ՆԻՒ ԵՈՐՔ.- ՀԱՒԱՔ՝ «ԹԱՅՄԶ» ՀՐԱՊԱՐԱԿԻ ՇՈՒՐՋ

Լուսանկարներ՝ Թալին Պապայեան

ՆԻՒ ԵՈՐՔ.- Կիրակի, Ապրիլ 28-ին, Հայոց Ցեղասպանութեան 104-ամեակը նշուեցաւ, քաղաքի սիրտն ու կեդրոնը հանդիսացող «Թայմզ» հարապարակին շուրջ:
Քաղաքի եւ մօտակայ շրջաններէն ժամանած հայորդիներու կողքին, ներկայ էին, նաեւ քոնկրէսականներ՝ Ճէք Շումըր (Դեմոկրատական – Նիւ Եորք), Ռապըրթ Մենենտէս (Դեմոկրատական – Նիւ Ճըրզի) եւ Ֆրանք Փալոն (Դեմոկրատական – Նիւ Ճըրզի):
Մէկ վայրկեան յոտնկայս յարգելէ ետք անմեղ զոհերու յիշատակը, «Շուրջ Պար»-ով մը հայորդիներ ուզեցին փաստել, թէ հակառակ կատարուած ցեղասպանութեան, կարելի եղած է դիմանալ, վերստին ապրիլ, գործել ու յառաջանալ։ Էլի Պէրպէրեանի հնչեցուցած «Գետաշէն»-ը աւելի խանդավառութիւն ստեղծեց։ Նոյնիսկ զբօսաշրջիկներ հետաքրքրութեամբ, հետեւեցան այս հանդիսութեան։
Քոնկրէսական Շումըր, գերխանդավառ, այս հաւաքէն, խօսք առնելով ըսաւ.- «Հրաշալի ժողովուրդ։ Որքան աւելի հայ ունենանք, այդչափ աւելի լաւ ընթացքի մէջ կ’ըլլայ մեր Ամերիկան։ Երբ որ ցեղասպանութիւն մը պատշաճօրէն չճանչցուի եւ ճնշուի, այդ պարագային կրնայ այլ ցեղասպանութիւններու պատճառ դառնալ։ Բարոյական պարտաւորութիւն ունինք։ Կարելի չէ ընդունիլ որեւէ պատճառաբանութիւն։ Եկէ՛ք միասնաբար յիշենք յիշատակը մէկուկէս միլիոն զոհերուն։ Դեռ աւելին, այդ Ցեղասպանութեան ետին կանգնող փաշաներն ու նոյնինքն Օսմանեան կայսրութիւնը չկան այլեւս, բայց հայութիւնն ու Հայաստանը կան եւ դեռ ալ կը զօրանան», ըսաւ Շումըր։
Քոնկրէսական Ռապըրթ Մենենտէս իր կարգին շեշտեց, թէ կարելի չէ ծածկել իրականութիւնը։ «Պիտի աշխատինք ամէն գնով պարտադրել ներկայ Անգարայի ղեկավարութեան, որպէսզի դուրս գայ իր ուռացման քաղաքականութէնէն եւ ոչ թէ միայն ճանչնայ հայոց ցեղասպանութիւնը, այլ նաեւ կատարէ հատուցում։ Այս գծով պէտք է հետեւողական պայքար մղել։ Չմոռնանք նաեւ Արցախը, որուն քաջ ժողովուրդը, իր կարգին կրցաւ դէմ դնել եւ որոշել իր ազատ ու անկախ ապագան», յայտնեց ան։
Ֆրանք Փալոն իր կարգին, խօսք առնելով, շեշտեց,- «Թէ՛ Թուրքիա եւ թէ՛ Միացեալ Նահանգներ պէտք է որ անպայմանօրէն ճանչնան Հայոց Ցեղասպանութիւնը։ Արդէն իսկ յիսունէն 49 նահանգ պաշտօնապէս կը ճանչնան Հայոց Ցեղասպանութիւնը։ Կարելի չէ մոռնալ, կարելի չէ մոռցնել, կարելի չէ այլեւս իրականութիւնը տարածել», ըսաւ ան շնորհակալութիւն մաղթելով ներկաներուն։
Բեմ բարձրացողներու շարքին էր նաեւ Նիւ Եորքի քոնկրէսական տիկին Քարոլին Մալոնի (Դեմոկրատական – Նիւ Եորք), որ շեշտեց, թէ այսօր ան հպարտ կը զգայ այս հաւաքին մասնակցելու եւ արդարութիւն պահանջելու։
Խօսք առին նաեւ Հայ Դատի յանձնախումբի նախկին նախագահ Քէն Խաչիկեան, Ա.Մ.Ն. Արեւելեան շրջանի առաջնորդներ՝ Դանիէլ Ֆընտըքեան եւ Անուշաւան Դանիէլեան։
Գեղասրուեստական յայտագրով հարուստ այս հաւաքը տեւեց աւելի քան երկու ժամ։

Be the first to comment

Leave a Reply

Your email address will not be published.


*