Ա․Մ․Ն․ ԱՐԵՒԵԼԵԱՆ ՇՐՋԱՆԻ ԱԶԳԱՅԻՆ ԵՐԵՍՓՈԽԱՆԱԿԱՆ ԺՈՂՈՎ

2019-ի Ազգային Երեսփոխանական Ժողովի խմբանկարը՝ երեսփոխաններ եւ հիւրեր

Արեւելեան թեմի այս տարուան Ազգային Երեսփոխանական 61-րդ ժողովը տեղի ունեցաւ Մայիս 15-էն 18, Ուայթինզվիլի (Մասաչուսէց) մէջ, նախագահութեամբ Թեմի Բարեջան Առաջնորդ Անուշաւան Արք. Դանիէլեանի եւ հովանաւորութեամբ տեղւոյն Սուրբ Աստուածածին եկեղեցւոյ հոգաբարձութեան:

Ծուխերը ներկայացնող եկեղեցական ու աշխարհական երեսփոխանները միասնաբար ժողով գումարեցին Ազգային Վարչութեան Կրօնական ու Քաղաքական Ժողովներուն հետ, մօտակայ Ֆրամինկհէմի The Sheraton Conference Center-ին մէջ։

Տ. Աւետ քհնյ. Թէրզեան, որ կը ներկայացնէր Արեւելեան Ա․Մ․Ն․-ի  էջմիածնական թեմի  առաջնորդ՝ Դանիէլ եպս. Ֆընտըգեանը, ջերմ ողջոյններ փոխանցեց՝ Արեւելեան թեմի եւ Դանիէլ Սրբազան Հօր անունով։

Ազգային Վարչութեան ատենապետ՝ Ճէք Մարտոյեան, նիստերու բացումը կատարեց Հինգշաբթի, Մայիս 16-ի յետմիջօրէին։ Լիազօրագրերու քննութենէն եւ վաւերացումէն ետք, բարի գալուստի խօսք ուղղեց Ուայթինզվիլի եկեղեցւոյ հոգեւոր հովիւ՝ Տ. Միքայէլ քհնյ. Տէր Խոսրովեան։ Ան դիտել տուաւ, որ 2019-ի այս ժողովին հիւրընկալումը պատիւ մըն էր իր ծուխին համար։ Հոգաբարձութեան ատենապետ՝ Րաֆֆի Սամքարանեան, իր բարի գալուստի խօսքերուն մէջ ընդգծեց, որ առաջին անգամն էր, որ Սուրբ Աստուածածին եկեղեցին նման ժողով մը կը հիւրընկալէր։ «Սկիզբը թերահաւատ էի», բացայայտեց ան, «բայց Տէր Հօր եւ Պարպրա Պէրպէրեանի ու Յակոբ Անդրանիկեանի գլխաւորած հոյակապ յանձնախումբի առաջնորդութեամբ ու հսկողութեամբ՝ ամէն ինչ իր տեղը գտաւ հեզասահ կերպով»։

Երեսփոխանական Ժողովի համա-ատենապետներ ընտրուեցան՝ Արամ Սարաֆեան (Սուրբ Խաչ եկեղեցի, Պեթեստա, Մերիլընտ) եւ Սիմոնէ Թոփուզեան (Սուրբ Սարգիս եկեղեցի, Տիրպորն, Միշիկըն)։ Ատենադպիրի պաշտօնին ընտրուեցան․- Էնտրիւ Ասատուրեան՝ անգլերէնի համար (Սուրբ Գրիգոր եկեղեցի, Կրանիթ Սիթի, Իլինոյ) եւ Տ. Թորգոմ քհնյ. Չորպաճեան՝ հայերէնի համար (հոգեւոր հովիւ՝ Սուրբ Գրիգոր եկեղեցի, Կրանիթ Սիթի, Իլինոյ)։

Գերշ. Տ. Անուշաւան արք. Դանիէլեան իր ուղերձին (https://hairenikweekly.com/38813) մէջ շնորհակալութիւն յայտնեց հիւրընկալ ծուխին՝ անոր ստանձնած պատասխանատուութեան համար։ Ան նաեւ շնորհակալութիւն յայտնեց արեւմտեան եւ գանատական թեմերու առաջնորդներուն՝ Մուշեղ արք. Մարտիրոսեանին եւ Բաբգէն արք. Չարեանին, միաժամանակ նաեւ յիշելով ու շնորհակալութիւն յայտնելով իր երկու նախորդներուն, որոնց առաջնորդութեան օրերուն ծառայած է նոյն այս թեմին մէջ՝ հոգելոյս Մեսրոպ արք. Աշճեան եւ Օշական արք. Չօլոյեան։

