Հ.Յ.Դ. Բիւրոյի Ներկայացուցիչը Այցելեց Լիբանանի Նախագահին


ՊԷՅՐՈՒԹ․- Հինգշաբթի, Մայիս 2-ին, Հ․Յ․Դ․ Բիւրոյի ներկայացուցիչ Յակոբ Տէր Խաչատուրեան եւ Հ․Յ․Դ․ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի այցելեցին հանրապետութեան նախագահ Միշել Աունի:

Հանդիպումին ընթացքին քննարկուեցան ընդհանուր հարցեր։ Յակոբ Տէր Խաչատուրեան շնորհակալութիւն յայտնեց նախագահ Աունին` լիբանանահայութեան եւ սփիւռքահայութեան նկատմամբ անոր ցուցաբերած հետաքրքրութեան եւ գուրգուրանքին համար` շեշտելով, որ հայութեան նկատմամբ նախագահ Աունի կեցուածքներն ու զգացումները յարգանքի եւ գնահատանքի արժանի են: Նաեւ, Տէր Խաչատուրեան նախագահ Աունի տրամադրութեան տակ դրաւ լիբանանեան ծագում ունեցող բոլոր սփիւռքահայերուն կարողութիւնները` ի խնդիր Լիբանանի շահերուն իրականացման:

Նշենք, թէ Հ․Յ․Դ․ Բիւրոյի ներկայացուցիչը, նաեւ այցելեց հայ կաթողիկէ առաջնորդարան։ Հանդիպումին ներկայ էին Հայ կաթողիկէ Պէյրութի թեմի օգնական եպիսկոպոս Գէորգ եպս. Ասատուրեան, Գէորգ արք. Խազումեան, Մանուէլ եպս. Պաթագեան, ժողովրդապետ Սեպուհ վրդ. Կարապետեան եւ օգնական ժողովրդապետ տէր Կարապետ Թադէոսեան, ինչպէս նաեւ Յակոբ Բագրատունի:

Նաեւ, կատարուեցաւ հանդիպում  Մերձաւոր Արեւելքի Հայ աւետարանական եկեղեցիներու միութեան նախագահ վեր. Մկրտիչ Գարակէօզեանի հետ։ Ծանօթացման բնոյթ ունեցող հանդիպման ընթացքին քննարկուեցան համահայկական խնդիրները, կարեւորութեամբ շեշտուեցան հայրենիք-սփիւռք յարաբերութիւնը եւ միջյարանուանական համագործակցութիւնը: Վեր. Գարակէօզեան ներկայացուց հայ աւետարանական համայնքի ծառայութիւնները Հայաստանի եւ սփիւռքի մէջ:

Be the first to comment

Leave a Reply

Your email address will not be published.


*