եւ զարգացում» կուսակցութեան թեկնածու Պինալի Եըլտըրըմին, որ ստացաւ քուէներուն 44.99 տոկոսը:

Իմամօղլուն ստացաւ 4 միլիոն 741.868 ձայն, իսկ Եըլտըրըմ` 3 միլիոն 935.453:

Ընտրութիւններուն 10 միլիոն 570.354 ընտրողէն մասնակցած է 8 միլիոն 925.063-ը, այսինքն՝ ընտրելու իրաւունք ունեցող քաղաքացիներուն 84.5 տոկոսը:

Թուրքիոյ խորհրդարանի նախկին պատգամաւոր եւ քեմալական «Ժողովրդահանրապետական կուսակցութեան» անդամ Սելինա Տողան անդրադարձաւ Պոլսոյ մէջ տեղի ունեցած ընտրութիւններուն։

Տողան նշեց թէ․ «Իմամօղլու կ՛ըսէ․ «Այս քաղաքին մէջ փոքրամասնութիւններ չկան: Այս քաղաքին մէջ մենք մեր գիրկը պիտի առնենք բոլորը` յոյները, հայերը, ասորիները, հրեաները․․․։ Շնորհակալութիւն Իմամօղլուին Պոլսոյ մէջ բազմակարծութիւնը եւ բոլորին ինքնութիւնը կարեւոր համարելու համար»:

Տողան Պոլսահայ համայնքի ազդեցիկ կին գործիչներէն է: Ան այժմ հայաշատ Շիշլի թաղամասի աւագանիի անդամ է:

Be the first to comment

Leave a Reply

Your email address will not be published.


*