Ի տարբերութիւն նախորդ տարիներու, Մեծի Տանն Կիլիկիոյ Կաթողիկոս Արամ Ա.ի ուղերձը ուղղուած էր Հիւսիսային Ամերիկայի երեք թեմերուն ու իրենց Երեսփոխանական Ժողովներուն։ Նորին Սրբութեան ուղերձը, որ կարդաց Հոգշ. Տ. Սահակ Ծ. վրդ. Եմիշեան, ի մասնաւորի կ՚ըսէր.

«Ինչպէս կը նշմարէք, այս տարի Հիւսիսային Ամերիկայի երեք թեմերուն նոյն պատգամը կը յղենք, նկատի ունենալով՝ ձեր թեմերուն միջեւ գոյութիւն ունեցող հասարակաց մտահոգութիւններն ու մարտահրաւէրները, ինչպէս նաեւ այս ուղղութեամբ յառաջիկային ձեր ունենալիք միջ-թեմական խորհրդակցութիւններու անհրաժեշտութիւնը։

Վերջին Ազգային Ընդհանուր Ժողովին ուղղուած հայրապետական Մեր պատգամին մէջ յատուկ տեղ յատկացուցած էինք թեմերու վերակազմակերպումին։ Հիւսիսային Ամերիկայի թեմերու վերակազմակերպումին գծով, 26 Յունուար, 2017, թուակիր Մեր նամակով ձեզի փոխանցած էինք աշխատանքային ծրագիր մը (plan of action)։ Ապա, թեմերուն ուղղուած Մեր շրջաբերականով եւ ժողովական աշխատանքներու ընթացքին Մեր ընդհանուր պատկերացումը փոխանցեցինք ձեզի։ Բոլոր թեմերը, վստահաբար նաեւ ձեր թեմերը, արդէն լծուած են այս աշխատանքին։ Որպէսզի այս յոյժ կարեւոր գործընթացքը ծրագրուած ըլլայ, յիշեցումի կարգով, կ՚ուզենք հետեւեալ կէտերը ընդգծել»։

Այնուհետեւ, Նորին Սրբութիւնը շեշտեց երեք կէտեր.

ա) Վերակազմակերպութեան գործընթացը,

բ) Ժողովուրդին ծառայութիւնը՝ մեր ծուխերու ընդմէջէն,

գ) Բանիմաց, փորձառու եւ նուիրուած երիտասարդ հոգեւորականներու պատրաստութիւնը։

Նորին Սրբութիւնը աւարտեց իր պատգամը թելադրելով, որ վեց ամիսէն, երեք թեմերը հանդիպում մը ունենան Անթիլիասի մէջ՝ միասնաբար քննելու եւ քննարկելու անոնց կատարած գործը։

Համակարգող՝ Քարէն Ճէհանեան, ներկայացուց հետեւեալ խմբական ժողովներու նիւթերը՝ Կիրակնօրեայ դպրոցներ (Գերպ. Հ. Սահակ Ծ. վրդ Եմիշեան), Youth Ministry (Անի Օվանէսեան), Ծուխերու ներգրաւում (Մելինէ Մեսրոպեան), Ծուխերու ներդրումներ եւ ծխականներու հանդէպ պատասխանատուութիւն (Րաֆիի Ուրլեան), Ծուխերու ապահովագրութեան ծրագիր (Մարք Ֆիլիփս), Կանոնագրութիւն, Պիւտճէ (Րաֆֆի Ուրլեան)։

Երեսփոխանները արձանագրուեցան իրենց նախընտրած խմբական ժողովին, որ Երեսփոխանական Ժողովին ներկայացուելիք գործունէութեան բանաձեւեր մշակեց։

