Ռապպի Շնայըր Աւետարանական Հոգեւոր Հովիւները Տարած Է Պաքու Քարոզչական Շրջապտոյտի Նպատակով

Յարութ Սասունեան 

Արեւելահայերէնի թարգմանեց՝ Ռուզաննա Աւագեան

Արեւմտահայերէնի վերածեց՝ Սեդա Գրիգորեան

 

Արդէն քանի մը տարիէ ի վեր Ատրպէյճանի կառավարութիւնը եւ անոր դիւանագէտները արտասահմանի մէջ ամէն բան կ՛ընեն՝ աշխարհի հրեաները, ամերիկեան հրէական կազմակերպութիւնները եւ Իսրայէլը իրենց կողմը գրաւելու համար։

Ատրպէյճան պարզապէս կը կրկնէ Թուրքիոյ չարամիտ պահուածքը, որ մինչեւ վերջերս կը  սիրաշահէր Միացեալ Նահանգներու հրէական կազմակերպութիւնները եւ Իսրայէլի կառավարութիւնը՝ Հայոց Ցեղասպանութիւնը ընդունող Գոնկրեսի բանաձեւի ընդունումը արգելափակելու համար: Հրէական բազմաթիւ խումբեր դադրեցուցին իրենց անբարոյ համագործակցութիւնը Թուրքիոյ հետ միայն այն ատեն, երբ Թուրքիոյ նախագահ Էրտողան սկսաւ հակասեմական յայտարարութիւններ ընել եւ սպառնալ Իսրայէլի:

Ինչպէս Թուրքիոյ, այդպէս ալ Ատրպէյճանի կողմէ հրէական կազմակերպութիւններու եւ Իսրայէլի հետ կապեր հաստատելու ձգտումը հիմնուած է զուտ հակասեմական տեսակէտի վրայ, ընդ որում հրեաները կը վերահսկեն ամերիկացի քաղաքական գործիչները, ուստի Ատրպէյճանի շահերէն կը բխի լաւ յարաբերութիւններ ունենալ «հզօր» հրեաներու հետ։ Իսրայէլական «Հաարեց» թերթի տուեալներով՝ «շատ մը երկիրներ կը զարգացնեն իրենց յարաբերութիւնները Իսրայէլի հետ՝ յոյսեր փայփայելով վայելել աջակցութիւնը ազդեցիկ ամերիկեան հրէական կազմակերպութիւններու, որոնք իրենց հերթին լաւ կ՛արտայայտուին այդ երկիրներու մասին, ամերիկեան կառավարութեան առջեւ»։

Աւելին. Ատրպէյճանի հրէամէտ ջանքերը կը հիմնուին այն փաստի վրայ, որ Ատրպէյճան միլիառաւոր տոլար արժողութեամբ ժամանակակից զէնքեր կը գնէ Իսրայէլէն։ Իր հերթին, Ատրպէյճան մեծ քանակութեամբ քարիւղ կը վաճառէ Իսրայէլի: Նաեւ հետախուզական զեկոյցներ կան այն մասին, որ Ատրպէյճան քանի մը զօրակայան տրամադրած է Իսրայէլի՝ Իրանի հետ իր սահմանին վրայ, եթէ յանկարծ Իսրայէլ որոշէ յարձակիլ Իրանի միջուկային կեդրոններուն վրայ։

Ամերիկեան հրէական առաջնորդներու եւ Ատրպէյճանի միջեւ համագործակցութեան վերջին օրինակը ամերիկեան աւետարանական հոգեւոր հովիւներու այցն էր Պաքու՝ Մարտ 3-էն 8, Նիւ Եորքի ուղղափառ ռապպի Մարք Շնայըրի գլխաւորութեամբ՝ «նպաստելու համար միջ-կրօնական երկխօսութեան եւ Իսրայէլի հետ համագործակցութեան լուսաբանման», կը տեղեկացնէ «Ասոշիէյթըտ Փրէս»։ Ասիկա առաջին աւետարանական պատուիրակութիւնն էր, որ այցելած է շիա մահմետական երկիր։ Ռապպի Ատրպէյճանը ներկայացուցած է իբրեւ «ամէնէն սիրելի եւ յարգուած մահմետական երկիրը հրէական ամերիկեան համայնքի աչքին», կը հաղորդէ ատրպէյճանական «Թրենտ» գործակալութիւնը: Անցեալ տարի Շնայըր ելոյթ ունեցած է Քոնկրէսի մէջ ձեռնարկի մը պահուն՝ փառաբանելով Ատրպէյճանի եւ Իսրայէլի միջեւ սերտ բարեկամութիւնը։

