Ցեղասպանութեան Ճանաչման, Անոր Ուրացման Դէմ Դնելու Եւ Զայն Դասաւանդելու Նոր Բանաձեւը Ներկայացուեցաւ

 

ՈՒԱՇԻՆԿԹԸՆ.- Ամերիկայի Հայ Դատի յանձնախումբը կը տեղեկացնէ, թէ քոնկրէսականներ Էտըմ Շիֆի եւ Կաս Պիլիրաքիսի առաջնորդութեամբ, 70է աւելի քոնկրեսականներ Ներկայացուցիչներու տան ներկայացուցած են Հայոց Ցեղասպանութեան վերաբերող նոր բանաձեւ մը, որուն մէջ շեշտը կը դրուի միաժամանակ՝ Ցեղասպանութեան ուրացման դէմ դնելու, Ցեղասպանութիւնը ճանչնալու եւ ոգեկոչելու ու Ցեղասպանութեան դասաւանդման կարեւորութեան վրայ՝ ապագայ ցեղասպանութեանց կանխարգիլման պայքարին մէջ։

Հայոց Ցեղասպանութեան 104-րդ տարելիցին առթիւ ներկայացուած այս բանաձեւը ողջունեց Ամերիկայի Հայ Դատի յանձնախումբի գործադիր վարիչ Արամ Համբարեան, յատկապէս կարեւոր համարելով բանաձեւին այն բաժինը, որ շեշտը կը դնէ Հայոց Ցեղասպանութիւնը եւ այդ օրերուն ամերիկացի ժողովուրդին կողմէ հայութեան տրամադրուած աջակցութիւնը Միացեալ Նահանգներու ապագայ սերունդներուն ծանօթացնելու ջանքերուն վրայ։

«Ցեղասպանութիւնը ոչ թէ պէտք է հերքել, այլ պէտք է ընդունիլ իբրեւ մարդկութեան համար պատուհաս մը: Հայոց Ցեղասպանութեան պաշտօնական ճանաչումը Միացեալ Նահանգներու արտաքին քաղաքականութեան մէջ քաջութեան նոր էջ պիտի բանայ: Գործող վարչակազմին հաստատ առաջնորդութեամբ՝ ժամանակն է, որ Միացեալ Նահանգները դէմ դնէ Հայոց Ցեղասպանութիւնը ուրանալու Թուրքիոյ ջանքերուն», յայտնեց Պիլիրաքիս։

Քոնկրէսական Շիֆ, խօսելով բանաձեւին մասին՝ նշեց, որ առաւել քան 100 տարի առաջ Օսմանեան կայսրութեան իրականացուցած եւ 1.5 միլիոն հայերու կեանք խլած ցեղասպանութիւնը «Պարզապէս անցեալին մաս կազմող փաստ մը չէ, այլ յամեցող սպառնալիք մըն է: Անոր հերքումը ոչ միայն շարունակական վիրաւորանք է վերապրողներուն եւ անոնց շառաւիղներուն համար, այլ նաեւ այլ ժողովուրդներու դէմ ցեղասպանութեան կրկնութեան վտանգ մը կը հանդիսանայ», ըսաւ Շիֆ:

Be the first to comment

Leave a Reply

Your email address will not be published.


*