Երեսփոխանական Ժողովի այլ նշելի դէպքեր էին Տ. Արամ Ա. քհնյ. Ստեփանեանի համառօտ զեկոյցը իր կողմէ անցեալ ինը տարիներուն ղեկավարուող ու Հայաստանի մէջ տեղի ունեցող ամառնային ճամբարին մասին՝ որբերու համար, ինչպէս եւ Հաղորդակցութիւններու Բաժանմունքին պատրաստած տեսերիզը Ազգ. Առաջնորդարանի տարբեր յայտագիրներու մասին, որ ցուցադրուեցաւ երեսփոխաններուն եւ գնահատանքի արժանացաւ։ «Հայրենիք» ընկերակցութեան եւ Հայ Օգնութեան Միութեան ներկայացուցիչներ հրաւիրուեցան խօսք ուղղելու ժողովին։

Մայիս 17-ի երեկոյեան, Ամերիկայի Հայկական Թանգարանին (Ուոթըրթաուն) մէջ տեղի ունեցած ընթրիքի պահուն

Մայիս 17-ի երեկոյեան, երեսփոխաններն ու տեղական ծխականները միասնաբար ընթրեցին։ Համադամ ընթրիքն ու վայրին իւրայատկութիւնը (Ամերիկայի Հայկական Թանգարանը, Ուոթըրթաուն) ստեղծեցին մթնոլորտ մը, որ Երեսփոխանական Ժողովի ներգրաւման ու յայտնաբերման թեմային հետ համահունչ էր։ Խիտ, սակայն իմաստալից յայտագիրը վարեց Ազգային Վարչութեան ատենապետ՝ Ճէք Մարտոյեանը։ Արժ. Տ. Միքայէլ Տէր Խոսրովեան երեսփոխանները ջերմօրէն ողջունեց, սրտագին շնորհակալութիւն յայտնելով Ուայթինզվիլի Սուրբ Աստուածածին եկեղեցւոյ յանձնախումբին ու ծխականներուն, որոնք սիրով ստանձնած էին Երեսփոխանական Ժողովը կազմակերպելու դժուարին աշխատանքը, որ սովորաբար աւելի մեծ ծուխերու պարտականութիւնն է։

Առաջնորդարանի գնահատագիրը շնորհուեցաւ Տիար Յակոբ Անդրանիկեանին՝ Սուրբ Աստուածածին եկեղեցւոյ եւ Առաջնորդարանիս իր մատուցած տարիներու ծառայութեան համար։

Անուշաւան արքեպիսկոպոս եւ Ճէք Մարտոյեան Առաջնորդարանի բարձրագոյն պարգեւը՝ «Առաջնորդարանի արծիւը», կը յանձնեն դատաւոր Սարգիս Թշոյեանին։

Անուշաւան արքեպիսկոպոս շնորհակալութիւն յայտնեց Ուայթինզվիլի համայնքին եւ բոլոր երեսփոխաններուն, որոնք տեսիլքով ու վճռակամութեամբ իրենց մասնակցութիւնը բերին։ Այնուհետեւ, ան յանձնեց շարք մը պարգեւներ Ազգային Առաջնորդարանին կողմէ։ Թէեւ բոլոր ենթակաները անակնկալի եկած էին, սակայն ոչ աւելի քան Ազգային Առաջնորդարանի բարձրագոյն պարգեւը՝ «Առաջնորդարանի Արծիւ»ը ստացողը՝ դատաւոր Սարգիս Թշոյեան, որ իր կնոջ՝ Արտեմիսին հետ ներկայացաւ։ Դատաւոր Թշոյեան աւելի քան կէս դար Հայ Եկեղեցւոյ ու Առաջնորդարանին զօրավիգ կանգնած է, շնորհալիօրէն վարելով բազմաթիւ պատասխանատու պաշտօններ։

Պարպրա եւ Ճան Պէրպէրեան Առաջնորդարանի գնահատագիրներ ստացան՝ Ուայթընզվիլի համայնքին իրենց նշանակալից ծառայութեան համար

Շնորհակալութիւն յայտնելով Առաջնորդ Սրբազան Հօր, դատաւոր Թշոյեան բոլորին վստահեցուց, թէ «ստացած է շատ աւելին, քան տուածը»։ Անոր խօսքերուն հետեւող որոտընդոստ ծափահարութիւնը լի էր յարգանքով ու հիացումով՝ Առաջնորդարանիս ամենէն զօրաւոր հիմնաքարերէն մէկուն հանդէպ։ Առաջնորդարանի գնահատագրեր յանձնուեցան՝ Ճան Պէրպէրեանին, Պարպրա Պէրպէրեանին եւ Յակոբ Անդրանիկեանին՝ Ուայթինզվիլի երեք ծխականներ, որոնք խորապէս ներգրաւուած էին այս ժողովին կազմակերպութեան մէջ։

