Հ․Հ․ Նախագահ Արմէն Սարգսեան Հիւրընկալեց Հ․Յ․Դ․-ի Ներկայացուցիչները

ԵՐԵՒԱՆ․- Մայիս 27-ին, Հայաստանի Հանրապետութեան նախագահ Արմէն Սարգսեան հիւրընկալեց Հ․Յ․Դ․-ի պատուիրակութիւնը՝ Հ․Յ․Դ․ Բիւրոյի ներկայացուցիչ Յակոբ Տէր Խաչատուրեանի եւ Գերագոյն Մարմնի ներկայացուցիչ Իշխան Սաղաթէլեանի գլխաւորութեամբ:

Հանդիպման ընթացքին, խօսուեցաւ  Հ․Հ․  նախագահ Արմէն Սարգսեանի նախաձեռնութեամբ յառաջիկային կայանալիք հայաստանեան «Մտքերու վեհաժողովին» (Summit of Minds) մասին, որ պիտի համախմբէ աշխարհի յայտնի վերլուծական կեդրոններու, նախկին ու ներկայ պետական եւ քաղաքական գործիչներու, բարձր գիտարուեստի ոլորտի աշխարհահռչակ ընկերութիւններու ներկայացուցիչներ:

Յակոբ Տէր Խաչատուրեան ողջունեց նման հեղինակաւոր գիտաժողով Հայաստանի մէջ կատարելու նախաձեռնութիւնը: Զրուցակիցները խօսեցան նաեւ համահայկական օրակարգի տարբեր խնդիրներու մասին:

Նշուեցաւ, որ բոլոր քայլերը պէտք է ուղղուած ըլլան ուժեղ, զարգացած, պաշտպանուած եւ օրէնքներով առաջնորդուող երկիր կառուցելուն, նաեւ կարեւոր նկատուեցաւ խոր յարգանքը՝ պետական հաստատութիւններուն հանդէպ:

Զրուցակիցները պատրաստակամութիւն յայտնեցին համագործակցելու համահայկական տարբեր ծրագիրներու շուրջ:

 

 

Be the first to comment

Leave a Reply

Your email address will not be published.


*