Շահան Արծրունի Իր Ծննդեան 75-րդ Տարեդարձը Կը Նշէ Դաշնակի Մենահամերգով

ՆԻՒ ԵՈՐՔ․- Ծանօթ դաշնակահար Շահան Արծրունիի ծննդեան 75-ամեակին նուիրուած համերգը, որ Ապրիլ 5-ին տեղի ունեցաւ Նիւ Եորքի Alliance Francaise Florence Gould սրահին մէջ, ողջունուեցաւ ներկայ երաժշտասէր հոծ բազմութեան բուռն ծափահարութիւններով։ Նուագահանդէսը կազմակերպուած էր Հայկական բարեգործական ընդհանուր միութեան, ինչպէս նաեւ Ամերիկայի արեւելեան թեմի առաջնորդարաններու, Հայ օգնութեան ֆոնտի, Հայ ժողովուրդի անմիջական օգնութեան եւ Հայկական ռատիոժամի կողմէ։
Այս նշանակալից տարեդարձին առիթով յայտնի դաշնակահար, յօրինող, երաժշտագէտ եւ ուսուցիչ Շահան Արծրունի հմայեց ներկաները ներկայացնելով ինքնատիպ յայտագիր մը, որուն մաս կը կազմէին դասական եւ հայկական երաժշտութենէն նմոյշներ։ Համերգի ընթացքին ան պատմեց դրուագներ եւ տուաւ բացատրութիւններ Ալան Յովհաննէսի եւ Եդուարդ Միրզոյեանի անձերուն եւ գործերուն մասին։ Անոնք Արծրունիի մօտիկ բարեկամները եղած էին։
Շահան Արծրունի ելոյթ ունեցած է աշխարհի չորս ծագերուն եւ արժանացած է մեծ գնահատանքի։ Ան ծանօթ է որպէս հայկական երաժշտութեան ջերմ հաւատացող մը եւ ամէն ջանք ի գործ դրած է տարածելու համար ազգային մշակոյթը։ Առ ի գնահատութիւն իր մշակութային անխոնջ ծառայութեան ան արժանացած է Հայաստանի հանրապետութեան Մովսէս Խորենացիի անուան նախագահական շքանշանին։ 2003 թուականին, Արամ Խաչատուրեանի ծննդեան 100-ամեակին առթիւ, ան նշանակուած է Հայաստանի մշակութային նախարարութեան ներկայացուցիչը։ Արծրունի ստացած է նաեւ Ս. Սահակ եւ Ս. Մեսրոպ շքանշանը եւ Հայրապետական կոնդակը՝ լուսահոգի Գարեգին Ա. Ամենայն հայոց կաթողիկոսին կողմէ։
Ամերիկայի արեւելեան թեմի առաջնորդ Հոգշ. Տ. Դանիէլ Վրդ. Ֆընտըգեան իր ուղերձին մէջ կը գրէ. «Արծրունի անզուգական է հայկական երաժշտութեան ժառանգը տարածելու իր առաքելութեան մէջ։ Ան ոչ միայն կը տարածէ մեծն Խաչատուրեանի, Յովհաննէսի եւ անմահ Կոմիտասի ստեղծագործութիւնները, այլ նաեւ՝ Միրզոյեանի, Պապաճանեանի, Մանսուրեանի եւ Զաքարեանի նման յօրինողներու գործերը»։ Հայկական երաժշտութիւնը ծանօթացնելու իր առաքելութեան բերմամբ՝ Արծրունի իբրեւ բազմակողմանի արուեստագէտ եւ մշակոյթի անխոնջ դեսպան, մեծապէս գնահատուեցաւ ամբողջ համերգի ընթացքին։ New York Concert Review-ի գրախօսականը կ՚ըսէ. «Ծրագիրը լի էր նրբութիւններով եւ նորութիւններով, զորս՝ հիանալի մթնոլորտի մը մէջ՝ Արծրունի վառ գոյներով ի յայտ բերաւ։

Կ. Պոլսոյ Հայոց Պատրիարքարանի Կրօնական Ժողովի ատենապետ՝ Գերշ. Տ. Սահակ եպս. Մաշալեան, Գերշ. Տ. Անուշաւան արք. Դանիէլեան, Արեւելեան թեմի (էջմիածնական) առաջնորդ՝ Հոգշ. Տ. Դանիէլ վրդ. Ֆնտըքեան եւ փոխանորդ՝ Հոգշ. Տ. Մեսրոպ վրդ. Պարսամեան։

Համերգի աւարտին տեղի ունեցաւ յատուկ ընդունելութիւն մը Հայկական բարեգործական ընդհանուր միութեան կեդրոնին մէջ։ Նկատի ունենալով Արծրունիի երկար տարիներու գործակցութիւնը Միութեան հետ (1964-էն սկսեալ մինչեւ ներկայ օրերս), նախագահ Պերճ Սեդրակեան այսպէս արտայայտուեցաւ. «Շահան Արծրունի եզակի երեւոյթ մըն է։ Մեր նպատակն է նոր սերունդը ներշնչել եւ անոնց ներկայացնել օրինակներ իրենց ինքնութիւնը աւելի լաւ ճանչնալու եւ պահպանելու համար։ Ահա՛, Արծրունի այդ անձն է»։

Be the first to comment

Leave a Reply

Your email address will not be published.


*