ՄՈՒՇԵՂ ԱՒԱԳ ՔԱՀԱՆԱՅ ՏԷՐ ԳԱԼՈՒՍՏԵԱՆԻ ՄԱՀՆ ՈՒ ՎԵՐՋԻՆ ՕԾՈՒՄԸ


 

Չորեքշաբթի, Մայիս 29-ին, Անուշաւան արքեպիսկոպոս կատարեց Մուշեղ Ա. քհնյ. Տէր Գալուստեանի վերջին օծումը՝ Սուրբ Լուսաւորիչ Մայր Եկեղեցւոյ մէջ։ Արեւելեան թեմի հոգեւորականները մասնակցեցան վերջին օծման։ Անուշաւան Սրբազան Հօր հետ նկարուած են՝ ձախէն աջ, Հ. Սահակ Ծ. վրդ. Եմիշեան՝ առաջնորդական փոխանորդ, Տ. Վազգէն Ա. քհնյ. Պեքիարեան՝ արտահաս քահանայ, Տ. Ստեփան քհնյ. Պալճեան՝ Ս. Գրիգոր եկեղեցւոյ (Նորթ Անտովըր) հոգեւոր հովիւ, Տ. Ներսէս Ա. քհնյ. Մանուկեան՝ Կրօնական Ժողովի ատենապետ եւ Ս. Գրիգոր Լուսաւորիչ (Ֆիլատելֆիա) եկեղեցւոյ հոգեւոր հովիւ, եւ Տ. Գաբրիէլ քհնյ. Նազարեան՝ Ս. Վարդանանց (Փրովիտընս) եկեղեցւոյ հոգեւոր հովիւ։

Ուրբաթ, Մայիս 24-ին, իր մահկանացուն կնքած էր Արժ. Տ. Մուշեղ Ա. քհնյ. Տէր Գալուստեան (1932-2019), Նիւ Եորքի մէջ, խոր ցաւի մատնելով Արեւելեան թեմի ամբողջ ընտանիքը։ Նորոգ հանգուցեալ եկեղեցականը աւելի քան կէս դարու ծառայութիւն կատարած էր Արեւելեան թեմին մէջ։ 1959-1968-ին, ան պաշտօնավարած էր իբրեւ հոգեւոր հովիւ՝ Ռէյսինի (Ուիսքանսըն) Սուրբ Յակոբ եւ Ուսթըրի (Մասաչուսէց) Սուրբ Երրորդութիւն եկեղեցիներուն մէջ, իսկ 1968-1998-ին ծառայած՝ իբրեւ Սուրբ Լուսաւորիչ Մայր Եկեղեցւոյ հոգեւոր հովիւ։ 2000 թուականին հանգստեան կոչուելէ ետք, ան շարունակած էր ծառայել թեմին իբրեւ արտահաս եկեղեցական։ Հանգուցեալի ընկերային եւ սրամիտ անհատականութիւնը մագնիսի պէս կը գրաւէր մարդիկ՝ երիտասարդ թէ տարեց, հայ թէ ոչ-հայ։ Մայր Եկեղեցւոյ շրջակայքի մանուկները սովոր էին զինք կոչել «Father Mike»։ Մուշեղ Ա. քհնյ. Տէր Գալուստեանի տան կարգն ու վերջին օծման Ս. Պատարագը տեղի ունեցան Մայիս 28-29-ին, Նիւ Եորքի Սուրբ Լուսաւորիչ Մայր Եկեղեցւոյ մէջ։ Մարմինը ամփոփուեցաւ Սիտըր Կրով (Ֆլաշինկ, Նիւ Եորք) գերեզմանատան մէջ, որմէ ետք տեղի ունեցաւ հոգեճաշ մը՝ Տակլըսթընի (Նիւ Եորք) Սուրբ Սարգիս եկեղեցւոյ մէջ։

Փոխան ծաղկեպսակի նուիրատուութիւններ կարելի է կատարել Ս. Լուսաւորիչ Մայր Եկեղեցւոյ՝ “Rev. Moushegh Orphan Fund” նշումով։

 

 

Be the first to comment

Leave a Reply

Your email address will not be published.


*