Հ. Յ. Դաշնակցութիւնը Կը Վշտակցի


ԵՐԵՒԱՆ․- Հ․Յ․Դ․ հանրային կապերու գրասենեակը կը տեղեկացնէ, թէ Փարիզի Աստուածամօր տաճարը պատուհասած ողբերգական դէպքին առիթով` Հ․Յ․Դ․-ն իր վշտակցութիւնն ու զօրակցութիւնը կը յայտնէ Ֆրանսայի բարեկամ ժողովուրդին եւ իշխանութիւններուն:
Զօրակցական յայտարարութեան մէջ կ՛ըսուի. «Ֆրանսան յայտնի է համամարդկային մշակութային յուշարձաններուն նկատմամբ ցուցաբերած մեծագոյն յարգանքով ու խնամակալութեամբ: Գուցէ ատիկա է նաեւ պատճառներէն մէկը, որ անկախ կրօնական համոզումներէն, ամբողջ աշխարհը զօրավիգ է Ֆրանսայի ժողովուրդին` դժբախտութիւնը դիմագրաւելու համար:
Լիայոյս ենք, որ աշխարհի տարբեր կողմերէն մէկտեղուած ջանքերուն շնորհիւ Աստուածամօր տաճարը կրկին վեր կը յառնի իր ամբողջ վեհութեամբ, իբրեւ համաշխարհային խորհրդանիշ քրիստոնէական հաւատքի եւ ֆրանսական մշակութային ժառանգութեան»:
Իր կարգին, Հայաստանի Հանրապետութեան նախագահ Արմէն Սարգսեան ցաւակցական հեռագիր յղած է Ֆրանսայի Հանրապետութեան նախագահ Էմանուէլ Մաքրոնին: Այս մասին կը տեղեկացնեն Հայաստանի Հանրապետութեան նախագահի աշխատակազմի հասարակութեան հետ կապերու վարչութենէն:
«Փարիզի Աստուածամօր տաճարը, ուր պահուող գանձերն ու արուեստի ստեղծագործութիւնները չափազանց արժէքաւոր են, միշտ կանգուն եղած է` վեհօրէն խորհրդանշելով ֆրանսացի ժողովուրդին հարուստ մշակութային ժառանգութիւնը: Իմ կարեկցանքը կը յայտնեմ բարեկամ ֆրանսացիներուն` կիսելով անոնց զգացումները», կը նշուի նախագահ Արմէն Սարգսեանի ցաւակցական ուղերձին մէջ:
Վարչապետ Նիկոլ Փաշինեանն ալ, իր կարգին նամակ յղած է Ֆրանսայի նախագահ Էմանուէլ Մաքրոնին, յայտնելով. «Ցնցուած ենք Փարիզի մէջ տեղի ունեցած ողբերգութեամբ: Փարիզի Աստուածամօր տաճարը եւրոպական քաղաքակրթութեան եւ ամբողջ քրիստոնէական աշխարհի ամէնէն նշանակալից եւ սիրուած խորհրդանիշներէն է: Հայերուս համար անիկա ֆրանսական մշակոյթի եւ հոգեւոր ժառանգութեան իւրատեսակ մարմնաւորում է, որուն հետ մենք նոյնացուցած ենք Փարիզն ու անոր բազմադարեան պատմութիւնը»:

Be the first to comment

Leave a Reply

Your email address will not be published.


*