ՔԱՂԱՔԱԿԱՆ ՈՂՋԱԽՈՀՈՒԹԵԱՆ ՊԱՀՆ Է ՀԻՄԱ

Ա.Ա.

Արցախի տագնապին բանակցային հոլովոյթին մէջ յաջողութեան գրաւականը, որքան ատրպէյճանական կողմին հետ դէմ յանդիման նստելով՝ խօսակցութիւն, բանակցութիւն, հակաճառութիւն եւ քաղաքական սակարկութիւն է, թերեւս քիչ մը աւելիով միասնական ճակատի եւ անպարտելիութեան բաղադրիչներու ամբողջականութիւնը պահպանող կամքի դրսեւորում մըն է, որ բանակցութիւններու սեղանին շուրջ ցուցաբերուած ճարտարութեան համազօր դիմադրականութեան գործօն մը ըլլալը ոչինչի կը զիջի։
Ատրպէյճան այս իմաստով՝ շատ համատարր եւ ներդաշնակ քաղաքականութիւն մը որդեգրած է, որովհետեւ ոչ մէկ պարագայի կը շեղի իր հայատեաց եւ հայամերժ ուղեգիծէն եւ կը շարունակէ պնդել,որ Արցախեան տագնապը պէտք է լուծուի միայն՝ Ազրպէյճանի հողային ամբողջականութեան վերահաստատմամբ, միշտ եւ ամէնուրէք Լեռնային Ղարաբաղը ներկայացնելով ազրպէյճանական գրաւեալ տարածք մը։ Մանաւանդ վերջերս, կեղծ եւ արուեստական լաւատեսական մթնոլորտէ մը ետք, սաստկացած է ազրպէյճանական ապատեղեկատուութիւնը՝ իրականութիւնները գլխիվայր ներկայացնելու իմաստով։ Օրինակները բազմաթիւ են։ Գանձասարի վանքը կը ներկայացուի իբրեւ Աղուաններու կաթողիկոսանիստ վանական համալիր, որ խեղաթիւրուելով՝ հայկականի վերածուած է։Ատրպէյճանի մայրաքաղաք Պաքուի հայկական եկեղեցին իբրեւ պետութեան հաշւոյն խնամքով կը պահպանուի,մինչ Լեռնային Ղարաբաղի «գրաւեալ տարածք»-ներուն մէջ հիմնայատակ կործանուած ու քանդուած են ազրպէյճանական պատմական յուշակոթողները եւ գերեզմանաքարերը։ Տակաւին։Իբրեւ թէ արցախ Թառթար գետին վրայ կառուցուած Սարսանգի ջրամբարը իբրեւ զէնք կը գործածեն ատրպէյճանական գիւղերը քանդելու համար։ Շարքը երկար է եւ կը նկատուի առաւել համակարգուած ապատեղեկատուութիւն մը, որ արդէն իսկ վտանգաւոր տարողութիւն մը ստացած է։
Ատրպէյճանական այս ծրագրուած ապատեղեկատուական արշաւին եթէ աւելցնենք շարքը այն ռազմափորձերուն, որոնք վերջին տասներկու ամիսներուն կատարուած են եւ որուն նորագոյնը այսօր ընթացք առաւ Նախիջեւանի մէջ, պատկերը առաւել կը յստականայ, թէ Պաքուի իշխանութիւնները դէպի ուր կ՛ընթանան։
Այս կացութեան դիմաց՝ հայկական ճակատին մէջ պարզուած վիճակն է առաւել մտահոգիչը, երբ յատկապէս Երեւան- Ստեփանակերտ յստակ տարակարծութիւններ ի յայտ կու գան, վարչապետ Նիկոլ Փաշինեանի կատարած այն յայտարարութեամբ, թէ Երեւանի նախկին իշխանութիւնները ոչինչ կը փոխանցէին Ստեփանակերտի իշխանութիւններուն՝ Արցախի տագնապին բանակցութիւններուն մասին, մինչ ինք Արցախի