ՀԱՅՈՑ ՑԵՂԱՍՊԱՆՈՒԹԵԱՆ 104-ԱՄԵԱԿԻ ՆՇՈՒՄ՝ ՄԱՍԱՉՈՒՍԷՑԻ ՆԱՀԱՆԳԱՅԻՆ ՊԱԼԱՏԻՆ ՄԷՋ


Լուսանկարներ՝ Քենէթ Մարթին

ՊՈՍԹԸՆ.- Ուրբաթ, Ապրիլ 12-ին, Մասաչուսէցի նահանգային պալատին մէջ նշուեցաւ, Հայոց ցեղասպանութեան 104-ամեակը: Ուաթըրթաունի Սուրբ Ստեփանոս Վարժարանի աշակերտները երգեցին Միացեալ Նահանգներու եւ Հայաստանի քայլերգները:
Ապա Ուոթըրթաունի հայ աւետարանական Ա. Եկեղեցւոյ պատուելի դոկտ․ Աւետիս Պէօյնէրեան կատարեց բացման աղօթքը: Խօսք առաւ օրուայ հանդիսավար Տէյվիտ Մուրատեանը, որ շեշտեց թէ այնքան ատեն որ կը մոռցուի դարուս առաջին ցեղասպանութեան ճանաչումը, պիտի շարունակուի պայքարն ու պահանջատիրութիւնը:
Ներկայ էին քաղաքապետ Չարլզ Պէյքըր, Մասաչուսէցի նահանգային պալատի խօսնակ Ռապըրթ Տըլիօ, ծերակուտական Ուիլիըմ Պրաունսպըրկըր, շէրիֆ Փիթըր Քութուճեան, ներկայացուցիչներ՝ Ճոնաթան Հեքթ, Տէյվ Ռոճըրզ, Տէյվիտ Ռապըրթսըն եւ Տէյվիտ Մուրատեան։
Օրուան պատգամաբերն էր Նուպար Աֆէյեանը, որ «Օրօրա» հիմնարկին գործադիր նախագահներէն է։ Ան իր խօսքին մէջ ըսաւ, թէ 104-րդ անգամ ըլլլաով կ’ոգեկոչուի յիշատակը 20-րդ դարու առաջին ցեղասպանութեան, աւելցնելով, թէ արդարութեան եւ մարդու իրաւունքներու պաշտպանութեան կարգախօսներով հրապարակը աղմկող միջազգային համայնքը ինքնիրեն իրաւունք պէտք չէ տայ կատարուած իրողութիւն համարելու ոճիրները եւ անոնց հետեւանքները, ինչ որ դուռը բաց կը ձգէ նոր ոճիրներու։
Օրելիան եւ Անահիտ Մարտիրոս ստացան յատուկ յուշանուէր մը, քաղաքի կեդրոնական շրջանի “Ռոզ Ֆիցճերըլտ Քեննետի Կրինուէյ” հողաշերտին վրայ, գտնուող Հայոց Ժառանգութեան Հիմնարկի կառուցած յուշահամալիրին գծով, անոնց կատարած ներդրումին պատճառով։
Հոծ բազմութիւն մը ներկայ էր այս տպաւորիչ ձեռնարկին։

 

Be the first to comment

Leave a Reply

Your email address will not be published.


*