Ամերիկեան աւետարանական տասներկու հովիւներէն բաղկացած խումբը տեսակցած է Ատրպէյճանի նախագահ Իլհամ Ալիեւի, արտաքին գործոց նախարարի, մահմետական շէյխերու, տեղական եկեղեցական ղեկավարներու եւ Իսրայէլի դեսպանին հետ։ Ռապպի Շնայըր ըսած է «Ասոշիէյթըտ Փրէս»ի, որ նախագահ Ալիեւ «պատուիրակութեան այցի ժամանակ յայտարարած է, որ Պաքուի մէջ պիտի կառուցուի Ատրպէյճանի առաջին հրէական մշակութային կեդրոնը, հրէական օրէնքներով թոյլատրելի կերակուրներով, ճաշարանով եւ պանդոկով՝ հրեայ  հիւրերը ընդունելու համար»։ Շնայըր կը ղեկավարէ Նիւ Եորքի մէջ  գտնուող ցեղային փոխըմբռնման հիմնադրամը եւ հիմնադրած է Հեմփթըն սինակոկը Ուեսթհեմփթըն Պիչի մէջ, Նիւ Եորք։ Ի նշան բարեկամանական յարաբերութիւններու՝ Ատրպէյճանի ազգային օդանաւային ընկերութիւնը ուղիղ թռիչք կը կատարէ դէպի Թել Աւիւ, իսկ նախագահ Ալիեւ 2016-ին հիւրընկալած է Իսրայէլի վարչապետը։

Զարմանալի չէ, որ Ատրպէյճանի արտաքին գործոց նախարար Էլմար Մամեդեարով օգտուած է աւետարանական առաջնորդներու հետ իր հանդիպումէն՝ քննադատելու Հայաստանը եւ խեղաթիւրելու Արցախեան հակամարտութիւնը։ Ան ըսած է՝ «Հայաստանի ղեկավարութեան վերջին յայտարարութիւնները կ՛ընդգծեն, որ նման յայտարարութիւններ կը խոչընդոտեն խաղաղ բանակցութիւնները»։

Հոգեւոր հովիւ Էտըմ Մեսա, որ կը ղեկավարէ Քալիֆորնիոյ Ռանչօ ՔուՔամանկա քաղաքը գտնուող Abundant Living Family եկեղեցին, ըսած է «Ասոշիէյթըտ Փրէս»-ի, որ այդ իր  առաջին այցն էր մահմետական մեծամասնութիւն ունեցող երկիր։ Հովիւը ըսած է, որ զինք քաջալերած են մասնակցելու շրջապտոյտին՝ Իսրայէլի նկատմամբ Ատրպէյճանի աջակցող դիրքորոշման եւ միջ-կրօնական ջանքերու պատճառով։ «Անհաւատալի է, որ մահմետական մեծամասնութիւն ունեցող նոյն այս երկիրը իրականութեան մէջ պէտք է առաջնորդէ պայքարը՝ կրօնական երկխօսութեան, համայնքի եւ համերաշխութեան համար»։

Ռապպի Շնայըր հաստատած է «Ասոշիէյթըտ Փրէս»-ի՝ կրօնական այս խումբի այցելութեան կապուած քաղաքական օրակարգը. «քաղաքական տեսանկիւնէ հարց չկայ, գիտէք, որ Ատրպէյճան կը  ձգտի ամրապնդել իր յարաբերութիւնները ԱՄՆ վարչակազմի եւ Միացեալ Նահանգներու Քոնկրէսին հետ։ Իսրայէլ կարեւոր միջնորդ է այս հարցով»։

Ինչպէս գոնկրեսական Էլսի Հեյսթինկզի պարագային, այս անգամ ալ Ատրպէյճան, կարծես թէ, մէկ այլ խայտառակ անձնաւորութիւն ընտրած է իր քարոզչութիւնը տարածելու համար: 60 տարեկան ռապպի Շնայըր վեց անգամ ամուսնացած եղած է, վերջին անգամ՝ 2017 Մարտին։ 2018 Փետրուարին, Ֆլորիտայի նահանգը հրամայեց Շնայըրի՝ ամսական 5000 տոլար վճարել՝ զաւկին գծով 64 594 տոլար չվճարուած նպաստին համար. գումար մը, որ ան պարտական էր իր երրորդ կնոջ՝ իրենց 19 տարեկան տղուն խնամքին համար։ Ռապպի Շնայըր 2015 Յունիսին հեռացուած է Ամերիկայի ռապպիական խորհուրդին կողմէ՝ բարոյագիտական կանոնները խախտելուն համար՝ արտաամուսնական յարաբերութիւններ ունենալուն պատճառով։ 2010 Յունիսին ռապպի իր կրօնակիցներուն յայտարարեց, որ կը  տառապի «երկբեւեռ խանգարում» կոչուող հիւանդութենէ։

