Հայկազեան Համալսարանի Տնօրէն Վերապատուելի Դոկտ. Փօլ Հայտոսթեան Այցելեց Արժանթին

ՊՈՒԷՆՈՍ ԱՅՐԷՍ․- Ապրիլ 23-30-ին Հայկազեան համալսարանի նախագահ վերապատուելի դոկտ. Փոլ Հայտոսթեան գործուղուեցաւ դէպի Արժանթին, որուն նպատակն էր Հայկազեան համալսարանի եւ Հարաւային Ամերիկայի կարգ մը համալսարաններու եւ ուսումնասիրական կեդրոններու միջեւ համագործակցութեան եզրեր գտնել, ինչպէս նաեւ յարաբերական կապերու ստեղծումը` Պուէնոս Այրէսի եւ Ռոսարիոյի հայկական եւ լիբանանեան համայնքներու ծանօթութիւն:
Վերապատուելի Հայտոսթեան «Միջին Արեւելքի քրիստոնէութեան դերը տարածաշրջանի զարգացման եւ կայունութեան մէջ» նիւթով ակադեմական զեկուցում մը ներկայացուց Պուէնոս Այրէսի Argentine Council for International Relations կեդրոնին մէջ: Ան այցելեց նաեւ շրջանին մէջ գործող հայկական կազմակերպութիւններուն` Հ․Մ․Ը․Մ․, Հ․Բ․Ը․Մ․, Մարաշի հայրենակցական միութիւն Հարաւային Ամերիկայի Հայ դատի մարմին, ինչպէս նաեւ` Արժանթինի մէջ Հայաստանի դեսպանատուն եւ «Սուրիա-լիբանանեան» ակումբ: Վերոնշեալ հանդիպումներուն կը մասնակցէր Հայկազեան համալսարանի 1985-ի շրջանաւարտ դոկտ. Խաչիկ Տէր Ղուկասեանը:
Ռոսարիոյի մէջ վեր. Հայտոսթեան հիւրընկալուեցաւ տեղւոյն պետական համալսարանի հայկական ամպիոնին կողմէ:
Հանդիպումներու ծիրին մէջ եւ անոնց արդիւնքով վեր. Հայտոսթեան համաձայնութեան յուշագիրներ ստորագրեց Ռոսարիոյի պետական եւ Լատին-ամերիկեան մանկավարժական համալսարաններուն հետ: Ակադեմական համագործակցութիւնը պիտի կեդրոնանայ հայկական հարցերու ուսումնասիրութեանց, միջազգային յարաբերութիւններու եւ հայ ու լիբանանեան գաղութներու խնդիրներուն շուրջ:
Վերապատուելի Հայտոսթեան Ռոսարիոյի պետական համալսարանին կողմէ կազմակերպուած «Հայկական հարցը եւ միջազգային յարաբերութիւնները» նիւթով սեմինարին բացման դասախօսութիւնը ներկայացուց, ինչպէս նաեւ դասախօսեց Լատին-ամերիկեան մանկավարժական համալսարանին ու հայկական եւ լիբանանեան համայնքներու կազմակերպութիւններու համագործակցութեամբ կազմակերպուած ձեռնարկին: Վեր. Հայտոսթեան Հայոց ցեղասպանութեան 104-ամեակին նուիրուած երկու ձեռնարկներու ընթացքին ելոյթ ունեցաւ Ռոսարիոյի Յիշատակի թանգարանի եւ քաղաքի Հայոց ցեղասպանութեան յուշահամալիրին շուրջ: Ռոսարիոյի լիբանանեան համայնքը Հայտոսթեանը պատուեց յատուկ ճաշկերոյթով: Այցելութեան վերջին օրը Հայկազեանի նախագահը պաշտօնական հանդիպում մը ունեցաւ Ռոսարիոյի համալսարանի իր գործընկերոջ՝ Հեքթոր Ֆլորիանիի հետ եւ Հայկական ամպիոնի պատասխանատուներու եւ այլ ակադեմականներու ներկայութեամբ փոխանակուեցան համագործակցութեան համաձայնագրի փաստաթուղթերը:
Պուէնոս Այրէսի մէջ վեր. դոկտ. Փոլ Հայտոսթեան առիթը ունեցաւ այցելելու Հայ աւետարանական Սուրբ Երրորդութիւն եկեղեցին, ուր Հայոց ցեղասպանութեան 104-ամեակին պաշտամունքի ընթացքին տուաւ օրուան պատգամը:
Նաեւ, ան ներկայ գտնուեցաւ Հ․Մ․Ը․Մ․-ի կազմակերպած ապրիլեան աւանդական մատաղին: Իր այցելութեան նախավերջին օրը, Հայտոսթեանը ընդունեց Արժանթինի մօտ Հայաստանի Հանրապետութեան լիազօր դեսպան Եսթեր Մկրտումեան, իսկ վերջին գիշերը, նախքան օդակայան մեկնիլը, ան մասնակցեցաւ Հ.Յ.Դ.-ի Հարաւային Ամերիկայի Կեդրոնական կոմիտէի կողմէ տարածքաշրջան այցելող Արցախի պատուիրակութեան ի պատիւ տրուած ընթրիքին:

Be the first to comment

Leave a Reply

Your email address will not be published.


*