Առաջնորդարանի գնահատագիրը շնորհուեցաւ Տիար Յակոբ Անդրանիկեանին

Տիկնանց Միութիւններու Ընկերակցութեան համագումարը տեղի ունեցաւ Երեսփոխանական Ժողովին զուգընթաց։ Երէցկին Մակի Գույումճեան ներկայացուց Ընկերակցութեան տեղեկագիրը Ժողովին։ Իրենց քննարկումներուն ժամանակ, պատուիրակները Ընկերակցութեան շարքերը յաւելեալ յանձնառութեան մղելու եղանակներ քննեցին։ Գլխաւոր բանախօսը Նայիրի Պալճեանն էր։ «Աղօթքի ուժը» նիւթին շուրջ խօսելով, ան հիմնուեցաւ իր անձնական փորձառութեան վրայ, բացատրելով՝ թէ ինչո՞ւ կ՚աղօթենք ու ամէն ինչ Աստուծոյ ձեռքը կը դնենք։

Տիկնանց Միութիւններու Ընկերակցութեան 2018-2019ի վարչութեան անդամուհիները

Անոր անձնական պատմութիւնը յուզեց մեծաթիւ ներակները։ 2019-2020 տարեշրջանին, Տիկնանց Միութիւններու Ընկերակցութեան վարչութիւնը հետեւեալ կազմը պիտի ունենայ. ատենապետուհի՝ Մարիան Պուտաքեան, փոխատենապետուհի՝ երէցկին Նեկտար Մանուկեան, թղթակցութիւններու ատենադպրուհի՝ երէցկին Մակի Գույումճեան, ատենադպրուհի՝ Ռոզմէրի Խաչատուրեան, գանձապահուհի՝ Մատոննա Գզիրեան, խորհրդական՝ Ճոյս Պաղտասարեան։

Առաջնորդ Սրբազան Հայրն ու Տ. Միքայէլ Տէր Խոսրովեանը՝ երիտասարդ Չարլզ Ուիթըլսիի հետ,որ տեղական ծուխին կողմէ գնահատուեցաւ իր ղեկավարական ձիրքերուն ու ծառայութեան համար։

Ազգային Երեսփոխական Ժողովի պաշտօնական աւարտէն առաջ, Ֆիլատելֆիայի պատուիրակութիւնը հրաւիրեց երեսփոխաններ, որպէսզի յառաջիկայ տարի մասնակցին 2020ի ժողովին։ Գալիք տարուան ժողովը պիտի հիւրընկալուի Ֆիլատելֆիայի Սուրբ Գրիգոր Լուսաւորիչ եկեղեցւոյ կողմէ։

Ազգային Առաջնորդարանի տարեկան վիճակահանութիւնը տեղի ունեցաւ Մայիս 17-ի երեկոյեան ընթրիքի աւարտին։ Անդրանիկ Պուտաքեանի, Յակոբ Անդրանիկեանի եւ այլոց վերջին վայրկեանի ճիգին շնորհիւ, այս տարուան վիճակահանութիւնը երբեւէ լաւագոյններէն մէկը դարձաւ։Վիճակահանութեան արշաւի ընթացքին հաւաքուած գումարը Առաջնորդարանի բազմաթիւ ծրագիրներու հիմնական աղբիւրն է։

2019ի յաղթողները՝

Ա. մրցանակ ($5,000)՝ Liberty Contracting Corp.

Բ. մրցանակ ($2,000)՝ Անիթա Մասոյեան։

Գ. մրցանակ ($1,000)՝ Թամար Քանարեան։

Դ. մրցանակ ($1,000)՝ Նայտա Ոսկերիչեան։

Ե. մրցանակ ($1,000)՝ Զապէլ Հաճեան Ազապլար։

 

 

 

 

 

 

 

 

 

 

 

 

 

 

Be the first to comment

Leave a Reply

Your email address will not be published.


*