Ուիքիփետիայի համաձայն՝ «իր կրօնակիցներուն ճնշման տակ՝ իր բազմաթիւ ամուսնալուծութիւններուն եւ սիրաբանութիւններուն պատճառով, Շնայըր, 2016-ին հրաժարեցաւ քարոզիչի իր դիրքէն, Հեմփթըն սինակոկի մէջ, զոր ան հիմնադրած էր 1990 թուականին։ Հաւատացեալները սպառնացին, որ պիտի հրաժարին իրենց խոստումներէն եւ վճարումներէն, այնքան ատեն որ ան չէ լքած սինակոկը»։

«Նիւ Եորք Փոսթ» հաղորդած է, որ իր երրորդ կինը խաբելէ ետք ռապպի Շնայըր 2006-ին ամուսնացած է «սեռական երկրպագուի մը»՝ Թոպի Ռուպինշտէյնի հետ, որ դարձած է անոր թիւ 4 կինը: «2010-ին, Թոպի յատուկ խուզարկու վարձեց, որ յայտնաբերեց անոր ամուսնոյն եւ այդ օրերուն 30 տարեկան Կիթի Լէյնըրի սեռական բնոյթի բաց լուսանկարները Սուրբ երկրին մէջ. Շնայըր իր կնոջ ըսած էր, որ Սուրբ երկիր կը մեկնի սովորական աշխատանքային այցելութեամբ։ Թիւ 4 ամուսնութիւնը շուտով վերջ գտաւ ամուսնալուծութեամբ»։ 2013-ին  ռապպի ամուսնացաւ Կիթի Լէյնըրի՝ թիւ 5 կնոջը հետ։ 2014-ին այս զոյգը զաւակ ունեցաւ, «սակայն 2015-ին Շնայըրը բռնեցին Queens-ի մէջ, սեռայնօրէն երիտասարդ Սիմի Թէյթըլպաումի հետ ընթրելու պահուն. վերջինս ալ 2017-ին դարձաւ անոր  6-րդ կինը…: Հետաքրքրական է, որ «Նիւ Եորք Փոսթ» հաղորդած է, որ «Շնայըր իր արատաւոր արտաամուսնական կապերը բացատրած է անով, որ ինք մտային հիւանդ է եւ բուժում կը փնտռէ»։

Ռապպիի նախկին կինը՝ Թոպի Կաթզմըն ըսած է «Նիւ Եորք Փոսթ»ի. «Երբ ես լքեցի զայն, ան կը շահէր 800 հազար տոլար…: Այս գումարը կը ներառէր 500 հազար տարեկան եկամուտը, գումարած՝ հարիւր հազարաւոր լրացուցիչ փոխ հատուցումներ, ներառեալ վճարումները՝ Ուեսթհեմփթըն Պիչի մէջ անոր ունեցած գրեթէ 5000 քառ. մեթր մակերեսով տան, որ կը  գնահատուի մօտաւորապէս 3 միլիոն տոլար»։

Ռապպի Շնայըրի նախորդ շաբթուան այցելութիւնը Ատրպէյճան՝ անոր առաջին այցը չէր։ Վերջին տարիներուն ան քանի մը անգամ քարոզչական շրջապտոյտներով եղած է հոն։ Հետաքրքրական է գիտնալ, թէ արդեօ՞ք ռապպի որեւէ փոխ հատուցում ստացած է նախագահ Ալիեւէ՝ իր «արժէքաւոր» ծառայութիւններուն համար: Ռապպիի բազմաթիւ այցելութիւնները Ատրպէյճան՝ զայն աւելի լոպիիսթ կը դարձնեն, քան կրօնական գործիչ…

Ես կոչ կ՛ուղղէի հայկական աւետարանական եկեղեցւոյ առաջնորդներուն՝ կապուելու այդ 12 հովիւներուն հետ, որոնք անցեալ շաբաթ այցելած են Պաքու՝ հակազդելու համար իրենց մատուցուած՝ Հայաստանի եւ Արցախի դէմ քարոզչութեան։ Ես կը փափաքէի նաեւ իմանալ, թէ արդեօ՞ք հովիւները եւ ռապպի Շնայըր Պաքուէն վերադարձած են ճամպրուկներով՝ լեցուած ատրպէյճանական սովորական «ընծաներով»՝ խաւիարով, գորգերով եւ այլ արժէքաւոր իրերով…

 

 

 

Be the first to comment

Leave a Reply

Your email address will not be published.


*