եւ Հայաստանի ռազմաքաղաքական ղեկավարութիւններուն յստակօրէն փոխանցած է իր տեսլականը՝ տագնապին լուծման մասին եւ ստացած անոնց համաձայնութիւնը։ Իսկ մտահոգիչը այն է, թէ Հայաստանի վարչապետը Ստեփանակերտի իշխանութիւններու ներկայացուցիչներ կը մեղադրէ ընկերային հաղորդակցութեան ցանցերու մէջ սխալ տեղեկութիւններ տարածելու յանցանքով՝ զանոնք նաեւ դաւադիր ուժեր անուանելով։
Եւ չ՛ուշանար Արցախի հանրապետութեան նախագահ Բակօ Սահակեանի հակադարձութիւնը,թէ ինչպէս այսօր, նաեւ անցեալին Ստեփանակերտի իշխանութիւնները միշտ տեղեակ պահուած են բանակցային հոլովոյթին ընթացքէն եւ թէ դաւադիր ուժերու մասին փաստացի տուեալներ, եթէ գոյութիւն ունին, պէտք է Ստեփանակերտի իշխանութիւններուն փոխանցուին, որպէսզի պարտն ու պատշաճը կատարուի՝ զանոնք չէզոքացնելու համար։
Արցախի տագնապը, որ ներկայիս այնքան կարիքը ունի հայկական ճակատի ամբողջական համակարգման եւ գլխագիր միասնականութեան, պիտի ըլլայ միակ տուժողը, եթէ նման խուլ պայքար շարունակուի՝ տարակարծութիւններու այնպիսի ենթահողի մը վրայ, որ սկսած է անհանդուրժողականութեան ցուցանիշներ ի յայտ բերել՝ Երեւան- Ստեփանակերտ առանցքին վրայ։Ասիկա չափազանց վտանգաւոր է եւ ամէն բանէ առաջ այս կացութեան վերջ պէտք է դրուի։Հայութեան գերագոյն շահերը ոչ մէկ քաղաքական հոսանքէ, հատուածէ եւ կուսակցութենէ գերադաս են։ Ամենէն կարեւորը ամբողջ հայութեան՝ Հայաստան – Արցախ – Սփիւռք առանցքին վրայ համազգային շահերու ապահովման եւ երաշխաւորման նկատմամբ նախանձախնդրութիւնն ու յանձնառութիւնն է, որ վեր է բոլոր նկատառումներէն, հաշիւներէն եւ պատկերացումներէն։Ոչ ոք կրնայ ԱՄԲՈՂՋ հայութեան երազը ոչ պատանդ բռնել, ոչ ալ շահարկման առարկայ դարձնել։Եւ ասոր համար է, որ չափազանց կարեւոր է միասնականութիւնը, անհանդուրժողականութեան ընդմիշտ ջնջումը, ճակատներու միջեւ համակարգումը, Հայաստան – Արցախ – Սփիւռք ամբողջական համագործակցութիւնը՝ առանց կեղծ եւ արուեստական կարգախօսներու։Այս պարագային է, որ խօսքը պէտք է գործին համապատասխանէ, որպէսզի Հայաստան հայրենիքի կարեւորութիւնը չնսեմացուի, որպէսզի Արցախի մարտունակութեան կողին հարուած մը չտրուի, ոչ ալ Սփիւռքը ետ մղուի։ Արթնամտութեան եւ ողջախոհութեան կարիքը բոլոր ժամանակներէն աւելի հիմա պէտք է, մանաւանդ երբ քիչ մը աւելի ուշադրութեամբ հետեւինք Ազրպէյճանի իշխանութիւններուն որդեգրած բազմաշերտ քաղաքական ուղեգիծին բաղադրիչներուն։

Be the first to comment

Leave a Reply

Your email address will not be published.


*