Քոնկրէսը Կը Յատկացնէ 1.5 Միլիոն Տոլար Արցախի Մէջ Ականազերծման Ծրագիրին Համար

ՈՒԱՇԻՆԿԹԸՆ․- Հայ Դատի գրասենեակը կը տեղեկացնէ, թէ Յունիս 18-ին, Քոնկրէսի Ներկայացուցիչներու պալատը հաստատեց Արցախի մէջ ականազերծման ծրագիրին եւ վերականգնման ծառայութիւններուն համար 1.5 միլիոն տոլարի չափով օգնութիւն տրամադրելու նախաձեռնութիւնը:
2020 տարուան արտասահմանեան օգնութեան մասին օրինագիծին փոփոխութիւնը ներկայացուցած է Թիճէյ Քոքսը, յայտնելով, թէ․ «Լեռնային Ղարաբաղը ականներու պայթիւններէն քաղաքացիական բնակչութեան մէջ ունի կորուստներու բարձր ցուցանիշ: HALO Trust-ի տուեալներով՝ վերջին տասնամեակներուն ընթացքին՝ Լեռնային Ղարաբաղի մէջ ականներու պայթիւններուն հետեւանքով զոհուած է 400 խաղաղ բնակիչ: Ներկայացուած փոփոխութիւնը պիտի ապահովէ ականազերծման եւ վերականգնման ծրագիրներու շարունակական ֆինանսաւորումը: Ես պատրաստ եմ վճռականութեամբ աշխատելու Քոնկրէսի Հայկական հարցերով յանձնաժողովի իմ գործընկերներուն, Ամերիկայի Հայ Դատի յանձնախումբին եւ HALO Trust-ին հետ Լեռնային Ղարաբաղի մէջ համայնքներու վերականգնումը ապահովելու հարցով»:
Փոփոխութեան առաջարկին կողմ քուէարկած է 231, դէմ՝ 187 քոնկրէսական:
Նշենք, թէ Քոնկրէսը հաստատեց նաեւ Հայաստանին 40 միլիոն տոլարի յաւելեալ աջակցութիւն տրամադրելու նախաձեռնութիւնը, որուն հեղինակն է հայկական հարցերով յանձնախումբի համանախագահ Ճեքի Սփիր:
Նախագծին կողմ քուէարկած 268, դէմ` 152 քոնկրէսական: «Քոնկրէսի կողմէ այս նախաձեռնութեան հաստատումը հայերուն հզօր ազդանշան կու տայ, որ Միացաել Նահանգները կը ճանչնան անոնց ոգեշնչող ժողովրդավարական առաջընթացը, կ՛աջակցի աւելի հաշուետու կառավարութիւն ձեւաւորելու անոնց ձգտումներուն եւ պիտի աշխատի անոնց հետ` ճկուն, պատասխանատու հիմնարկներ ստեղծելու համար»,- յայտնեց Սփիր:
«Ներկայացուցիչներու պալատին մէջ այն լայն աջակցութիւնը, որ մենք այսօր տեսանք Սփիրի նախաձեռնութեան, կ՛արտացոլէ Քոնկէսի երկկուսակցական համաձայնութեան՝ Հայաստանի ժողովրդավարական ձգտումներուն, Միացեալ Նահանգներ -Հայաստան ռազմավարական գործընկերութեան զարգացմանն աջակցելու հարցով»,- յայտնեց Հայ Դատի յանձնախումբի գործադիր տնօրէն Արամ Համբարեան:

 

Be the first to comment

Leave a Reply

Your email address will not be published.


*